Novèles èt Binde à dèsséns/IX

Montèsqueû d’ayîr Trumpfade d’audjoûrdu

Là, i-gn-a rén à fé, faut qu’ dj’ènnè cause dèl grand mau bèl-aîr qui vike dins nosse ruwe. Il èst patinté chômeû dispôy dès-ans èt dès ra-z-ans. Mins, il a one maujone come on tchèstia. Tote blanke, dès pîces po li d’juner, dès grandès pîces po lès diner, dès cènes po s’ ripâser, po bagnî, po forbate, dès tchambes po dwârmu, po cougnî ; di tot qwè ! On soç’none co bin èchone èt s’ causer. Quand djè lî d’mande comint ç’ qu’i faît po-z-awè tot ça ; i m’ rèspond : « I-gn-a rin d’ pus aujîye ! Ci n’èst nin tot purdant s’ bèsace tos lès djoûs po-z-aler bouter come one bièsse dins-one usine qu’on s’ pout payî tot ça ! » Ét adon, ci n’èst nin co tot !. Il a one vète Masèrati qui n’arive minme nin à wôteû di m’ céngue. Tote noûve, come tchaîte d’on quarante tones. Ét i rôle avou sins-awè s’ pèrmis, sins-awè one assurance, sins pont payî d’ tâyes, sins awè passé au contrôle. I rôle au rodje, i s’è vante, « Gn-a qu’ cit-là qu’èst bon ! » di-st-i. Il l’ va zwèper dins lès tines à mazout di sès vijins. À co bin qu’ dji m’ tchaufe au bwès. Tanawète, i rabroke dissu on vélo à l’électrique, ou co bin d’ssu one Harley Davidson ; adon qu’il a d’nalé avou on bus dès TEC. On djoû ; nos dîrans one nut, il a rabroké d’ Nameur avou one trotinète. On’ ôte côp, il a r’moussî dins s’ coû avou one novèle auto, èt one novèle sèmi-r’môrque sins plaque. À s’ maujone, nin dandjî d’ cachî après l’ compteû élèctrique : i-gn-a pont. I s’a racôrdè li minme dirèk al poteau. « Insi, ti n’ès nin oblidjî d’ passer par onk ou l’ôte qui t’ costéye tchêr èt vilin ! » Èt i r’bat mèseure : « Poqwè qui dj’ pâyereû one sakwè adon qu’ lès-Arâbes di d’ vécî n’ payenut rin ! Mi, qu’èst Bèlje, qui n’a pont d’ovradje, qui n’a qui m’chômage ; dji d’vreû pâyî, Faut nin m’ prinde por one bièsse. Dji veû voltî lès-ètrangér’, mins co mia quand i d’morenut dins leû payîs. » I s’aveût acoplé avou one brâve èt bèle comére, mins elle a rade couru dju d’ lî !. On n’ sét nin poqwè ! … Adon, pa côp, i s’ ramin.ne dins s’ Masèrati avou one novèle comére qu’on n’ veût jamaîs lontimps : ele pètenut èvôye t’t-ossi rade. On n’ sént todi nin poqwè non pus. Mins, vos d’vrîz veûy ça,, carémint dès cavales di coûsse. Waouw ! One carosserîye à nèyî l’ fè do diâle, dèl Bon Diu èt d’ tos sès sints. Putin ! dj’areû ça è m’ lét… Ét il è r’trovre one novèle totes lès samin.nes. Djè li a d’mandé poqwè. I m’a rèspondu, faut bén qui dj’ dispinse lès liârds qui gangne dizo tauve à one saqwè… Dj’a d’vu mau comprinde. Mi, faut qui dj’ boute po payî lès drogues qui m’ médecén m’oblidje à prinde. Dji n’a nin l’ timps do rîre. Faut qui dj’ boute, mi. Dji n’ sé nin si dj’ariverè jusqu’à m’ pinsion èt moru d’assène bin pwârtant. Pas côp, i m’ dît qui dj’ n’a rin compris. Qui dji n’ sé viker. Qui l’ vicaîrîye n’a nin stî faîte po bouter. Qui ovrer n’apwate qui dès anôyemints. Ci qui faut c’èst viker avou lès liârds dès-otes. S’è sièrvu po qui fujenuche dès djon.nes po-z-é ramin.ner todi d’ pus dins vos potches. Profiter di ç’ qui lès-ôtes ènn’-ont, profiter do sistin.me qwè ! I m’ dit co bin qui dj’ so-st-one bièsse. Ça, m’ feume mè l’ dît èto ! Mi, dji so quétefîye one bièsse, mins lî, i d’vreût yèsse à Dâve dispôy lonmint ! Sovint, i pinse qu’il èst présidint d’ l’ Amèrique !

NB. Dji n’a bin sûr rin conte lès chômeûs… lon èri d’ mi !