Marguèrite
Marguèrite
rortografiaedje da « El Bourdon » lº 705
I.
Marguèrite ô bôrd dèl pîssinte,
Vos-èstèz bé franche, èm' chène-t-i !
Si in passant v'nèt a vos prinde,
Èn' s'rîz né mieus dins-in pachî ?
II.
N'eston' né fétes pou yèsse coudûwes
Pou yun d' vos caprices d'in momint,
Ou pal fôcîye yèsse abatûwes
Quand cè n'èst né pô piètin'mint ?
III.
Coudûwes, nos 'stons lès rin.nes chwèyéyes,
On nos mèt dins-in bia bidon
Djusqu'ô momint ou, 'stant passéyes,
On nos fout dins l' batch ô tchèrbon !
IV.
Combé d' fleûrs èn′ sont pus wétîyes ?
(I n'in manque né su no monde sot !)
D'abord qu'èles sont 'ne miyète flanîyes
On lès-abandone ô richot…