Dju crwâs k'on put dire ku l'pwin est ossi vî ku l'monde. Cand l'Bon Diu è tchèssi Adam et Eve du Paradis, nu l' z'y è-t-i nin dit: « Vous mwindj'réz vosse pwin à l' suweûr du vosse front »- L'ancy.in tèstamant raconte ku les juifs ofrint djà des pwins à Yavhé, t'à siant in rite bin spécial; dupwis l'Djûdi-Sint, nosse rulijion est toudis continuwé l'ofrande du pwin à messe.
Dins tous les pa.ys ki cultivat du grin, û putot des graminées, on z'è toudis fwêt du pwin du tout timps.
Nös grins d'Ardène sont an prèmî lieu: l'èpôte, û la spéte û co bin l' blè. Après, dj'ans l'swâ.ye et après in pö du blé d'mars, mês k'est mèyeu pou les pouyes ku pou l' pwin. Dins l'timps, on samot co bin in pö d' nwâr blé, du sarazin, don, k' on loume ossi boukètes. La farine ére djöne et ça siêrvot à fwêre des bèrdèles û dès galètes, coume on vut.
Lu swa.ye su samot dins lès virées k'on z'avot sôrtés; lu blè inmot mî dès meyeûs tchamps, souvint in vî trio avu d' l' ansine.
La rècolte su fjot à l'mwin, bin souvint al' sîe, pis à l' fô. Lu batage su fjot sul' bouc et on vannot ou van, par après ou djâle.
Du timps des sègneûrs, coume il'avint toudis bèswin d'sous (c'est co parèye anute), il' avint bâti dès molins su les rouchés et il' oblidjint les djans à z' y aler. Lu mon.ni, ki louwot l'molin, cuir et poye, rapwârtot bramint â sègneûr. Et, ç'astot l'min.me avu l'four. On djot ku l' molin û ku l'four astot banals ; ça vlot dire : du ban, don, du sègneûr.
Al' longue, tout ça est tumé et les djans ont bâti tchèkin leu four. Mês, pou l' molin, l'abitude du prinde moûture est d'mèré. Dju vus dire k'adon, les pöves n'avint nin toudis les sous pou payî l' mon.nî; çut'çi su payot don à wârdant in pö d'farine du leus pratikes. Mês, i gnè yu des pus malins ki purdint mouture et co les sous ou dzeus. Du là, la mwêje runoumée des mon.nîs !
Nös molins d'Ardène astint toudis bôtis su in bî, avu ène chute d'êwe ki vnot souvint d' bin lon, et c'est l'pwas d'l'êwe ki fjot tourner la ruwe. Su les rivires sins bêcöp d'pante, l'êwe astot bramint pû abondante. Adon, l'êwe antrin.not la ruwe du d'pa dzous. Dins les molins, i gn'avot souvint 3 toûrnants, yink pou la pastère des biêsses, yink pou cheure l' èpöte (décortiquer) et yink pou la blantche farine. Dins les plats pay.is, c'est l'êr ki fwêt toûrner les molins à vant.
Tous les molins du d'dins l'timps astint à pîre; ça n'toûrnot nin vite et ça fjot dul farine ki dmèrot bin frède. La prumîre farine k'on molot astot la pu bèle; c'ére la fleûr, la çîe du mitan du grin. Kan on r'passot les r'bulets in deujime cöp après la bultrîe, la farine ére pus grije, pask'on pèlot alörs les grus. Dins les grands molins, on s'siêve du cylindes en acier, souvint toute ène chîlée, uske les r'moladjes rupassat 5,6,7 û 8 cöps. A tchèke passadje, la farine est tamijie 2 û 3 cöps èt c'est d'après çà k'ill' duvint du gruwau, dul' extra, dul' trwâs zérôs, dul' deus zéros, pis dul' basse farine, des r'moulâges , des r'bulets, et des grus û des latons.
Dins lès mènadjes, c'èst à 1' fame ku ruvnot l' coûjadje dou pwin. On coûjot souvint pou la smwin.ne, des gros pwins d'kate lives, souvint ronds û cârés, dins les moûles. Lu four su trouvot pa des cöps dlé la tch'minée; çà fwêt k'on d'mèrot ou tchöd pou coûre. Mês, öte pôrt, i falot couru ou fourni avu les corbîes, et à l'hiviêr, ça rafrèdichot la pôsse.
Lu four astot tchôfé ou bwès, des fagots et des coches bin sètches, pou d'ner ène bèle flame ki fjot l' tour du four. Les bouladjîs avint les min.mes fours ku les particuliers, à pôrt k'il' astint pu grands. Pus tôrd, il' ont yu des fours à gueûlârd. On n'fujot pu l'feu dins l'four, mês jusse ou dvant, pa dzous, dins ène cadje en fonte avu in keude à l'intrée du four, k'on toûrnot coume on vlot, pou tchèssî les flames dins l'four. Les bouladjis coûjint leus pwins dins les moûles û bin su l'asse, pou z'awè ène mèyeue crousse.
Djà dvant la guêre, i cminçot à z'awè des fours du bouladjîs k'astint tchôfés ou tchèrbon û ôs grosses brikètes du cylinde. Ces fours-là astint souvint à deus ètadjes, plus yink du rècupèration. Lu feu astot fwêt din in foyer èsprès, ki s'trouvot su l'costé. Lès flames à montant, lètchint èt tchôfint, in dbout dès tu.yös ki passint dzous l'asse et dzeus la voûte du tchèke ètadje. Pu k'ils astint yöt mètus, pus k'i rèchint dzeus les flames pou z'awè la min.me tchaleûr partout. A ç'mournint-là, l'intèrieur des fours dumèrot prope, pisku l'feu n'alot pus d'dins. I gn'avot co in système pou z'avo.yî dul' vapeûr dins l'four et rinde les crousses ruloujantes.
Avu tous ces fours-là, i falot afourner les pwins yink à yink. C'est adon k'on z' è sondjî à fwêre des « soles sortantes ». Kan les pwins sont toûrnés, on les met su des toles à ptits trös, toles dul' grandeûr du four, montées dins ène etagere à roulètes. Pou lès mete luver,on poûsse t'tafwêt dins ène tchambre ruchandie al vapeûr èt cand i sont bons, on z'amon.ne l'indjole duvant l'four et hop!, on poûsse d'in cöp les toles dudins. Tous les pwins sont afournés assan.ne. Et pou dusfourner, c'est parèy. Dins les toutes grosses bouladj'ries, i gnè ossi des fours à l'tchin.ne. On z'afourne d'in costé, et les pwins rèchat d'l'öte.
Ké difèrance avu le vîes mwês en bwès èt lès grosses pôsses ku l'bouladji dvot prusti.yî al' mwin, à chu.yant des grosses goutes ki tumint dins la pôsse.
Asteure, les bouladjîs ont des pètrins mècanikes, ki travayat la pôsse pu régulier ku dvant, èt sins mô. I gnè k'à voûdî la farine, l'êwe, lu sé èt la l'vure; la machine fwêt l'rèsse.
I gnè min.me des pètrins rapides ki prustichat su 10 minutes, alörs ku d'vant, i falot ène grosse dumi-eûre. Ces pètrins-là toûrnat pu vite et avu les grêsses k'on met, lu pwin est pu oufe (mî rulvé, si on vut) èt i d'meure pu dous. Ça ri vut nin dire k'i vôt mi.
Dvant la guêre du 40, dj'ê vu in vî bouladjî pwârter l'pwin ôs ècarts en vèlo, dins in satch sul' dos, coume ossi dins ène tchèrète à brès, û à tchin (la bouladj'rîe Leroy à Bouyon, co après la guêre), avu ène cariole à tchfô, k'astot èkipée suivant, pis avu in triporteur à pèdales, pis avu des z'ôtos et des camionètes. Les bouladjîs vindint ossi dul' luvure, dul farine èt in pö des gozètes. Les pwins n'astint nin cöpés, ni ratorti.yîs coume anute, et pèrson.ne nu s'a plindot. Asteur, il' z'y fat dès bês satchots avu l'pwas d'sus, lu pwin dot z'èsse cöpé, il a fôt du blanc pou yink, du d'mi-grije pou l'öte èt du nwâr pou l' trwâjime.
Tou ça fwêt k'on pa.ye des ptits pwins d'800 gr. à 50/60 francs, àl' place du 7.50 pou in kilo après la guêre. Lu froumint, lou, su ç' timps-là, est d'mèré ou min.me prix. I gnè yôk ki n'va pus. C'est in pö pou ça ku bramint ach'tat des machines à pwin èlèctronikes, ki fjat t'tafwêt. I gnè k'à z'y mète çu ki fôt, trwâs heures après, le pwin est coût, sins y awe mètu la mwin.
Kî ki n' su souvint nin du pwin d' adon, les timbes du ravitay'mant, les tîkètes du farine avu les grus, pas des cöps avu du suk' cristalisé, cand çu n'ére nin des féves û des pwès molus.
Coumint rouvî lès carnassiéres k'on fjot cand les swâ.yes avint djèrmé, la purée d' canadas pou z'alondjî la pôsse, lu lwin ki sintot l'sèr', lu pwin ki fi.yot ôs canicules, èt an 44, lu blanc pwin dès Amèricains, pu blanc k' dul' nive èt oufe coume dul' chume.
Pou nous z'ötes, lu blanc pwin n'est nin r'vunu du djoû ou land'mwin. Lu ravitay'mant è co dèré in boukèt. A ç'moumint-la, lès cinsis mètint leu farine ou bouladjî ki l'z'y fjot leu pwin à port, pasku leu farine ére pu blantche ku l'öte. I vlint don rawè leu farine.
Mês, cand l'blanc pwin èst ruvnu, adon, leu farine ére pu grije et i vlint rawè du blanc pwin. Al' fin, lès bouladjîs ont arèté d'prinde la farine des cinsis et tout l'monde èst mwindjî du blanc pwin, cand çu n'ére nin du « l'amélioré. » Et 50 ans après, on r'èst ou grije èt ou nwâr. On n'sé pus kwè rêver !
Dupwis kék'anéyes, on mwindje mwinsse du pwin. I gnè des rèstörants partout, dès mèss, dès cantines dins les scoles, les grands burös, les grands magasins. Bramint des fames travayat fû dul' môjon, les gosses sont dins les crêches û à scole et tout ç'monde là vike du consèrves et d'ötes afwéres aprètées d'avance; les gazètes du fame nu côsat ku d'réjime; les mèd'cins, c'est parèye ; ça fwêt ku l' pwin est duvnu l'parint pôve. Pourtant,c'est 1' pwin, nosse vicadje! Dins les anéyes passées, toutchî ou prix du pwin, ç'astot in crime vis-à-vis l'ovrî ki purdot la malète èt lès gazètes à flint tout in fûr. Més, ç'timps-là est oûte ! Et çà n'va nin mi pou çà!
Sicrît li 6 di may 1996 pol « Soce du R'Câzeûs d'Walon »