Dji croe k’ on pout dire ki l’ pwin est ossu vî ki l’ monde. Cwand l’ Bon Diu a tchessî Adam et Eve do Paradis, n’ elzî a-t i nén dit: « Vos wangnroz vosse pwin a l’ souweur di vosse front » ?
L’ ancyin testamint raconte ki les djwifs ofrixhént ddja des pwins å Bon Diu, tot shuvant on rite bén speciå.
Dispoy li prumî djudi sint, nosse rilidjon a todi continouwé l’ ofrande do pwin a messe.
Dins tos les payis ki coûtivèt do grin, u putoit des graminêyes, on-z a todi fwait do pwin di tot tins.
Les grins d’ Årdene, c’ est, po cmincî, li speate (k’ on lome cidlé del blé). Après, dj’ avans l’ swele. Ey après, on pô do frumint d’ måss, mins k’ est meyeu po les poyes ki po l’ pwin. Dinltins, on seméve cobén on pô d’ boûkete. Li farene ere djaene et ça sierveut a fé des berdeles (sôre di galetes).
Li swele si seméve dins les virêyes k’ on-z aveut sårté. Li speate inméve mî des meyeus tchamps, sovint on vî triyot avou d’ l’ ansene.
L’ awousse si fjheut a l’ mwin, bén sovint al seye [faucille], pu a l’ fås.
Li bataedje si fjheut sol bok et on vanéve å van, pu après å diåle.
Do tins des signeurs, come il avént todi dandjî d’ sôs (c’ est co parey enute), il avént basti des moléns so les rixheas et il oblidjént les djins a-z î aler. Li mônî, ki louwéve li molén cur et poys, rapoirtéve bråmint å signeur. Et c’ esteut l’ minme avou l’ for. On djheut ki l’ molén u ki l’ for esteut banåve. Ça vleut dire : do ban, adon do signeur.
Al longue, tot ça a toumé et les djins ont basti tchaeconk si for. Mins, po l’ molén, l’ abitude di prinde molaedje a dmoré. Dji vou dire k’ adon, les pôves n’ avént nén todi les sôs po payî l’ mônî. Ci-ci s' payive don e wårdant on pô d’ farene di ses pratikes. Mins i gn a yeu des pus maléns ki purdént molaedje et co les sôs ådzeu. Did la, li mwaijhe rilomêye des mônîs !
Nos moléns d’ Årdene estént todi bastis so on ri, avou on bî ki vneut sovint d’ bén lon, et c’ est l’ pwès d’ l’ aiwe ki fjheut tourner l’ rowe. So les rivires sins beacôp d’ valêye, gn aveut bråmint dpus d’ aiwe, k' aveut bråmint pus d' foice, dabôrd. Adon, l’ aiwe etrinnéve li rowe did padzo.
Dins les moléns, i gn aveut sovint troes tournants, onk po l’ pasteure des biesses, onk po scheure (décortiquer) li speate et onk po l’ blanke farene. Dins les plats payis, c’ est l’ air ki fjheut tourner les moléns å vint.
Tos les moléns did dinltins estént d' pires. Ça n’ tournéve nén vite et ça fjheut del farene ki dmoréve bén froede. Li prumire farene k’ on moleut esteut l’ pus bele; c’ ere li fleur, li cene do mitan do grin. Cwand on rpasséve les raboulets on deujhinme côp après l’ boultreye, li farene ere pus grijhe, pask’ on peléve alôrse les grus. Dins les grands moléns, on s’ sieve di cilindes d' acî, sovint tote ene chîlêye, ou çki les rmolaedjes ripassèt 5, 6, 7 u 8 côps. A tchaeke passaedje, li farene est raidjeye 2 u 3 côps et c’ est d’ après ça k’ ele divént do gruwå, di l’ estra, del troes zeros, del deus zeros, pu del basse farene, des rmolaedjes, des raboulets, et des latons.
Dins les manaedjes, c’ est a l’ comere ki l' cujhaedje do pwin rivneut. On cujheut sovint po tote li samwinne, des gros pwins d’ cwate lives, sovint ronds u cwårés, sorlon les fômes (moules). Li for si trovéve pa des côps dlé li tchminêye. Ça fwait k’ on dmoréve å tchôd po cure. Mins, ôte pårt, i faleut cori å forni avou les coirbeyes, ey e l’ ivier, ça rafroedixheut l’ påsse.
Li for esteut tchafé å bwès, des fagots et des coxhes bén setches, po dner ene bele blame ki fjheut l’ toû do for. Les boledjîs avént les minmes fors ki les pårticulîs, a pårt k’ il estént pus grands. Pus tård, il ont yeu des fors å gueuyåd. On n’ fijheut pus l’ feu dins l’ for, mins djusse ådvant, padzo, dins ene cadje di scroufier avou on keute a l’ intrêye do for, k’ on tournéve come on vleut, po tchessî les blames dins l’ for. Les boledjîs cujhént leus pwins dins les fômes u bén so l’ aisse, po-z awè ene meyeuse crosse.
Dedja dvant l’ guere di 40, i cmincive a-z awè des fors di boledjîs k’ estént tchåfés å tcherbon u ås grossès briketes di cilinde. Ces fors la estént sovint a deus astaedjes, pluss onk di rcuperåcion. Li feu esteut fwait dins ene aisse esprès, ki s’ trovéve so l’ costé. Les blames, e montant, letchént et tchåfént, å dbout des tuyos ki passént dzo l’ aisse et dzeu l’ vôsse di tchaeke astaedje. Pus k’ il estént hôt metous, pus k’ i rexhént dzeu les blames po-z awè l’ minme tcholeur pattavå. A ç’ moumint la, l’ åddins des fors dimoréve prôpe, puski l’ feu n’ aléve pus ddins.
I gn aveut co on sistinme po-z evoyî del wapeur dins l’ for et rinde les crosses rilujhantes. C’ ere di l’ aiwe k’ on fjheut vni so ene bolante plake et ki fjheut wapeur do côp.
Avou tos ces fors la, i faleut eforner les pwins onk a onk. C’ est adon k’ on-z a sondjî a fé des «toles sôrtixhantes». Cwand les pwins estént tournés, on les meteut so des toles ås ptits trôs, des toles del grandeur do for, montêyes dins ene axhale ås rôletes. Po les mete lever, on poûssive ttafwait dins ene tchambe rischandeye al wapeur et cwand il estént bons, on-z amoennéve l’ éndjole divant l’ for et hop ! on boutéve d’ on côp les toles didins. Tos les pwins estént-st efornés eshonne. Et po disforner, c’ esteut co parey.
Dins les tote grossès boledjreyes, i gn a ossu des fors a l’ tchinne. On-z efornêye d’ on costé, et les pwins rexhèt d’ l’ ôte.
Ké diferince avou les viyès mwaiyes di bwès et les grossès påsses ki l’ boledjî dveut prusti al mwin, tot souwant des grossès gotes ki toumént dins l' påsse.
Asteure, les boledjîs ont des prustins mecanikes, ki travayèt l' påsse pus erîlêymint ki dvant, et sins må. I gn a k’ a vudî l' farene, l' aiwe, li sé et li lveure. Li machene fwait l' resse.
I gn a minme des abeyes prustins ki prustixhèt so dijh munutes, adon ki dvant, i faleut ene grosse dimeye eure. Ces prustins la tournèt pus vite et avou les cråxhes k’ on mete, li pwin est pu houf (mî rlevé, si on vout) et i dmeure pus doûs. Ça n' vout nén dire k’ i våt mî.
Divant l' guere di 40, dj’ a veu on vî boledjî aler a velo po poirter l’ pwin ås hamteas metous foû do viyaedje (ecårts). Il aveut les pwins dins on saetch so s’ dos. Dj' end a veyou ossy poirter les pwins dins ene tcherete å bresse. Ubén avou ene tcherete å tchén, come li boledjreye Leroy a Bouyon, et ça, co après l' guere di 40. Après ça, on a fwait les tournêyes avou ene cariole å tchvå, k’ esteut ekipêye shuvant, pu avou on tripoirteu ås pedales. Al fén, avou des otos et des camionetes.
Les boledjîs vindént ossu del leveure, del farene et on pô des gozetes. Les pwins n’ estént nén côpés, ni ratoirtchîs come enute, et gn aveut nolu ki s’ è plindeut.
Asteure, i lzî fåt des beas saetchots avou l’ pwès dsu. Li pwin doet-z esse côpé. Il è fåt do blanc po onk, do dmey gris po l’ ôte et do noer po l’ troejhinme.
Tot ça fwait k’ on paye des ptits pwins d’ 800 grames a 50, 60 francs, al plaece do 7 francs 50 po on kilo après l' guere. Li frumint, lu, so ç’ tins la, a dmoré å minme pris. I gn a åk ki m' va pus.
C’ est on pô po ça k' i gn a bråmint des djins k' atchtèt des machenes å pwin electronikes, ki fjhèt ttafwait. I gn a k’ a-z î mete çou k' i fåt, et troes eures après, le pwin est cût, sins î awè metou l' mwin.
Kî ki n’ si sovént nén do pwin d’ adon, les timbes do ravitaymint, les tîketes di farene avou les grus, padecôp avou do souke cristalijhî, cwand ci n’ ere nén des féves u des poes molous.
Comint rovyî les carnassires k’ on fjheut cwand les sweles avént djermé, li purêye di canadas po-z alondjî l' påsse, li lewin ki sinteut l’ seur, li pwin ki filéve ås canicules ? Ey e 44, li blanc pwin des Amerikins, pu blanc k’ del nive et houf come del schome.
Po nozôtes, li blanc pwin n’ est nén rvinou do djoû å londmwin. Li ravitaymint a co duré on boket. A ç’ moumint la, les cinsîs metént leu farene å boledjî ki lzî fjheut leu pwin a pårt, paski leu farene ere pus blanke ki l’ ôte. I vlént don rawè leu farene. Mins, cwand l’ blanc pwin a rivnou, adon, leu farene ere pu grijhe et i vlént rawè do blanc pwin.
Al fén, les boledjîs ont-st aresté d’ prinde li farene des cinsîs et tolmonde a mindjî do blanc pwin, cwand ci n’ ere nén do « ramidré » (amélioré).
Et 50 ans après, on rest å grijh et å noer. On n' sait pus cwè rever !
Dispu kékes anêyes, on mindje moens di pwin. I gn a des restorants tocosté, des mess, des cantenes dins les scoles, dins les grands buros et les grands magazins. Bråmint des femes travayèt foû del måjhon. Les efants sont dins les creches u a scole et tot ç’ monde la vike di consieves et di des ôtes afwaires aprestêyes d’ avance. Les gazetes di comeres ni cåzèt ki d’ redjime. Les medcéns, c’ est parey. Ça fwait ki l’ pwin a divnou l’ parint pôve.
Portant, c’ est l’ pwin, nosse vicaedje ! Dins les anêyes passêyes, toutchî å pris do pwin, c’ esteut on crime eneviè l’ ovrî ki purdeut l' malete. Et si on rmontéve li pwin, les gazetes fijhént on herleme di tos les diåles.
Mins, ç’ tins la est houte ! Et ça n’ va nén mî po ça !
Tecse prezinté li 6 di may 1996 al Soce des rcåzeus d' Årdene nonnrece, pu publiyî dins l' « Coutcouloudjoû » l° 11.