Dji cnoxhe ene bele viye voye ki dschind e nosse viyaedje,
Inte ses hourêyes d' edjåjhe et ses ctoirtchîs bouxhons.
C' est m' viye voye di scolî, k' a todi l' minme vizaedje,
Ene voye do bon vî tins, bele a totes les såjhons.
Cwand l' solo å prétins fwait craker les botons,
Ele si rnipe tot d' on côp d' on bea mantea d' verdeure,
C' est on novea tapis, des guirlantes, des festons
A kî novele samwinne apoite novele coleur.
Li viye så båjhe si tiesse padzeu l' basse ås maclotes,
Melant ses foyes d' årdjint avou l' tijhe des rozeas
Ene bele corante rampioûle si rôle so l' grijhe pelote,
Et pind ses djaenes boukets å dvins des verts coxheas.
C' est les såvadjes rôzîs avou leus verts pompons,
Les ronxhes, les spenes, les hoûs, les sawous, les noejhîs,
Eyet l' grand bossou frinne, tot ravôtyî d' houbion,
Catchant dzo si spexheur, ene covêye di måvis.
C' est les ptitès petchales, les meures et les noejhetes,
Li noere troke do sawou ki hosse come on pindou,
Les heupons, les poes d' hoûs, ki leus rodjès trocletes,
Spitèt les vetès foyes di leus gotletes di sonk.
Et pu, c' est l' taeyante bijhe k' ashofele li nivaye,
C' est les longuès glissådes, les cawêyes di scleyons,
Li fene cresse d' ene consire inte les stos del viye håye,
Plaijhis di totes les ådjes, djoyes a totes les såjhons.
Wårdans les viyès voyes ki sont dvins nos viyaedjes.
Wårdans leus xhoûlés strouks et leus ctoirtchîs bouxhons.
Respectans les covêyes ki crexhèt a l' ombraedje,
So l' coxhe d' on bossou frinne, dzo des riyots d' houbion.
Note Wikisourd
eplaidî e 2007 sol Wikipedia walon
Li modêye Feller est eplaideye so Berdelaedje avou l' åjhmince da Jean-Pierre Dumont, k' a yeu les tecses del famile do scrijheu, et ls eredjistrer dit pa ene djin d' Hu. Els aveut aprume eplaidî so Wikipedia:Pordjet_antolodjeye_des_scrijheus_e_walon_do_Payis_d'_Hu mins k' a disparexhou des waibes. Li djivêye des scrijheus di l' antolodjeye esteut vaici http://home.scarlet.be/dumont_litterature_wallonne/liste_auteurs.html