Ene djonne comere k’ aveut dabôrd trinte ans
S’ åreut bén vlou maryî mais n’ aveut pont d’ galant.
Les beas rubans, les crinolenes,
Les ptits côps d’ ouy, les doûcès menes,
Ele sayive tot po-z atirer
L’ moxhon dins ses filets,
Mais pont n’ î vneut.[1]
A l’ fén ele si decide po on grand perlinaedje[2]
Et vo l’ la a voyaedje.
Arivêye a l’ eglijhe, ele s’ adjnole a l’ åté
ou çki l’ Viedje si trovéve.[3]
Li Ptit Djezus aveut ene tiesse
Ki barlokéve et ki tournéve
Cwand l’ vint shofléve
On pô foirt pa l’ finiesse.
Après awè fini
Do bén priyî,[4]
Ele dimande a l’ Sinte Viedje. « Endon, mi binamêye,
K’ a l’ fén di çt anêye ci, dji serè seur marieye ?[5]
Li Ptit Djezus fwait sene « neni ».
« Taijhoz vos, dit-st ele, pitit målapris,
« Leyîz cåzer vosse mere.
« Vos estoz co trop djonne po responde a m’ priyire. »[6]
Pî-notes