I
Li rétjimint dès tchiâs
Vint d’passer so l’contrèye,
Gâre à l’ pèsse, à cholèrâ
A totes lès maladèyes…
Ca, d’vins totes lès cwènes,
On stope si narène,
Tél’mint qu’ n’a rin d’pus flêrant (bis)
Qu’on croté cou d’Al’mand !
II
Dji v’ dimande cint fèyes pardon
Di scrîre leû calin’rèye,
Et d’ fé chèrvi nosse walon,
A dès afêres parèyes…
I fât qu’ è l’istwère,
On raconte leû glwère,
I fât qui nos p’tits èfants (bis)
K’nohèsse cès baligands !
III
Li pruchin, parèt mès djins,
C’èst-st-on gros Kaiserliche,
Qui beût , qui magne, qui tchèye bin,
Qu’ a sovint dès coliques,
Si fêt ‘n’ hâlte so l’ vôye
C’èst dès hôtès môyes,
Qui v’s-èmantchèye à s’ façon (bis)
Et qu’ sont todis d’ aplomb !
IV
I fât sûr aveûr ma fwè,
Po fé dès môyes parèyes,
On gros lâdje cou à soflèt,
Ine fameûse tchiminèye…
Dès boyês, dès tripes
Rimplis d’rôses d’Edjipe,
On n’ veût nin sovint dès s’fêts (bis)
Qui d’vins lès crâs-pourcês !
V
Tos cès magneûs d’pan–payard
Po-z-ècrâhî leû panse,
Nos hapît poyes, djambon, lard,
On n’ vèyéve mây leûs çans’…
Pans’lous come dès foques
Todis l’pipe è l’ boque,
Divins nos mohones, is intrît (bis)
Come dès mêsses sins bouhî !
VI
Li pruchin tchèye tant qu’i vout
Come dji plind leû cou d’ tchâse…
L’èst vrèye qu’i magne tant qu’i pout
Et s’a-t-i todis hâse…
C’èst-st-on gros bomèle
Qui sowe, qui sofèle,
Et qu’ n’ èst djamây si contint (bis)
Qui qwand il èst plin d’vin !
VII
Avou leû vinte à soflèt
Et leû stoumac’ di vatche,
Is magnèt come dès cossèts
Qui sont tofèr al batche…
S’ on l’zî done à beure
Is passèt l’ mèsseure.
Vât mî tchèrdji qui d’ rimpli (bis)
Tos cès gros fwért nouris.
VIII
Li pruchin tchèye tot costé
Dusqu’à d’vins lès pots d’ bourre,
D’vins lès linçous, so lès léts…
C’èst çoula, leû « coultoure ».
C’èst-st-ine rik’nohance,
Et come ine qwitance,
Qui chève à payî lès djins (bis)
Qu’ èl’zî d’nèt on lodj’mint !
IX
S’ is ont hanète di torê
Ossi rodje qu’ine crèssôde,
C’n’èst nin à beure dè lèscê
Nin à magni dèl vôte…
C’èst l’ bire èt l’ bourgogne
Qui fêt l’ glèter l’trogne
Di tos cès gros rodjes bassîs (bis)
Qui n’tûsèt qu’à magni…
X
Après on bon crâs soper
Ine fèye, qu’is sont pompètes,
Is daborèt…sins s’ djinner
Tos lès plats, lès assiètes…
Oh ! Quéle mâle indjince,
Cès flêrants potinces,
Qui v’nèt nos èpufkiner,
Avou leûs mâssistés !
XI
Ine fèye qu’is sont bin r’pahou,
C’èst-st-ine manîre à zèls,
Di v’ payi avou leû cou…
C’èst çoula leû dringuèle.
L’ôte djoû l’ vèye Babète
Touma mitan mwète,
Tot trovant divins s’ridant (bis)
Ine flêrante môye d’Al’mand !
XII
Zèls qui s’ dihèt lès prumîs
Po l’éduc’ èt l’ siyince,
Afêre di beure èt d’magni,
Is ont co l’compétince…
Mins po fé ‘n’ grosse mèrte,
Divins leû chèrviète,
Après on bon crâs magn’hon (bis)
Is ont todi l’ pompon !
XIII
I nos fârèt bin broûler
Leûs linçous, leûs payasses…
I lès ont tél’mint d’hité…
Qu’ sont div’nous tot vèrdasses…
Oh ! Come dji sohête
Qu’ is batèsse èn r’trête.
Et qu’is sèyèsse porsûvous (bis)
Avou l’ pêlète â cou !
XIV
I fât qu’on s’ sovinsse todi
Di totes leû pourcêrèye.
Qu’on lès r’tchôque è leû payis
Avou ‘n’ fameûse raclèye…
I fât qu’ po ‘n’ hapèye,
Divins nosse contrèye,
On lome tos cès gros pansâs (bis)
L’ rétjimint dès tchiâs !