Li plâje dès Nâcions

Èn årtike di Wikisource.
Ciste ouve ci egzistêye eto divins ds ôtès ortografeyes : Rifondou.
Li plâje dès Nâcions

Li plâje dès Nâcions

Djulèt’ 1969. Djans-z-è au Maroc !

Dj’éve télemint tanè les parints po fè on djoû on bè grand voyadje qui l’avanture tokéve à nos uches.

Li vî Peugeot 404 nos ratindéve dins l’garadge, plin.ne come on ou : li tente prustée pa l’cosin Mèdârd è tos les agayons qui vont avou ! Mi mère estéve su dès tchôdès breûjes !

« D’jai fè do l’résistance en 40, dji pwartéve les lètes ô maquisards dins les bwès, catchées dins m’cwârsadje ! »

Ostant dire qu’èle n’éve peu d’rin. Li père, li, y rwètéve à deûs côps !

À Dgivet… patatra ! Li vwèture di James Bond (c’è s’tinsi qui l’père li loméve) n’è pléve pus haye… deûs 00 sins l’7. Boum, boum, boum su l’voye… trop tcherdjée !

« Dji mè va à Tamines mon Roméo » disti papa « Il a on r’méde po tos les maûs ! ». Avou les « autoballans », (on ptit balon qu’on gonflève dins les amortiseûrs po les fè r’djipè) li Maroc nos brèyéve après.

« Nos alans trèvautchè l’Espagne en chêbiant » disti l’père « sins fè l’carrè l’hypoténûse »… jusse po dîre qu’il estéve profèsseûr !

Dès km sins véye li cawe d’on tchè, jusse des fameûs panaus avou des grands nwârs torès. Di timps en timps, on ptit viladje, one botike po-z-achtè à mougnè…

« Bélgica ! » « Ah, Eddy Merckx, Fabiola ! ». Eddy Merckx qui fiéve one saqwè d’râre dins s’premî Toû d’France qui nos choûtins su l’fréquence « Radio 007 Alfred » èt Fabiola po one ôte saqwè d’râre : li cisse d’avère mâriè nos rwè !

Camping sauvadje èt, pas des côps, des djins d’on viladje arivint d’nul paû, min.me on cul d’jate su s’plantche à raulètes. Vos’aurîs vèyu come i choréve rin qu’avou ses pougns ! Des bèljes au mitan d’leus tchamps… i n’faléve nin ratè ça !

Li diagonale estève tote chalée paski nos arivins dins l’Sierra Nevada.

« Maria dei, qu’est c’qui c’est qu’ça ! » distèle Jeannine (nosse mame), « Nos vla dins on western asteûre ! I n’manke pus qui l’rivolver Lefaucheux do Capitin.ne Mostenne ! ». (c’ est m’ mononke-tauye, k’ esteut capitin.ne di l’ârmêye, et ki nos a leyî s’ revolver).

Algésiras, enfin, mais li mère ni fiéve pon d’bin…

« Totes ces autos-la vont rintrè dins l’batè Alfred ? Nos n’alans nin coulè ? »

« Il est trop taûrd po fè d’mi tour Jeannine, nos vièrans bin ! »

Mon dieu todi, prèmî côps qu’on rintréve dins on grande laîde afaîre come ça !

En plin.ne mér, one pitite grosse fème fiéve alè les brès di tos les costès… nos’ Jeannine.

« Joselyne, Alfred, dès daufins, vinoz véye insi ! »

Joselyne ni veyève rin, èle estéve malaude, si tchièse tournéve com su on molin dol dicause di Yon èt Alfred qui ève rimetu quèréve après si stoumac sul pont ! Quéne paskéye !

Nos arivins à Tanger, tote blanke come li père èt s’feye, mais sins ’nn’ alé ô fond… Nos èstins chapès !

Al nèt : one plâje do costè d’Rabat. Nin on tchin, pon djins, li mér fwârt agitée, c’èst l’vrai mais télmint bèle èt vikante avou ses wagues qui rson.nint à do l’ lin.ne di bèrbis…

« Nos alans nos instalè vèci po nos r’mète do l’trèvautchadje d’ l’Èspagne » disti l’pére « Nos avans eu tchôd come dins on for, nos alans soflè ! »

Soflè ? Nin co. Dispiertès dol nèt pa on bru d’èwe teribe ! Li « Cascade di Coo » à costè d’ça ? One biestrîye !

Jeannine cimince à bwèrlè en vèyant l’èwe à ses pîds…

« Li lampe di poche, d’où ès-t-èle non di djo ? Ah, vo l’ la ! »

On meur d’èwe, des wagues ôssi ôtes qui l’èglije di Yon. Abîye, tot baquè foû èvoye èt rculè vite faît li pus’ posibe ! Qué bastringue !

« Awans l’ouy su l’mér po qu’èle ni nos féye pus dismantchè nos afêres co on côp… » disti Alfred.

Li londmwin au matin, nos avins des vèjins ! Nos’ tièsse qui nos djouwéve dès quintes, on mirâje ? Non.na ! One tente berbère, on ome avou ses deûs fèmes, leû tapis, leû pês d’gades, leû cokmwârs èt tot l’bataclan.

Po l’premî côp, nos nos bagnins (si on pou dîre) dins l’Atlantique èt les meurs d’éwe qui rtoumint su nos’ dos èpwartint avou zè nos mayots !

Li pus djon.ne des fèmes do vèjin aléve à l’éwe en djellaba mais, treu djoûs après… èle estéve en bikini, on nwâr come li min.ne ! Adon, nos éstins causu des jumèles èt nos n’s-avans bin ètindu… Télemint clapant d’potchè dins les wagues à deûs en s’donant l’mwin èt en chachelant !

On pècheu passéve di timps in timps avous des mosses à vinde. Nos n’avins jamaîs vèyu ça ! Si grosses qui avou one dimeye dozène, nos estins calès ! Miliârd, fwârt salées ossi èt nos vèjins l’sèpint bin… I ratindint nos’ dérin.ne bètchîye po abouler avou leu té.

On fiève one vôye au d’zeu dol plâje… Li rèsponsâbe do chantier, on vî ome avou one grande blanke baube, choyeûve si crosse è l’aîr èt bwèrléve come on boû su ses omes tot au lon do djoû !

« C’est l’momint, ça va ièsse deur dè ‘nn’alè ! » disti l’pére.

Li vôye n’éstève nin co faîte… I faléve dire a r’véye à l’plâje dès Nâcions, aus vèjins èt leus’ agayons…

Èvoye po Casablanca, Fès èt ses souks télemint vikants èt télemint streûts. Nos d’vins wètè à ‘nn’in ièsse cobrôtchîs su les meurs pa les baudèts ! N’-z-estins oblidjîs di nos mète su l’costè po les leyi passè avou leû tchèdje.

Meknès, les rwines romin.nes à Volubilis, les bosses do Rif èt leûs ptitès voyes qui catoûrnint èt racatoûrnint, les grands tchapès aus bleus pompons des payisans. Li vî autobus, les bagadjes èt les pouyes su l’tèt, one gate qui passéve si tchèsse pa l’fignèsse do costè èt qui nos rwaîtéve en djant : « Mêêê, ces Bèljes-là i-nn’ont po on momint à nos sîre ! ».

Les biatés do Maroc, les bruts, les coleurs, les odeurs, li zûnetadje des souks, les tchèrètes à baudèts, les djins télemint rivenants sont s’t-à jamais gravès.