Li pèheû
Reû come ine bèye, si vèdje è s' min,
i pèhe, — mins 'nnè rîrè bèrwète
ou tot-a hipe avou 'ne åblète :
on lî d'vreût dire dè rim'ni d'min !
I s' tint la dispôy å matin :
troûv'reût-on bin 'ne bièsse pus hayète ?
Reû come ine bèye, si vèdje è s' min,
i pèhe, — mins 'nnè rîrè bèrwète…
Li pèhon, c'èst bin trop malin !
A s' viér i n' betch'rè nin 'ne miyète.
Noste ome lî pout fé dès clignètes :
i d'meûr'rè la — èt n' hap'rè rin —
reû come ine bèye, si vèdje è s' min.
Note Wikisourd
Dins « Åbions al pene », riprins dins « Li pan dè Bon Diu » (Recueil complet des poèmes wallons de Henri Simon, coleccion « Nos dialectes » l° 4, Vaillant-Carmanne, Lidje, 1935, p. 43, pu co rprins dins « Petite anthologie liégeoise » da Maurice Delbouille, 1950.