E l’ paroeze do fond, a gåtche : ene finiesse ; al finiesse on banc d’ graveu, usteyes, visses, gravaedjes, etc… Al minme paroeze, e mitan : li fornea, ene sitouve. E l’ minme paroeze eco, a droete do fornea : ene poite dinnant e l’ rowe. Sol fornea : on Crisse, deus tchandlés etc… A l’ paroeze di gåtche, prumî plan : èn årmå d’ blanc-boes. A l’ minme paroeze, inte l’ årmå et l’ banc, on poite-mantea. A l’ paroeze di droete, deujhinme plan : ene poite. A droete prumî plan : ene tåve sol kéne Dadite ristind del bouwêye ; a costé del tåve ene banse. — Å lever del toele, Porea overe, les rins tournés viè l’ publik ; Dadite ristind ; Gårnir, ashiou a cavaye so ene tcheyire, les rins å feu, sitope si pupe.
On est l’ semdi al nute.
Awè valet, les martchands rapticixhèt todi l’ pris des ovraedjes, djel voe mî tos les djoûs.
Tinez, dji n’ vis el fwait nén croere, i rapticixhèt télmint edon, ki vocial des escôsswesses — vos savez çou k’ c’ est — et bén nos avans asteure on dmey franc del pwaire po les fé et dji m’ rapele ki cwand dj’ aprindéve mi mestî amon Raymond, les minmes ovraedjes estît payîs disk’ a des deus francs et dmeye et des troes francs.
Awè, c’ esteut di ç’ tins la k’ on fjhéve tant des musketes. Dj’ ovréve å feu d’ bwès adon, ci n’ est k’ après ki dj’ a-st apris l’ monteu, bén dji m’ sovén ki ces musketes la c’ esteut les meyeus ovraedjes k’ on åreut polou trover. Contez on pô valet, ki mi ki n’ a måy portant stou des pus abeyes, dji wangnive des set et des ût francs par djoû.
Ces anêyes la sont houte et ele ni rvénront pus fré Pire. L’ ovrî, ouy, po wangnî amermint s’ boket d’ pan doet s’ assoti tot, coir et åme et nos trîmrans-st insi tant k’ nos nde ralanxhe.
Portant s’ on esteut ritche, ene sakî såreut bén s’ dinner do bon tins ossu savez ! on overe, mins on n’ î tént nén tant k’ çoula, c’ est come li tchén ki stronne, c’ est k’ i fåt bén.
Vos inmez mî l’ ovraedje k’ est fwait ki l’ ci k’ est a fé paret vos, Gårnir.
O ! dj n’ a nén sogne di l’ ovraedje savez !
Neni, nos l’ savans bén, vos vs coûtchîz dsu.
Lambert, dji n’ sai vormint çou k’ vosse feme a tofer disconte di mi, mins co måy ele ni lait passer ene ocåzion di m’ taper des atotes.
Dadite a todi stou insi, elle inme bén do rire.
Do rire des ôtes. Mins, couyonez l’ on pô po vey kimint k’ ele prindrè l’ afwaire.
Estoz vs måva la k’ dji vs direu vos vraiyes !
Måva ! neni savoz. Dji n’ prind djamåy les poennes di m’ måvler avou les femes. On-z åreut bele a fé !
Oho !
Awè ! dji n’ mi vout nén fé mori dvant m’ tins a m’ tchagriner et m’ fé do måva sonk po vozôtes dê mi. Cwand m’ feme barbote, djel lai dire et çoula tome co beacôp pus vite. (alant viè Porea) Paski, ti m’ pous bén croere saiss Lambert, les femes hin valet, cwand c’ est k’ on est biesse assez di les aconter paret, bén ele si creyèt al vole des rinnes et ele vôrît bouter tot l’ monde dji sai bén wice…
End avoz vs co po do tins a djåzer insi ?
Tén don ! Ci n’ est nén por vos ki dj’ djåze savez kécfeye !
Vosse pôve feme endè doet bén vey alez avou èn apôte come vos !
Tonton ! k’ est elle awureuse avou mi ! Dimandez lyi ene gote.
Assuré ki l’ feme ni va nén raconter ses poennes et ses mizeres a tot l’ monde edon !
Tonton m’ kinoxhe bén, ele barbote cwand elle est d’ måle oumeur — çoula arive a tot l’ monde et a vos pus sovint k’ a tote ôte — (so on côp d’ ouy da Dadite) O ! dj’ a del’ frankisté ; dji n’ vis l’ evoye nén dire, c’ est po çoula k’ nos nos veyans si voltî nos deus… edon Dadite !
Dji n’ fwai pus atincion a tos vos boignes messaedjes, leyîz m’ påjhûle.
Vos n’ fjhez pus atincion et vs m’ avez torade hiné on côp d’ ouy a m’ trawer houte et houte si c’ esteut ene epêye !
Vos sondjîz alez, vos sondjîz ; dji n’ prind nén les poennes di vs hiner des côps d’ ouy !
Dji l’ a portant bén veyou, mins djans, po n’ nén vs contraryî, metans ki dj’ n’ a rén dit. (i prind l’ plate botaye sol banc) Savoz vs bén cwè, po fé l’ påye nos deus : tinoz vola li ptite plate, alez s’ nos cweri po dijh çanses, nos boerans bén l’ gote avou Lambert.
Dji n’ va nén cweri do peket, mes fiers sont sol feu, i m’ fåt fini m’ bouwêye.
Tinoz, dji so bén bon edon, dji m’ va rescouler vos fiers. Et dji m’ va mete ci cial tchåfer, i seront tertos tchôd cwand vos rinterroz.
Bodjîz vs djans, bodjîz vs. Lambert ni boet nén l’ gote so l’ ovraedje.
Siya, ouy, dji boereu bén ene pitite si dj’ l’ aveu. Dj’ a l’ gozî tot setch.
Aha ! vos veyoz bén edon ! Tinoz vola l’ botaye et vola les dijh çanses. Alez m’ feye, alez ! Dimandez do bon et et k’ on vs mete bén vosse conte savoz ! (i ricdût Dadite disk’ a sol soû) Dijhoz k’ c’ est po on malåde… Dimandez des belès trintches !
(Do tins di ces dierinnès paroles, Dadite a bodjî s’ vî vantrin et metou on prôpe k’ esteut pindou a on clå a droete.)
Dj’ a si bon del fé assoti dê ! Et cwand ele si måvele dj’ a co meyeu. Ele s’ emonte, ele s’ emonte come ene sope å laecea…
Tel fwais todi tourminter.
I fåt bén k’ dji fwaixhe çou k’ ti n’ oize fé !
Dj’ inme mî l’ trankilité, mi Pierre, et pus vite ki di m’ disputer…
Vos inmez mî di vs taire et do dner tofer råjhon a vosse feme. Ci n’ sereut nén mi paret !
Pa vos djhîz torade ki vos leyîz barboter Tonton sins l’ responde.
Paski dji sés bén k’ elle assotixhe co pus cwand dji n’ l’ aconte nén ! Mins i n’ fåreut nén k’ elle rotaxhe so mes pîs savoz, paski (tchantant) je lui toiche la tiesse, tout comme à un colon, tout comme à un colon ! (pårlant) Oho, a propôs d’ colons, Lambert, dji m’ va ouy mete mi djonne…
Ké djonne ?
Pa m’ djonne bleu, ki dj’ a saetchî foû del frumele ki Djôzef m’ a dné ! Ene boune sôre valet, on colon k’ a fwait totes les tapes l’ anêye passêye et k’ a tofer rivnou dvins les pris, — l’ ass rovyî ?
Neni, neni, on bleu, dji m’ è sovén !
C’ est tot çou k’ i gn a d’ meyeu valet, dji cnoxhe tot plin des colebeus ki fjhît-st assoti m’ cuzén Djôzef et ki lyi årît dné gros po nd aveur ene cope d’ oûs.
T’ aveut-st i dné des oûs ou on djonne ?
I m’ aveut dné ene cope d’ oûs ; mins i n’ a k’ onk k’ åye reyussi. Et djel saye ouy paret valet, nos alans vey s’ i va ravizer s’ pere !
Les pris sont i foirt ?
Céncwante francs l’ prumî, c’ est on bot d’ djonnes.
Awè. Infén, dji t’ sohaite les céncwante francs.
O ! valet, s’ i n’ rivént nén dvins les pris, djel magne. Paski on colon d’ sôre, veyoz vs, i s’ distingrè do prumî abôrd, sinon, on l’ pout bén mete el paile, ci n’ serè måy rén d’ lu !
Awè ?
Tén don, ni l’ a dj’ dju nén bén veyou avou m’ cuzén Djôzef, co traze feyes ! Vola onk k’ a des bons colons !
(Dadite rintere, mete li botaye sol djivå, candje di vantrin et continowe à ristinde.)
On l’ dit tot costé todi.
On l’ pout bén dire ossu, li colebire di m’ cuzén c’ est seur li meyeuse k’ i n’ åye di lådje et d’ lon !
Waye, vos l’ cial vinou so ses colons asteure ! Seur k’ i n’ est nén co evoye !
Savoz vs bén ki Djôzef a dedja vindou ene cope d’ oûs, des oûs savoz, cwarante et céncwante francs !
Oho !
C’ est onk ki wangne des çanses, valet, avou ses colons, ci-la ! — Tén ! Dadite est rintrêye ! Et vos n’ dijhoz rén, vos Dadite ?
Dji n’ so nén si ptite surmint ki po n’ nén s’ aporçure di mi cwand dji so cial ! Il est vraiy ki cwand vos djåzez d’ colons, vos n’ oyoz pus rén et vos n’ veyoz pus personne !
Alez vs mi kerler so mes colons asteure ?
K’ a dj’ dju d’ keure di vos colons don mi !
Et mi, k’ a dju d’ keure di vos, don mi ! (si rapåjhtant) Djans, ci n’ est nén tot çoula : wice est ele nosse plate ?
Vo l’ la sol djivå.
Veyoz vs, Lambert, kéne metchansté ; vosse feme ki mete li gote sol djivå po ki l’ peket s’ estchåfe. Et vos m’ vénrîz dire ki les femes ont-st ene sacwè d’ bon dvins zeles paret. Tinoz, (riyant) ci n’ est nén po rire ki djel di : dji vôreu k’ on pindaxhe li dierinne feme e li tchminêye et k’ ci sereut mi k’ sereut tcherdjî del pinde… Alez, dji vs respond k’ on n’ voereut måy pus nole. — Djans Dadite, dinnez nos deus veres,
Loukîz sol poyire del finiesse, i doet nd aveur onk.
Awè, tén, vocial onk.
On boket. C’ est todi bon va.
(tchantant) Quand on n’a pas ce que l’on aime
Il faut aimer ce que l’on a.
C’ est po çoula ki dj’ voe voltî Tonton. Alans Lambert, on ptit tchiket valet.
Après vos, boevoz todi.
A vosse santé. (après aveur beu) Il est co frisse mågré Dadite. (dinant l’ gote a Porea) S’il vous plait, monseigneur.
Santus.
Hin k’ il est frisse ?
Awè.
Nos nd irans nén so ene djambe.
Nos nd irîs-st e coisse.
Vos m’ vénrîz torade fé croere ki cwand vos hossîz vos n’ avoz beu k’ ene gote.
Nonna ; c’ est k’ nos avans beu ene di trop ou ene di trop pô !
Ene di trop alez.
Ene di trop pô, pinse dju ; paski c’ est come li tchanson paret mi Dadite.
Dj’ inme bén do boere on ptit hûfion
Et cwand on m’ sieve li gote,
Dji n’ fwai djamåy beacôp d’ façon
Et cwand dj’ sint k’ dji halcote,
Sol côp, sins tårdjî
Et sins m’ fé priyî
Dji rboe co sacwants dmeys
Ca po roter droet
Creyez m’ i fåreut
Todi vudî l’ boteye. (ter)
(vudant) A vosse santé Lambert, metans nosse moråle a profit, nel leyans nén s’ estchåfer. (i boevèt)
Si vosse feme ni loucaxhe nén a ses çanses, vos ndè boerîz alez vos !
Mi feme ni tént nén l’ boûsse savoz e l’ måjhone ! C’ est mi !
Nos savans bén k’ ele n’ a rén a dire.
Siya, ele pout dire tot çou k’ ele vout… cwand dji n’ so nén la ; et cwand dj’ î so, dji vs l’ a dit : dji n’ l’ aconte nén et tot kî poite li pantalon divreut djåzer come mi.
Savez vs bén ki personne cial n’ a mezåjhe di vos conseys, Gårnir !
Dji m’ è dote bén ! Lambert n’ a surmint nén mezåjhe d’ esse escolé po esse mwaisse e s’ måjhone. (loucant Dadite) Hey, binamêye Dadite, kéne oumeur ki vos avoz co ! Djans, fjhoz l’ on pô pus bele et vindoz l’ on pô pus tchir !
Dji fwai l’ oumeur ki m’ convént… Et si çoula n’ vis va nén…
La grande porte m’est toute large ouverte a deux battants edon ? Awè ! Ô ! dji sais bén k’ vos inmez mî mes talons k’ mes betchetes… et c’ est po çoula minme ki dji n’ sereu måy foû d’ cial… Dj’ inme tant di vs fé n’ gote assoti dê !
Dji fwai bén pô atincion a vos.
Vos l’ dijhoz !
Et djel pinse.
Leyîz pinser les beguenes elle ont mî l’ tins k’ vos.
Infén ! Vola mi ovraedje fini. Dji m’ va rmete tot çoucial a pont.
Dadite, vos nd alez ! Adon dji m’ endè va ossu. C’ est por vos k’ dji dmonéve !
Vos deus ! vos vs apougnrez on djoû.
Neni, dji n’ mi vôreu nén bate avou Dadite, dj’ åreu li dzo.
C’ est bon des djins come vos ki s’ batèt.
C’est sûr, madame Porai, des genses comme vous ne poulet mal dè s’faire rêmarquer. Vous n’êtes pas si peu d’chose què ça. Sè batte, c’est bon pour les p’titès genses, les crapuleux, les rien n’vaut ; on sait bien tout avâ l’Vinâve que vous êtes trop grandiveûse pour vous disputer sur la pavée !
Dji cour evoye dji n’ vis såreu oyî pus lontins…
Dji n’ sai vormint kimint k’ vosse feme ni m’ a nén co tapé a l’ ouxh.
Vos iroz seur on djoû !
Nonna, ele ni pout må, i fåreut k’ ele si dispitaxhe, et ci sereut fé come les ptitès djins. Dadite est trop comifåt po çoula. (candjant d’ ton) Ki vou dj’ dju dire, a-t on cåzu fini ?
Dj’ a co kékès cretes a fé.
Pocwè n’ prinss nén èn aprindisse don po fé çoula. I t’ aidreut todi !
Dj’ end a-st avou. Dji n’ a måy polou wårder nouk.
Dis pus vite ki Dadite les ctchessive.
O ! c’ est insi. Ca vormint, leye, i n’ a des djoûs k’ ele mi freut bén potchî foû d’ mes clicotes, télmint k’ elle est biesse !
Bén, inte di nos deus, kî conte-t ele esse paret t’ feme ?
Ki sai dj’ don mi ! Li feye do rwè bén seur !
Portant dji m’ rapele co, ki cwand vos hantîz, c’ esteut ene pitite bouwresse, ou ristindresse don, dji n’ sai pus å djusse.
Ene ristindresse ! Elle wangnive des çanses savoz !
Awè dj’ sai bén. Et mågré çoula, si vite k’ elle a stou marieye elle s’ a dxhombré do leyî la l’ mestî,
C’ est on pô di m’ fåte çoula.
On est bén biesse hin, cwand on est djonne maryî.
L’ amour, hin valet.
Oyi. (tchantant) C’ est l’ amour l’ amour l’ amour
Ki fwait des boûketes å Pont ds Åtches.
Dji m’ endè va disk’ a pus tård. (rivnant so ses pas) I n’ a pus rén e nosse plate hin ? (i louke) Non, pus personne. — Disk’ a torade.
Awè Pierre. Arvey.
L’Amour est enfant de Bohême
Qui n’a jamais connu de loi etc…
Est i evoye li bea Gårnir ?
Dji n’ sai pocwè, mi, Dadite, ki vos vs dispitez tofer avou lu, savoz.
Est ç’ mi ki m’ dispite ! Po kî m’ prindoz vs don vos ! Vos riyoz surmint ! Mi, m’ dispiter aveu Monsieu Gårnir ! Ki n’ pou dj’ dju må !
Djans, vos vs kerlez todi eshonne, tchaeke feye k’ i vént cial.
O ! dji n’ vis catche nén do dire ki djel hai çoula ! Dj’ inme mî ses talons k’ ses betchetes, dji l’ a dit torade a lu-minme.
Bén pocwè paret, Pierre est on bon valet. C’ est bon k’ vos avoz ene pike disconte di lu !
C’ est ça, tinoz avou lu ! Vos froz hasse et roy !
Dji n’ vou nén tni avou lu, mins dji vôreus bén ki vos lyi fjhîxhe on pô pus d’ akeuy cwand i vént cial…
I n’ a nou risse !
Vos fjhoz tofer ene mene cwand il est cial…
Ô ! dji n’ såreu fé d’ ôte !
… Et tot avå l’ Vinåve wice ki çoula n’ manke nén d’ esse repeté, on dit k’ vos estoz-st ene grandiveuse, ki vos n’ savoz kî k’ vos estoz, ki vs pinsez surmint ki personne ni vs våxhe…
C’ est bon, c’ est bon, dji n’ a d’ keure di çou k’ les djins pinsexhe.
Vos n’ avoz d’ keure di personne dê vos ! Mins cwand on n’ est nén ritche et k’ on vike di tot l’ monde, come nozôtes, edon båshele, bén i n’ fåt nén esse insi paret ! Vos savez bén, k’ a cåze di vos grandeurs, nos avans co pierdou l’ pratike di mon Lakaye ! Des djins ki nos fjhît tant ovrer, et asteure dji n’ fwai pus tant seulmint ene crete por zels. Et çoula cåze di vos tweletes a falbalas. Vos estîz pus gåye ki Madame Lakaye cwand c’ est k’ vos y alîz po toutchî vos çanses et, surmint k’ on s’ årè dit, ki, si vos polîz vs moussî insi, nos n’ divîs nén aveur beacôp mezåjhe d’ ovraedje et il ont fwait leus bons po ene ôte graveu. Vola çou k’ vos avoz wangnî. Et portant vos savez bén, k’ i n’ a måy trop di çanses cial edon. Torade l’ ivier va vni. I vs fårè co ene rôbe, on mantea, on tchapea… ou motoit ene pelisse tot come madame Fordjeu li rintire. Mins nos n’ estans nén des rintîs paret nozôtes, Dadite. Nos n’ estans k’ des ovrîs et vos l’ rovyîz on pô trop sovint, la !
Avoz vs cåzu fini do pretchî !
Ô ! dji sai bén k’ dji n’ wangnrè rin. C’ est tot côp d’ såbe e l’ aiwe. Li pleu est pris, c’ est di m’ fåte, et l’ åbe må tourné est trop vî po måy si rdressî.
Est ç’ li bea Gårnir ki vs a consyî di m’ fé ene sinne insi ? Cwand i vénrè co cial, dji lyi mosterrè l’ ouxh, ci-la ! (aporçuvant ki Porea n’ overe pus) Kimint don, el leyîz vs ouve ? Avoz vs fini vos escôsswesses ?
Awè dj’ a fini ; n’ est i nén tins, po on semdi al nute ?
Et bén, i n’ a nou må, dji va poleur on pô rnetyî. Avou les omes avå l’ måjhone on n’ pout rén fé d’ bon. (loucant al tere) Loukîz l’ bea Gårnir k’ a vnou taper les cindes di s’ pupe tot costé.
Dji m’ va ene gote rinetyî, savoz.
Awè, alez.
A dj’ dju on prôpe sårot ?
Gn a-t i on drap d’ mwin ?
Awè, awè.
Et d’ l’ aiwe po s’ laver ?
E tonea al gotire, vos l’ iroz bén cweri vos minme surmint !
Awè, awè, ni bodjîz nén, madame !
S’ on les leyive fé, i vs prindrîz po leu siervante dê, zels ! Ô ! les omes, ni m’ è pårlez nén !
Hey vola m’ fi !
Boune nute mame.
K’ estoz vs timprou don m’ fi !
Å buro tos mes desséns estént fwaits, dj’ a dmandé s’ i n’ aveut pus rén, on m’ a dit k’ dj’ end aveu fwait assez po
ouy, ki dj’ endè ralaxhe… et ma fwè dj’ a rivnou.On-z est todi ossu contin d’ vos insi, amon Baneur ?
Todi parey. On djåze minme di m’ diner ene ogmintåcion
Asteure !
Awè.
N’ est ç’ nén e moes d’ djulete di ciste anêye ki vs avoz co avou ene ?
Siya.
Et vos årîz co ene asteure ! Bon la m’ fi ! Albouneure. (tote fire) Do moens vos, vos n’ serez nén on ptit ovrî, come vosse pere ! On dessineu, c’ est èn ome comifåt ! Vos wangnîz dedja cint francs par moes ; vos parvénroz a nd aveur cint et céncwante. Et pu tos les ovraedjes ki vos poloz co fé après djournêye… Alans djans, merci l’ bon Diu, mes sohaits sont advinous et cwand dji mourrè, dji serè do moens rassurêye so vosse sôrt. I gn a co portant ene sacwè ki m’ tchagrene.
Vosse mariaedje, mi fi. Vos n’ håbitez nén a m’ manire des djins ki vs valèt. Vos estoz trop al boune môde, Emile ; èn ome come vos doet tni pus d’ lu k’ çoula.
Ô ! mame, c’ est esse foirt comifåt ki di n’ meprijhî personne.
Dji n’ vis di nén delzès meprijhî dê m’ fi. Mins, on n’ les håbite nén, on les lait po çou k’ i sont.
Di kî volez vs pårler ?
Di beacôp des cis k’ vos prindoz po camaerådes ; des ovrîs d’ mon Baneur ; vos rivnoz avou zels !…
Bén ki volez vs, on rvént del minme oujhene, on fwait l’ voye eshonne, ci n’ est nén po çou k’ dji so dessineu k’ i m’ fåreut fé l’ grandiveus edon.
Çoula c’ est des råjhons da vosse pere et si vos l’ prindoz po modele, vos n’ håbitroz måy ki des Pire Gårnir et tos djibîs del minme valeur.
Pire Gårnir est on bråve ome k’ acleve si
famile e-n oneur.Taijhîz vs don m’ fi, li feme c’ est des si ptitès djins dê, et si vos avîz cnoxhou ses parints come mi c’ esteut co bråmint pé !
O ! mame, i n’ fåt nén les blåmer po çoula ; si les djins ont parvinou a esse mî k’ leus vîs parints, ci n’ est ki d’ l’ oneur por zels.
O ! i n’ ont nén parvinou… i n’ sont todi k’ des ptits ovrîs, mins i vôrît bén l’ peter hôt. C’ est damadje k’ i n’ åront måy li toû. Les Gårnir serît minme ritches, coviets d’ ôr et d’ årdjint ki ci sereut todi zels. On tchet piede ses poyaedjes mins n’ piede nén ses manires.
Dji croe k’ vos n’ inmez nén ces djins la, mi mame !
O ! dji n’ les hai nén, mins dji n’ håbite voltî ki des djins a m’ convnance (meprijhante) et les Gårnir…
C’ est des trop ptitès djins, edon !
Dji n’ inme nén d’ les håbiter et dji dinreu gros po k’ i n’ vinaxhîxhe pus cial.
Djåzans on pô d’ ôte tchoi. Li soper est t i presse ?
Awè, vosse pere si rneteye, i va vni, nos magnrans tos eshonne.
Dj’ a ouy ene fwin d’ leu !
C’ est ene boune maladeye ; dji m’ va mete li tåve, puski c’ est insi. Dj’ a racomôdé l’ bouli avou ene gote des agnons. Est çki vs les inmez bén ?
Vos l’ savoz bén edon. Tant pus tant mî.
Ô ! end a tot plin.
L’ afwaire est boune insi.
Boune mame ! Elle a des grandès idêyes e l’ tiesse, mins ele ratchtêye bén çoula pa si bon cour. Elle est tote continne d’ aveur on soper ki m’ ragostêye ! (schoûtant) Tins, i m’ shonne k’ on vént do bouxhî a l’ ouxh. (i va viè l’ poite, on bouxhe) Intrez. (i va drovi, Meliye intere avou ene pitite banse di gravaedje)
Pout on bén intrer ?
Sint-Pire a les clés.
C’ est vos Sint-Pire ?
Sint Emile, si camaeråde ; mins c’ est tot l’ minme ; Sint Pire ni rfuze måy l’ intrêye ås andjes et dji n’ mi sins nén l’ coraedje di vs el rifuzer.
Dji so-st ene andje paret mi ?
I mel shonne. N’ est ç’ nén vraiy ?
On dit si sovint k’ les femes c’ est des diales…
Ô ! les viyès femes ; mins nén les djonnes !
Djans, wice fåt i mete çoula don, ci n’ est nén ene plome savoz.
Ô ! et mi ki n’ tuze nén a vs dihaler. C’ est des gravaedjes ?
Awè, vocial li trimpe ; l’ årdjint-noû mi pere a dit k’ on l’ åreut londi al nute ou mårdi å matén. Et vocial li bon. Asteure, dji m’ endè va, vos froz m’ comission a vosse popa edon ?
Aha, vola les coulasses, les platenes, les tchéns. (veyant Meliye ki vout sôrti) End alez vs dedja ?
C’ est ouy semdi, et dji n’ so nén come vos, dji n’ a nén fini djournêye.
Awè, c’ est vraiy, et l’ semdi c’ est Sinte-Schovlete, edon ?
Et el måjhone, on n’ a måy fini !
C’ est vos ki neteye paret ?
Kî sereut ç’ don, m’ popa ?
Et vosse mame ?
Ô ! m’ mame ni s’ tént nén coe ; elle overe ossu alez ; mins vos comprindoz bén ki mi k’ est djonne, dji nel louke nén edon. I n’ fåt nén cwand dji serè marieye ki dji soeye ene dôrlinne po m’ fé siervi ; et po-z aprinde a bén moenner on manaedje, i fåt cmincî djonne.
Vos avoz råjhon. Mins portant si vos spozîz èn ome ki wangnreut assez bén s’ veye po vs dinner ene siervante ?
Çoula sereut minme ki dji n’ vôreu co nole. Dji n’ vou vey k’ ene feme e m’ manaedje. Avou des etrindjirs adlé lu on n’ est djamåy a si åjhe.
Vos pinsez totafwait come mi ! Et c’ est cåzu tofer insi nozôtes, edon. Vola des anêyes ki nos nos cnoxhans, puski c’ est dispoy nos påkes, eco dvant, et so tot, nos avans todi les minmès idêyes. (on silince) Çoula n’ vis dit-st i rén, Meliye ?
K’ est çki çoula pôreut bén m’ dire ?
A mi ça m’ dit tot plin.
Oho !
Awè, nos avans si bén les minmès idêyes, li minme façon do comprinde totafwait, li minme caractere, les minmes gosses, ki dji m’ di tos les djoûs puski nos estans fwaits tos les deus onk po l’ ôte et ki nos dvrîs nos maryî !
Ô ! nos maryî !
Et pocwè nén ?
Dabôrd dji so trop djonne…
Vos avoz vint ans, c’ est l’ ådje…
Et pwis… po s’ maryî… i fåt…
Cwè ?
Ô ! vos savoz bén…
Neni… di cwè… pårlez…
Dji n’ pou nén dire çoula…
Djans, siya, dji vs è preye… Meliye…
I fåt…
I fåt !
Li consintmint d’ ses parints.
Ô ! Meliye ci n’ est nén çoula k’ vos volîz dire… i fåt s’ inmer edon, c’ est çoula k’ vos n’ oizîz dire ; et bén, vos savoz bén k’ dji vs inme, dispoy lontins, dispoy todi, Meliye, c’ est vos k’ dj’ a tchoezi po m’ feme et si dj’ end a nén co pårlé, c’ est k’ vos n’ avoz måy volou. Dijhoz on mot, Meliye, rén k’ on mot et dji pårolrè ouy minme a mes parints.
Neni, Emile, dji n’ vou nén.
Mins pocwè ?
Po çoula.
C’ est çou k’ vos m’ respondoz todi, mins ci n’ est nole råjhon… Pocwè, djans, djhoz m’ pocwè k’ vos n’ voloz nén ?
Vosse pere consintirè, Emile, mins vosse mame dji sai d’ avance k’ ele rifuzrè ! Cwantes feyes n’ a-t ele nén dit dvant mi-minme, al fontinne, ki s’ fi c’ esteut on bea pårti, ossu ki c’ esteut n’ feme d’ årdjint k’ ele lyi cwirreut. Mi cour sonnéve tot l’ oyant djåzer insi, ca vos savoz bén k’ dji vs inme, mi ossu ; dispoy li dierinne fiesse a Tchênêye vos cnoxhoz mes sintimints.
I vs les a falou råyî foû del boke, si dj’ m’ è rapele.
Et dji m’ ripint co ouy di vs les aveur dit, ca dji comprind tos les djoûs mî ki nos n’ polans måy esse onk a l’ ôte.
Et mi, dji vs djeure ki vos seroz m’ feme, cwand minme dji dvreu cwiter mes parints.
Emile, ni djåzez nén insi ; paski mi, dji doe vs dire ki dji n’ interrè djamåy par foice e vosse famile.
Ô ! Meliye, vos n’ m’ inmez nén tant k’ mi !
Emile !
Ô ! dji vs a fwait del poenne !
Vocial ene sakî. Mesfyîz vs !
Tén, dji n’ vis aveu nén etindou ; po cwè est ç don ?
C’ est des gravaedjes po Monsieu Porea, madame. Dj’ a dné l’ bon a vosse fi.
Gn a-t i do tins k’ vos estoz cial ?
Neni, madame.
Vola l’ bon, mame.
C’ est bon, metoz l’ sol banc.
Vos åroz li restant londi al nute ou mårdi å matén, savoz madame.
Merci, dji frè l’ comission å mwaisse.
Arvey, madame…
Arvey.
Vola ene pitite damzilete ki dji n’ pou-st oder.
Pocwè don, vis a-t ele måy fwait ene sacwè ?
Neni, mins sins saveur pocwè, anfin ele ni m’ rivént nén, et tote djonne k’ elle esteut dji n’ inméve nén di vs vey djouwer avou ; vos dvoz vs è rapler.
Dji n’ a pus fwim.
Dji n’ inme nén Gårnir ni s’ feme, mins dj’ inme co moens leu feye !
L’Amour est enfant de Bohême
Qui n’a jamais connu de loi,
Si tu ne m’aimes pas, je t’aime
Et si je t’aime prends garde à toi !
Estoz vs co la !
Mi ? Neni. C’ est Pire. Pierre Gârnir pour votre service, belle dame !
Dji n’ a nén mezåjhe di vos siervices et co moens d’ vos !
C’ est po çoula ki dj’ so vnou.
Vos dvrîz dmorer e vosse måjhone ; li semdi do moens ; vos savoz bén ki ç’ djoû la on djinne divins les manaedjes.
Tonton vént co d’ mel dire, c’ est po çoula k’ dji so vnou cial.
Bén, i n’ a nén pus mezåjhe cial di vos k’ e vosse måjhone paret ! Etindoz vs bén, çoula !
Ki gn a-t i don ? Si dispite-t on cial ?
Ba c’ est Dadite loukîz la, ki n’ sait måy mi leyî påjhûle. Mi ki vént cial por leye — inte nos deus soeye-t i dit — ele mi rçût pé k’ on tchén dvins on djeu d’ beyes.
Vos deus, vos vs dispitez todi.
Bén loukîz i m’ shonnéve portant k’ nos estîs fwaits po nos etinde !
Awè, todi seur !
Valet, i fåt loukî so vosse feme, ele mi voet tos les djoûs pus voltî, on djoû çoula toûnrè må, et mi, dji n’ respond d’ rén savoz.
Dji so sins nole sogne.
Vos avoz toirt, infén dji vs a prevnou. Asteure, ki vou dju dire, vinoz vs avou mi ?
Wice alez vs ?
Dji m’ va-st al Hirondelle, mete mi djonne bleu. Et bén ?
Ki vs shonne-t i don Dadite ?
Il est trop tård po co ndaler edon !
Dji n’ a nén co sôrti cisse samwinne.
I fåt sôrti, valet, sortot si vos voloz fé plaijhi a vosse feme, ca, ele mi djheut co torade ki les omes ni fjhèt k’ do djinner l’ semdi avå l’ manaedje.
Cwand dj’ a dit çoula, c’ esteut por vos.
Djans djans, ni vnoz nén fé des complumints a Lambert, edon ; vos estoz trop vîs tos les deus po vs dire des doûs mots. (a Porea) Siya siya valet, c’ est k’ ele ni oize vis evoyî foû d’ cial, mins l’ semdi, totes les femes sont-st insi, Tonton m’ l’ a co dit torade, les omes djinnèt.
Dji m’ va ene gote avou Pire insi, savoz Dadite.
Alez wice ki vos voloz !… Et l’ soper ?
Dji soprè torade… Estoz vs co måle ?
Ele n’ est måy ôtmint cwand dj’ so cial hin leye… djans, rote todi, ni t’ ebarasse nén.
Alez, e-n avant, dji vs shû.
Dadite, au revoir, sans adieu ma turturelle !
Ô ! ces Gårnir,… dji finixhrè bén par les aveur foû d’ cial !