Ovroz tortos, dinoz-v’ do l’ pon.ne
Et vos pouroz sèy binâches di çou qui vos gangnroz !
On ritche cinsî, sintant qu’il aleut mori,
Ouka sès èfants èt a zèls tot seûs, lèz-î a dit :
- Mès binamés èfants, wârdoz bin vosse éritance
qui dji v’ lé èt qui mès parints m’ ont dèdja lèy.
On bê èt grand trézôr èst catchi d’dins.
Dji n’ vos monstèrè nin l’ plèce : a vos di l’ trover.
Avou dol pacyince èt do coradje, vos l’ trouvroz.
Insi, âye vormint, si vos vloz, dji v’acèrtine qui vos l’aroz.
Ritoûrnoz bin vosse tchamp après avèr fé l’ awous’.
Tchèrwoz èt foyoz sins lèy di costé noule plèce
Douski gn-a âke a ovrer èt a gangni èt li trézôr sèrè d’a vosse.
Leu poupa èvoye, lès èfants fizèt tot l’ ovradje ricmandé,
Tot costé, po voci po vola, si bin qui lès tchamps insi ovrés
Lèz-î ont dné lès foûrs lès pus spès èt lès pus fwatès dinrées.
Po lès brokes èt lès çans’, il avint avou bê kèri,
Gn-aveût pont d’ ètèré ni d’ catchi.
Li trézôr, ça a stou li ritchèsse qui l’ tère lèz-î dné,
Di kwè magni tos lès djoûs come i fât èt di todi bin viker.
Adon, bravès djins, sèyoz coradjeûs èt sûtis come zèls :
Pougnoz sins alkiner o l’ ovradje tant qui fât èt ‘k’â coron
Et vos-aroz on trézôr bin da vosse èt don
Vos pouroz sèy bin fîrs èt contints!
L' accint rindou dins ç' tecse cial et l' ci d' Oufalijhe.