Vola cwatrè-vint-z ans ki dji vos cåze.
On n' esteut nén foirt a si åjhe.
On s' contintéve di waire di tchôzes.
Come on n' aveut k' a sucî s' pôce,
on cåzéve del Sint Nicolai cwénze djoûs d' avance,
Mins, on vikéve dedja so l' esperance.
Les efants schoûtént dedja mia.
Kécfeye peu k' sint Nicolai åreut stî la.
On djheut ses Påter tertos eshonne,
e rivnant di scole ou el måjhone.[1]
On s' ashideut al tåve, al loumire do kénket,
paski, divant di scrire, on magnive on boket.
On fjheut s' comande so on boket d' papî,
e waitant dijh côps, si on n' aveut rén rovyî.
On arindjive å mia les shabots et les assietes;
On rabressive ses parints et on aléve doirmi so ses tchåssetes.
Li londmwin, cwand on s' levéve, on riyeut ou on breyeut,
paski, sovint, on n 'aveu nén yeu çk' on vleut.
Sacwants djaeyes et ene pougnêye di noejhes.
Pus tård, ça a stî ene miete mia.
On-z aveut on baston d' tchôcolåt u on nougat.
Et co ene miete pus tård, ça a stî deus orandjes
et deus sint Nicolai d' påsse, u des bonzomes di speculôsses;
Avou ene orandje, on aléve on samwinne
e-z e magnant on cwårtî e-n alant a scole.
Et creyoz m' bén, ça n' nous shonne nén drole .
C' esteut l' môde po tot l' monde e ç' tins la.
Comint vôrîz k' on roveye tot ça ?
Asteure, les tins ont bråmint candjî.
Les efants ni dmandnut rén po magnî.
I lzî fåt totès sôres d' afwaires,
Ki Sint Nicolai ni sepe cwè dner po lzî plaire:
Totes sôres di beas djouwets
Tévé, cassetes ou robots,
Velo, moto ou oto.
Po fini, sint Nicolai ni sait pus cwè.
Note Wikisourd
Eplaidî aprume so l' Aberteke (e 2006); ene miete ricoridjî vaici.