- Dji so télmint disbåtchî di vir ene téle afwaire ! Djamåy å grand djamåy dji n’ åreu pinsé end ariver la ! Viker çoula dins m’ veye, c' est ene sacwè d’ ewaerant !
Les spôrts, po ene sakî di normå, c’ est ene sacwè k’ i n’ est nén possibe di s’ endè passer. Eyet portant, c’ est çki nos vnans di viker durant des samwinnes etires ! Nonfait ! des moes etirs.
- Cwand dji pinse a çoula, èm moral endè prind on côp ! Eyet nén on ptit, cobén !
En plin moes d’ måss, des especialisses nos ont vnou låtchî k' on moirtel virûsse nos atakéve et ki c’ esteut cåzumint l’ guere !
- Bén por mi, ça l’ esteut ! Gn a pont d’ dotance !
Ene mwaijhe afwaire vinowe di Chine. On n’ sait nén, eyet on n’ el sårè ptete djamåy, d’ eyou k’ el tchinisse a-st arivé. I gn a des cés ki deynut ki çoula s’ a schapé d’ on laboratwere eyet des ôtes ki pinsnut ki c’ est a cåse ki les Chinwès mindjnut des biesses come el tchawe-sori ou co ene ôte ki dj’ a rovyî l’ no.
- Mi, si on mi dvize d’ on no e rapoirt avou les spôrts, dji l’ ertén åjheymint, mins cwand ça n’a rén a vir, dj’ a rade rovyî ! Tot çoula po cachî di vos splikî k’ el govienmint s’ endè mele, avou on moncea di regues a shure.
On a comincî pa suprimer des tournoes d' tenisse eyet po shure, ça a stî el valse di tchinisses e tot djinre k’ ont stî rmetous, aprume les coûsses a velo ey e-n oto. Les tchampionats d' fotbale ont shû et tos les spôrts d’ ekipe. Eto, les spôrts di contak (k' on lome ossu spôrts di toursiyaedje [lutte corporelle]).
- Po racourti, dji n’ aveu pus rén a m’ estitchî dissu l’ dint !
Si Mossieu (et Madame) Tibî Meyî divént shure des regues come dimorer a on mete céncwante onk di l' ôte, poirter des masses, eyet s’ ernetyî les mwins, gn aveut co pé : on a seré tos les botikes. Seulmint les cis ki vindént do mindjî plént drovou.
Bråmint des djins fijhént do téléboutaedje e leu måjhon.
Minme les scolîs ont dvou dmeurer å stok [au piquet d'attache]. Po les cis ki s' alént voltî pormoenner, c’ esteut djusse a pî oucobén a velo.
I fåt dîre eto ki tot steut seré : minme nén moyén d’ endaler boere on vere ou di mindjî paski les restos eyet les cåbarets estént serés !
- Mins dins ké monde vikans ns s’ i vos plait ! Eyet dire ki ça pout continouwer lontins insi d’ après les dclaråcions des especialisses di totes les cognes.
Ureuzmint, sacwantès tchinnes dins l’ boesse ås imådjes erpassént des pårteyes dedja djouwêyes. C’ esteut mia k’ rén… mins tolmin.me do restchåfé !
I gn a bråmint des tchampionats k’ ont stî vraiymint a djoke. E-n Almagne, il ont rcomincî e moes d' may. Mins a-z ouxh clôs [huis clos].
Adon, c’est disbåtchant d’ èn nén etinde les djins ecoraedjî leus coleurs.
El velo divreut eto rprinde : el calindrî a stî rtourné cou dzeu cou dzo. Totafwait a stî rpoirté po l’ fén d’ awousse ou l' cominçmint di setimbe. Di d’ ci a don, nos vierans çou k’ ça va diner eyet si on n’ ercomince nén co on recloymint avou zero spôrt !
- Ca sereut teribe !
Jean Goffart, el 20 di may 2020