Dins tos les cas, et mågré les criyaedjes a Barabasse des ritches payis, les chifes sont la, setchs come Setchri et l’ Setche Vå : e 2001, les payis d’ l’ OCDE eshonne ont dispårdou emey leus cinsîs li ptite dringuele di 311 miyårds di dolårs amerikins, ça fwait shijh côps dpus ki l’ aida k’ il ont-st evoyî eviè les payis del Tîce-Daegne. Et ça fwait ostant ki tot l’ Divintrin Produt Brute di totes les Afrikes houte da Sara.
K’ è diss, Batisse ?
Tot ça pocwè fé ?
Pu produre des moyes di boure et des tienes di tchå, ki vont esse likidés po pîce di pwin divins les pôves payis. Les poudes di laecea, boutans, sont ratchtêyes pås oujhenes e l’ Afrike po rfé do laecea d’ botaye, lu-minme rivindou bonmartchî dins les veyes. Et les ptits cinsîs do payis ki modèt sacwants lites di laecea, et eto les cis ki s’ ont ahessî avou des bounès vatches atchtêyes tchir et vilin, i dmorèt avou leu laecea, ca les laeceareyes lezî payèt meyeumartchî ki çou k’ ça lzî rvént å lite.
E l’ Afrike Coûtchantrece, gn a 10 miyons d’ djins ki vikèt do coton. Sapinse ås esperts li subzide po tchaeke kilo d’ coton prodût ås Estats Unis et e l’ Urope est, dispu lanawaire, pus hôt ki pris d’ vinte do kilo sol martchî daegnrece.
Sacwants govienmints d’ Afrike sont po-z amete l’ Union Uropyinne et les Stêsses divant l’ O.M.C., l’ Adjinçnance pol Comiece Daegnrece. Li Banke Daegnrece l’ a bén dit : les ptits ahiveus d’ coton d’ Afrike vont piede 200 miyons d’ dolårs a cåze des subzides amerikins.
Et rcrever d’ fwin !
Mins årvierdimint, l’ Union Uropyinne clôt ses ouxhs ås produts d’ Afrike come les tomates u les orandjes.
Oxfam a dmostré èn ôte toû d’ rossea tchén ki les Uropyins djouwèt ås pôves payis, avou l’ souke. L’ Urope epoite ses troplins d’ souke a on pris mitan moens tchir ki l’ pris aclapé pol PAC, li Cmone Politike Agricole, et meyeumartchî ki l’ pris k’ ça lzî rvént. Et ces subzides la, ki s’ chifrèt a 1,6 miyårds d’ uros, ont rindou l’ U.U. (Union Uropyinne) li prumî epoirteu d’ souke, dabôrd ki les costindjes î sont pus hôtes k’ ôte pårt. Sol minme tins, les dwanes so sacwantès dinrêyes agricoles ki vnèt do Tîce-Monde alèt disk’ a 140 åcint !
Est ç’ ki ça n’ creye nén vindjince, paret, dijhèt i les Oxfam-îs !
Les ecolo boutèt al minme tcherete.
Po produre do laecea, i fåt del yebe, k’ est poûssêye a make avou des nitrates. Sifwaitmint po les betråles å souke. Ces nitrates la si rtrovèt dins les poujhåvès aiwes disk’ a 100 metes fond.
Po racourti : les gros cinsîs d’ Urope produjhèt sins wangnî leu veye a cåze do pris des usteyes, des epronts, evnd. I n’ si saetchèt foû spexheur k’ avou les subzides. Mins ces subzides la sont dnés å kilo d’ souke, al vatche modowe, evnd. Ça fwait k’ i sont stombyîs po produre todi dpus et manni todi dpus leu-z evironmint, et apôvri todi dpus les pôves des pôves payis.
Après nozôtes les moxhes !
Et come di djusse, espaitchî les Afrikins, les Kroudes, les Afgans, evnd, di vni bouter dins les cinses, po ene pitite wangne. Tos les djoûs, end a ene vintinne ki mourt, neyîs, tot vlant passer li stroeteure di Djibraltar. Parey dizo l’ Sicile ey el Mer Edjêye.
Dj’ aveu lomé li prumî des papîs di ç’ pådje ci : dijh nouzomès biestreyes di nosse société.
End a kéccôp dipus d’ dijh !
Sicrît li 5 di setimbe 2002, eplaidî aprume so l’ Aberteke ; li rfondou est ene miete ricoridjî vaici.