Tûzadjes so les djoûs d’ôy.
Li måjhon francèse MATRA vint d’ fè rèche one novèle èvincion: les forvèyûwès imådjes. Dj’avans rèscontrè l’ directeûr do Çante di Rcwèradjes èt Discloyadjes di MATRA voci, èl Walonîye, Tîri Delbûre, èt s’ lî dmandèr cwè.
Li Rantwèle: Moncheû Delbûre, ça fwêt k’ c’est po dabôrd, insi, les noveas avansmints so les tècnikes des forvèyûwès imådjes?
Tîri Delbûre: Plê-st-à Diè, ci sèrè vindåve po dins on an u deûs.
L.R.: Cwèski c’est d’ ça por one sacwè, å jusse?
T.B.: Mètans on match di fotbal inte li Standård èyè Dinamo Moscou. Nos sèrans capåbes di fè vèy, mètans les rèclames po les spas, sicrîtes avu l’alfabet normål åzès Bèljes, èyè avu l’ griftadje cirilike åzès Russes.
L.R.: …mågrè k’ li filmurèce sèrè todi l’ minme, èyè les rèclames èto?
T.D.: Jusse! C’è-st-o botike, ètur li rcîyadje èt l’èvoyadje di l’imådje k’i gn-årè l’ candjmint.
L.R.: Kîski v’ va payî po ça: les èkipes di fotbal u les tchinnes di tévé?
T.D.: Là l’ neûd, di-st-i l’ soyeû! Naturèlmint, tchèconk prêtche po s’ tchèpèle, come di djusse. Les èkipes di fotbal ont d’ todi pus d’ rûjes po vikèr. Èles ni sont nin foû tchôdes po co des sorcostindjes. Di l’ôte des costès, les tchinnes di tévé pîlèt paski l’ filmadje des grands match lèzî costêye todi pus tchîr. Les rwêtants des tchènås broûyîs, zèls, ni sont mutwè nin prèssès à lèyî rmontèr leû payadje jusse po l’ plêjhi d’ vèy, mètans, Spa-Monopole sicrît à Lîdje avu des lètès arâbes.
L.R.: Ça vut dîre, avu, k’on pôrè tchåspougnî les imådjes; k’on n’ sèrè måy pus cheûr ki les ciles ki vos rcîyoz, mètans d’Irak uksè d’Iran, n’åront nen yeû stî cpôtyîyes. Par ègzimpe po muchyî l’ vrêy, à cåze k’on vut bassinèr po Saddam u po Khomeini, nonna?
T.D.: Savoz bin, ciste ahike la ni date nin d’ènute. C’est VBC, si djèl tins ben, k’a st-avoyî, on djoû, on rèsponda da Fidel Castro, k’aveut stî fwêt pa on rapwarteû mo cnoxhu. Ci n’a stî k’one hapêye pus tård k’on a sèpu ki nost ome n’aveut djoûrmåy rèscontrè li leader máximo. Il aveut st-èmantchî si n-adjåzia tot rplacant des bokèts dissu n-on l’ôte, divins one tchambe d’on grand ôtel di Miami. I sèreut tins k’ les gazètîs - èt les cåzeûs o posse, dayeûr - s’ayîvinche des rîles di cdûjhance à môde di djint. Èyè des finès strètes, co bin! Èyè di n’ nin todi volu zèsse li prèmî po fè on scoop. Les marchås l’ sèpèt ben, duwô: po fè one sichoupe, dô, il est d’ kèssion di bin rloukî li mètå k’on v’ dène. Ci n’ dut nin yèsse do cru fièr, savoz.
L.R.: Ha ha ha! Mèrci branmint des côps, moncheû Delbûre.
T.D.: I gn-a rin avu ça, ô. C’èstè cwand vos vloz, dô.
Tecse sicrît avou s' ratournaedje e francès et l' modêye Feller li 29-11-1994; limeroté 156b dins les scrijhaedjes da Lucyin Mahin; il a stî reployî dins on limero del rîlêye «Waldim» et come Rantoele 0.1. (Rantoeles di saye divant l' limero 1).