(prononçaedje espontané, divant les djins)
C' èst-st-ène fame k’ avot pris ène lêde abitude du dormu lès djambes au laudje. Èt s’n ome, ça n’ lî plêjot nin dtrop, èt i lî rpoûssot toudi sès djambes. Mês, in moumint après, èle ravot lès djambes au laudje. Èt al fin, i lî dit : « Choûte bin, fame ! In côⁿp û l’ ôⁿte, t’ aurès ène fârce. » « Cwè, don ? » dit-st-èle. « Tu wêrès ! Tu pèrdrès ta matrice. » « Hê ! Ça n’ va nin ! On n’ piêde nin ça come ça, sés′ » dit-st-èle. « C’ est bon ! C’ est tout ! »
Èt li, il astot facteûr. Cand il avot l’ tins, hin, - il èstot la - il inmot bin d’ aler fé les courses. Èt mafwè, i passe ci et la. Èt i passe al boutchrîe. Èt i dmande in fwa d’ couchèt. Abén, ça va ! Èt on lî ratortîe ça comifaut. Èt i rvint…
Èt al nut′, èle va co coûtcher. Èt co toudi, èlle avot co lès djambes au laudje. Insi ! A ! Èt li, i s’ lèvot d’ bone eûre. Il astot ou tri al posse a Brussèle. Èt a trwâs eures — trwâs eures au matén —, bén : èvôⁿye. Èt dvant d’ ènn’ aler... du s’ lèver, i prind l’ fwa d’ couchèt, èt i lî mèt inte lès djambes. Èt pî vou l’ la voye, mafwè.
I rarive a deûs eûres dul vèsprée, il avot fini djoûrnée. « Ké nouvèle, fame, ça va ? » « Ây mês nin dtrop! » « Poucwè ? » « Bin çku t’ avos dit è arivé. » « A ! tu wès bin k’ dju t’ avo bin dit. » « Èt tu n’ ès nin yu trop mau ? » « O non ! Dju n’ ê rin sintu. Mês pou la rmète, dju nn’ ê veû, la ! » dit-st-èle.