L’aplacemint du walon d’ Transine

Èn årtike di Wikisource.
Aller à la navigation Aller à la recherche
Emojione 270F.svg Ciste ouve ci egzistêye eto divins ds ôtès ortografeyes : Rifondou walon.
L’aplacemint du walon d’ Transine

L’aplacemint du walon d’ Transine

Mape Basse Årdene.jpg

Lu walon d’ Transine, quu dj’ causerans èt quu dju studîrans dins ç’ lîve-ci, èst quausu parèy aus paurlers d’ôtes viadjes du hôt d’ l’êwe du Lèsse : Viance, Rudû, Smoû, Anlè, Hôts-Tchamps, Maîssin, Libin, Davedisse, Oûr, Pwâtcheresse, Djimbe.

I r’san.ne brâmint ou walon du d’zous d’ l’êwe du S’mwas, qui r’djond d’alieûr t’t-au long du l’ ligne Hôt-Fayis Bive Palijû. Du l’ôte dès costés, ç’ côp-là, i s’ racousine ou Borkin (lingadge du Sint Yubèrt), quu lès scrijeûs èt lîjeûs d’ walon counuchèt fwârt bin à cause du Calozet d’ Nauwin.ne, yink dès mèyeûs scrîjeûs du toute nosse Walonîye. Tout ça, c’èst la famîye dès paurlers ârdinwès.

Çu côp-là, quand on duchchind s’ la Faumène, oûte du Tèlin, Wèlin, Soyîre èt avaurlà, ça tchandje mou bèl èt bin. Làddlé, is d’visèt in causadje qui r’tire d’djà brâmint du Namurwès.

Du l’ôte dès costés, v’s-onz Tchèstrolais. Çutlà, il èst parint du-d-pus près avu l’ Gaumais. Lu royê atur nous-ôtes èt zês, c’è-st-ou rés’ du payis d’ Libraumont.

Â !, dj’alos rovier lès Bèrtrèdjîs (lès baudets come on lès loume) ; il ont ossi in causadje fwârt da leûr. On z-è vèjin djondant Tchonvîye, maîs on su r’ssint d’djà in pô d’ zês à Maîssin, Anlè, Hôts-Tchamps èt avaurlà.

Dins nosse payis du hôt d’ l’êwe du Lèsse, i gn-è jamaîs pont yu pou dîre du scrîjeûs. Jusse quéques « spots » du R’doû èt quéques mots d’ Glaîreûse qu’ ont rèchu dins lès-ovradjes dès waloneûs du Tchèstê. C’èst nin pou ça, i gn-è quand’ min.me yu in quèreûs (û putot ène quèreûse !) qu’ è scrît yauk su lès lieûs-dits d’ Maîssin[1].

C’èst bin damadje qu’i gn-è nin d’ pus yauk quu ça, ca çu causadje-ci èst mètu jusse à l’ascate dès paurlers ârdinwès qu’on loume walo-lorins.

Anfin ! Après çu p’tit lîve-ci, on wêrè d’djà moutè in pô mî come on vike.

  1. Braun, S. Toponymie de Maissin, Memwere UCL, 1950.