L’ajent Mwasse/V
V
S’ dismacraler do mwârt
Dès tournikèts d’ lumerotes su lès d’zeûs dès-autos, dès sclats fén blouws su l’ nwêre twèle dèl nût, lès « Chmits », li « clic-clac» dès fièrs qui s’ rissèrenut su vos pougnèts…
C’èst ça qui toûne, qui toûne dins vosse tièsse. C’èst d’dja drole di veûy come vosse tièsse catoûne quand èle sét qui v’s-avoz mau faît : à v’s-assoti ! On pinse qu’i-gn-a dès waîtroules à totes lès fignèsses po vos lwârgnî. Dès waîtroules qu’ont-st-adviné qu’on cwârp ripwase dins vosse cofe. On pinse qui pâr nût, totes lès-autos qui vos crwèjelèyenut, pudenut vosse numèrô d’ plaque. Chaque mète, chaque ascauchîye : c’èst vosse tchimin d’ crwès. On veût lès « blouw » dins tos lès toûrnants, minme su lès vôyes di r’minbrimint, quand i djale èt qu’i faît wârglas.
Il avin’ prind l’ vôye d’amon lès flaminds, tot si d’jant qui, Djodogne passé yute, tot l’ long dèl Djausse, i trovrîn’ lès frèchaus d’ Outchârd. C’èsteût l’ payis flamind, vélà tot l’ long dèl vîye ligne di tch’min d’ fiêr qu’aveût stî rarindjîye à « Ravel ». Co d’ pus d’ chances po qu’on nè l’ ritrove jamaîs vélà, l’ pîce-crosse qu’aveût spaurgnî po zèls deûs.
Il ont prins l’ brisé. Co saquants mètes. Lès lumerotes sitron.néyes, il ont drovu l’ cofe…
« Waîte, come tot s’ayincîye, il a djalé pîre qui fwace, on n’ veûrè jamaîs nosse rote. Pont d’ lune nérén… Tot s’arindje po nos-ècoradjî… On tape nosse rikète dins lès sankis’ li pus lon possube. Prind l’ bidon èt l’ bokèt d’ tiyau. »
« I faît tant spès, dji n’ veû rén, Dj’areû on patâr yinte mès fèsses qui dj’ nè l’ lachereû nin ! T’ès sûr qui… »
« On-z-a faît l’ pus deur ! Î alans n’ ? »
Li lampe di potche pindouwe su li stoumac’ da Primo, lî a mostré one trawèye yinte lès ronchis’ èt lès fènasses. I pwârteûve li cadâve pa sès pougnèts, Silvin pa sès pîds : sondje qui t’ pwate one chovéye d’ansènî ou one djaube di strin.
« I d’vént d’dja rwèd ! » a-t-i dit, po s’ètinde causer.
« Dins wêre di timps, i sèrè ossi lèsse qui l’ bwès d’one marionète ! »
« Dji n’ parvén nin à m’ fé quite di sès-ouys quand dj’ l’a r’toûrné onawêre. Dj’a vèyu l’ mwârt didins. Asteûre, dji sé à qwè ç’ qu’èle richone. Dji n’ dwâmerè jamaîs pus tranquile ! »
« Ni rovîye jamaîs qu’ c’èsteût on’ acsidint, qui ç’ n’èsteût nin d’ nosse difaute. Qui ça d’veûve yèsse sicrît dins lès stwèles ! On… Comint fé ôtrumint ? Ti veûs di d’ci, on champète qui vént dîre à t’ feume qui t’as spotchî èt touwer on’ ome. Qui ti n’ rimousserès pus à t’ maujone ! »
« Non.na ! »
Li foncia flaîreûve li pouriture.
« Dji pou m’ènn’ ocuper tot seû, si t’ vous. »
« Non.na, dji vou yèsse seûr qu’il èpwate nosse sicrèt. Nos d’vrîn’ waîti dins sès potches po sawè quî qu’ ç’èst. Dins l’ fond, i n’è p’leûve rén. Ci sèreût todi ça ! »
Primo passe si mwin dins l’ blouson do mwârt.
« Poqwè ? Pont d’ nom ! On nè l’ conèt nén. On visadje ça s’ rovîye pus aujîyemint qu’on nom… Dji brûlerè sès papîs al maujone quand nos sèrans rabrokés. Prind on rôsia, nos l’alans rimplî d’aîwe. »
« Poqwè ? »
« Mi fré qui boute al police, m’a èsplikè qu’ lès djins qui mourenut dins on’ acsidint, èt qu’on stî tapé à l’aîwe, rimontenut al copète, lès feumes avou lès tètes qui pindenut èt lès-omes su leû dos. Quand i rindenut leu dêrène bauye, i-gn-a come one pia qui s’ riclape po-z-èspêtchî qu’ l’aîwe ni passe èt i flotenut. Po qu’i n’ rimonte nén, i nos faut fwarcî l’ passadje, èt rimplî sès peûmons avou d’ l’aîwe. »
Primo à rauyî l’ satch di plastique qui couvreûve li tièsse. Dès totches plin s’ visadje, dès lèpes frochîyes, chûréyes, dès crosses di song. Silvin à toûrné s’ tièsse.
« Dji n’ sâreû… »
« Dji tirerè bin m’ plan tot seû ! »
Primo a d’vu lî spiyî s’ machwêre, skèter lès-acoplûres po tchoukî l’ bokèt d’ tiyau dins l’ fond di s’ gawe.
« Vola, come ça l’aîwe va rimpli sès peûmons. »
« Â ! taije tu, ti m’ rinds malade ! On dîreût qui t’ vûdes one trûte èt qu’ t’î prinds do plaîjî. Dispêtche tu, qu’on n’è cause pus ! »
Maugré qu’i-gn-aveût pont d’ brût, Sylvin à ètindu l’ froû-froû dès-éles d’one oûlote qui s’ lèveûve d’on bouchon. I s’ sinteût tchaîr à brouwèt. Comint l’ôte saveûve-t-i d’morer maîsse di ç’ qu’i fieûve pad’vant on’ ovradje di foû come cit’la ?
Avou l’ bidon, Primo a rimpli lès peûmons avou dèl man.nète aîwe et ratinde qui l’ gwadje do mwârt rinde si trop plin.
« Vola, c’èst faît. I va laîdemint poûrî dins l’aîwe. Co mèyeû qu’ s’on l’arêut yeû brûlé. Di d’ci deûs mwès on nè l’ sarè pus r’conèche qu’avou s’-t-ADN èt sès dints. »
Il a r’chompu sès mwins su s’ culote po si r’ssouwer, come i l’âreut yeû faît après-awè stî à cofèsse !
« Èt asteûre, on l’ tape è l’aîwe, li pus lon possube. Tè l’ prinds pa sès djambes èt mi pa sès brès. Dji compte djusqu’à trwès : one, deûs, trwès… »
Li cwârp à djondu lès-aîwes, s’èssankyî doucètemint : tot jusse li timps qu’ lès cruwaus r’pudenuche leûs places. Li mwârt èpwârteûve si s’crèt, plombé d’ peû, d’ disgostadje… èt di liârds…
Co saquant bouyes d’aîr qui r’montenut sclater au d’zeû d’ l’aîwe : come one dêrène clignète d’on pére à s’ famile èt, adon, pus rén…
L’auto èraleûve pa lès maîsses-vôyes. Lès lèpes da Primo ont triyané d’ plaîjî.
« Li cassète… Ti t’ rinds compte Silvin, li cassète èst da nos ! »
« Non.na nin co ! »
« Choûte bin ci qu’ dj’a à t’ dîre. Lès caurs, nos n’ pourans nin nos-ènnè sièrvu tot d’ sûte. Li timps qu’ ça s’ tasse, qu’on veûy ci qu’i s’ va passer, qu’on-i pouye mia veûy clér. Tu n’ dwès rén dîre à t’ feume, nin on mot, rén què lî poureût d’ner dès dotances. OK ! »
« Tu pinses qui dj’a ausse dè lî dîre ! »
« On-z-a tot jusse faît come on l’ diveûve fé, d’acwârd ? »
Sylvin à clincî s’ tièsse po marquer oyi.
« Ni candje rén à tès-abitudes. Continoûwe à cachî après d’ l’ovradje, à sognî tès poyes come tè l’ faîs tos lès djoûs. Mi, t’t-à l’eûre, dji m’ prusinte su l’ zoning di Fleuru por one place. Dj’îrè vélà come s’i-gn-âreût jamaîs rén yeû. Nos n’avans stî nune paut. Nos-avans djouwé èchone au majong dissus nos-indjoles, come tos lès djûdis al chîje. »
« Èt m’ capot qu’èst skèté, mi lumerote spiyîye ? »
« T’ènn’ achètes one vîye adlé on dismolicheû, ti pâyes avou dès liârds, tè l’ rimontes ti-minme. Ti n’ conès nin on garajisse qui poureût r’fé t’ capot au nwêr ? »
« Dj’è conè onk qui n’èst nin trop r’waîtant, ça îrè. »
« Sins-ènnè yèsse sûr, li capot n’ dwèt nin awè stî plôyî. I d’vreût réyussî à t’ rarindjî ça, sins qu’on l’ veûye. Dji t’faî confyince po-z-arindjî lès bidons avou t’ feume. Dins tos lès cas, ni rimpli pont d’ papî po lès-assurances ! »
« Èt l’ cassète ? »
« Djè l’ tén al maujone, au guèrnî, pont d’ risse… »
« Rén d’ tot ça ! Poqwè qui dj’ nè l’ ténreû nén, mi ? »
« Po qui t’ feume tchaîye dissus ? Mi dji vike tot seû, pèrson.ne ni vêrè foute si nez dins m’ guèrnî ! »
« Si c’èst come ça, nos nè l’ catcherans nin à t’ maujone, nin adlé mi nérén. Dj’a one pitite idéye dins m’ tièsse. Djè l’ vou compter avou twè, l’ magot ! »
« Là waîte, ti m’ causes come s’on s’ conireût d’ayîr ! »
« Ci n’èst nin à ça qui dj’ pinse, dji n’ voureû nin awè faît ça po rén… Po l’ cadâve… Si ça toûne à vinaîgue, faut qu’on n’ ritrove rén, ni l’ cwârp, ni lès liârds. Ti m’ promèts qu’ si lès blouws s’è mèlenut, on brûle lès biyèts. Dji t’ garanti qu’ djè l’ frè, qui t’ fuches d’acwârd ou nin ! »
Primo s’a fwârcî à l’ rapaujî.
« Dji tè l’ djure. Al mwinsse pitit oucha, on rèface totes lès preûves. Mins nos n’ènn’ârons pont : tot à rôlé au pére dès pôces… Nin one faflote à rabate ! »
« Comint ç’ qui t’é pous dîre one parèye ? »
« Mins pace qu’i-gn-aveût rén d’arindjî d’avance, tot s’a èmantchî tot seû… sins sawè poqwè… pont d’ tèmwin… èt pont d’ cwârp ! Tu n’ sés sawè come dj’î a sondjî ! Come s’on-âreût yeû gangnî au loto. Dji m’ènnè doteûve qui l’ magot m’ tchaîreût su m’ dos on djoû ou l’ôte. Poqwè ? Bin rade, nos n’ sèrans pus lès-èsclâves da pèrson.ne ! »
Dins l’ tièsse da Sylvin, tot s’ comacheûve. On mot qui r’vineûve come on tournikèt à tchin.ne : baligands… baligands…