L’èfant malade

Ciste ouve ci egzistêye eto divins ds ôtès ortografeyes : Rifondou walon.

L’èfant malade

Bon Diè ! choûtoz m' priére
Vos qu'ès compatichant ,
C'est si dèr por on' mère
Do veie mori s't èfant.

Elle astet si roslante,
Si douce et si riante;
Les gins l' trouvint charmante
Et m' cœûr battet d' plaigi ;
Mais comme vo-l'-là cangie,
Mi pauv' pitit' Marie ,
C'est on' fleûr qu'est flanie ,
On' fleûr qui vut sèchi.

Bon Diè ! choûtoz m' priére
Vos qu'ès compatichant ,
C'est si dèr por on' mère
Do veie mori s't èfant.

Ji m' rafiais do l’veie
Div'nu on' bell’ jôn’ feie;
J'astais trop fiér’ di Ieie,
Li bon Diè m'a puni ;
Mais s'i faut qui j’èl piède ,
A mori ji sus prette ;
Rin n' mèrit' qu'on l' rigrette
Quand I' bonheur est paurti.

Bon Diè ! choûtoz m' priére
Vos qu'ès compatichant ,
C'est si dèr por on' mère
Do veie mori s't èfant.

Chaqu' joû ses camarades
Dispus qu'elle est malade
Accouret au pus rade
S'infôrmè s'ell' va bin.
Les pauv' pitit' comméres !
Ell’ ni s'apinset wére
Qu' put-ète à l' cimintiére
Ell' l'iront poirtè d'moin.

Bon Diè ! choûtoz m' priére
Vos qu'ès compatichant ,
C'est si dèr por on' mère
Do veie mori s't èfant.

Saint' vierge qui nos aime,
V's avoz sti mér' vos-même,
V's aviz on' pôine extrême
Do veie mori voss' fi.
Voss' priére est si bonne
Qu' jamais l' ciél n'abandonne
L' cia qui v' prind po s' patronne,
Reine do paradis !
L' bon Diè choûtret m' priére,
I s'rèt compatichant,
Si v' prioz po l' pauv' mére
Qui vèt mori s't èfant.

Ah! grand Diè ! ji respire!
Ji vins do l' veie sourire;
Si blanc visag' di cire
Si ranime et rougit.
Non, ji n' sus nin trompée,
Mi d'mande est exaucée,
Vola m' feie qu'est sauvée.
Merci, Vierge, merci.
V's avoz choûté s' priére
Bon Diè compatichant.
Ah! qu' c'est doux por on' mére
Do rtrouvè si-t-èfant.