Lu d'visadje su lès grèves nous-è moustré quu lès-ojês n'ont nin tourtous la min.me ausse du boudjer. Pou dîre lu vraî, on lès put partadjer a trwâs sôrtes:
1. Lès grands voyadjeûs, qu' alèt ponre èt acouver dins lès payis du nôrd (Suéde, Norvéje). Pis, à l'arîre-saîson, is r'passèt pou 'nn' aler passer l'iviêr dins lès tchôds payis. I gn-è dès cés qui n'è vont nin pus lon quu la France û l' Èspagne, come la roussète (c'èst pou ça qu'on la loume co bin la Francèse), û la tchakerèsse. Quu, si on-è in doûs iviêr, èle dumèrèt min.me a nosse payis. Pîs tu 'nn' ès d's-ôtes qui volèt vôye t'tossi lon qu' l'Afrique oûte du Sara, come lès grûes, quu t' wès r'passer a bindes du cinquante, çant èt qui volèt a V. Si t' choufules in côp, lu V s' dusmantche pace quu lès biêsses sont dus'zaurmiêyes. Tous cès-ojês-là, c'èst dès grands voyadjeûs passants pace qu'is n'acouvèt nin avaurci. Lès orondes, zèles c'èst dès grands voyadjeûs acouvants pou qu'èles djon.nelèt avaurci. Èlles è vont tossi lon qu' lès grûes. Èles p'lèt fer jusqu'à mile kilomètes su in djoû; co t'taleûre du pus qu'ène auto !
2. Lès boudjeûs, û p'tits voyadjeûs : C'èst dès cés qui n' fijèt nin dès grands voyadjes maîs boudjèt toudi in pô pou l'iviêr. Dins la bande qu'è acouvé ou payis, i gn-è n-è quéqu'ink qu' è vont in pô d'pus ou mîdi, èt quéqu'ink qui d'mèrèt. Pîs ç' côp-là, t'è ratrapes dès cés qui r'dudchindèt du pus frèds payis. Là-d'dins t'ès lès grèves du payis. C'è-st-in pô paç' qu' èles boudjèt brâmint qu'èles su vont rabate su lès tinderîyes. Dins lès-ojês boudjeûs, t' ès ossi l' rawetê, la crawieûse agace, èt mwintes sôrtes du miyos.
3. Lès d'mèreûs. Il acouvèt èt is passèt l'iviêr à l' min.me place. T'ès là-d'dins lu mauvis', lu gros-bètch, lu colas, lu bètche-pot, l'agace. Aus nîves i gn-è brâmint qui s' raprotchèt dès maujons.
Sicrît diviè 1983-1984; eplaidî dins Ène bauke su lès bwès d’ l’Ârdène tôme 3 p. 317, avou on ratournaedje e francès vizon vizu.