InBev: cwand l’ batch si rtoûne kécfeye sol pourcea po les bresseus bedjes

Èn årtike di Wikisource.

InBev, kinoxhoz bén?

C’ est li grosse måjhone k’ a skepyî e 2003 cwand Interbrew a ratchté li bresseu braezilî AmBev. Adon, li djin åzès cwårs [monde financier] di Beldjike aveut tchaké dins ses mwins. Vos sintoz bén ! On ptit Bedje, mitan walon (Djoupeyire), mitan flamind (Stella-Artois) ki mete li mwin so ene boesse ki s’ lome "American Beverages", ça n’ si voet nén tos les djoûs.

Les rintîs k’ avént des accions Interbrew n’ ont nén stî å rpintant. Di 20 Є å moumint do ratchtaedje, elle ont gripé a 30 Є pol djoû d’ ouy.

Mins, lanawaire, gn a yeu ene miete di tribole-manaedje ås InBev.

On-z a veyou Frédéric de Radigues, - on Bedje d’ ene famile vinowe d’ Espagne dispu bele ådje, ca il est dins l’ motî des nos d’ famile del Walonreye da Herbillon-Djermwin -, Frédéric de Radigues, di dj', k' endaléve. C’ esteut lu k’ esteut responsåve d’ Inbev Belgium. A s’ plaece, gn è mousse on Portuguès, Miguel Patricio. Oyi, vos avoz bén léjhou : Stella et Djoupeyire ki leu grand mwaisse ni serè pus ni Flamind ni Walon. Paski pocwè ?

On-z ôt brutyî ki l’ InBev cwirt a spårgnî d’ tos les costés. Et les grossès costindjes k’ i fåt soyî dvins, c’ est purade e l’ Urope, et c' est nos bressenes k’ endè vont påti. Did la l’ idêye di mete èn "etrindjir" al tiesse del "Divizion Beldjike", ki pôrè taper a l’ ouxh on cwårtron d’ ovrîs, et clôre ene peclêye di bressenes sins aveur må s’ cour.

On s’ dimandreut kî çk’ a ratchté kî, la deus ans et dmey. Emey les manaedjeus d’ InBev (l’ Executive Board of Management, sapinse k’ on dit), gn a asteure 5 Braezilîs et 3 Amerloches, po 6 Uropeyins, inte di zels 3 Bedjes : Stefan Descheemaker (divizion Rûsseye, on crexhant martchî), Gauthier de Biolley (France, Bas-Payis, Espagne et Cuba, des ptits cropants martchîs) et Jo Van Biersbroek (sitratedjeye et diswalpaedje).

Waire di nos lidjwès ladvins, paret ! Cobén ki : les de Biolley, c’ est ene famile k’ a vnou d’ Savoye a Vervî å cminçmint do 18inme sieke. Dabôrd, li batch s’ a motoit rtourné sol pourcea, edon ?

Lucyin Mahin, li 10 di nôvimbe 2005.