I n’ fåt nin dner ça a Tibî Mèyî

Èn årtike di Wikisource.
Ciste ouve ci egzistêye eto divins ds ôtès ortografeyes : Rifondant SLLW-amiståve 1996 — Feller-Léonard — Rifondou.
I n’ fåt nin dner ça a Tibî Mèyî
I n’ fåt nin dner ça a Tibî Mèyî

Dins l' timps, à Djimbe, i gn avot in vî pöve k'on loumot Tibî Mèyî. Djù n' vous såro dîre si ç'astot s' vrê nom û in söbricot. I lodjot l' diâle al boûsse, sapinse k'on dit; ça vùt dîre k'i n'astot nin ritche. I dmèrot dins ène pitite cayùte mètùye djondant les ètangs d' Mùssi, la k'on djot kù, dins l' timps, i gn avot yù in viyadje k'avot sté dùstrût pal pesse.

Pou gangnî kékes sous, il atùrpùrdot sacwantès kerwêyes dins les bwès, pou yink ù l'öte. I ramassot des coches dins les pårts dù virêye, i fjot des fagots k'il alot vinde ås djins pour zès ralùmer l' fû, û brûler dins les tchminêyes k'on z afùme les djambons. Avù les rames dù böle, i fjot des ramons, èt cand i nn avot in çant, gn avot in tchèriyeû ki passot èt ki les pùrdot. Ç'astot pou chouver dins les ûjines, dijot-i.

La, wê, k'in bê djoû, vou l' la tùmé sù ène anciène êre dù fåde. I gn avot doul bèle nwâre tère à make. Jùstùmint, Batisse dou Tchesse-mönêyes a dmandot toudi pou ses êrîyes dù fleûrs. La nosse Tibî Mèyî k'a raplènit in satch à houpe èt i l' va pwartù ou Batisse ki lî è dné ène pitite dringuèle, coume dù jùsse, don.

Lù Batisse, i frot spès ûsk'i s' piêdrot, la, lou. Il è passé l' nwâre tère avù in ptit rêdje, èt il è fwêt des potêyes avù in ptit broustiyon d' jèraniom. Èt i les è vindù bêzè tchîr à des tourisses.

Nosse père avot veû l' coup d' temps. Ç'astot en oume fwârt cùrieûs sù tous les cayets d' bwès. D'ayeûrs, il astot toudi stiké dins les cöpes èt les virêyes. Ét il avot ça d' bê: i vlot toudi êdî les malèreûs a lzî moustrant coumint fwêre pou tirer leû plan tout seûs. " I våt mî lèzî aprinde à mète ène bricole, k'i djot toudi, kù dùlzî pwartù in lîve tchöd dùspindù."

Il avot cåzé d' l'afwêre doul nwâre tère à èn oume d'Anvers ki vnot al tchesse à Bestin èt ki fjot dins les fleûrs. " Dj'a vùs bin tant k' vous nn öz, avot-i rùspondù, mês i mùl fåt fine rêdjîye: vous n'öz k'à l' passer coumifåt èt s' l'aplèni à satchots d' dîj kilos. "

Dj'avins in vî djâle al grègne, ki n'alot pùs. Djù m'avo amûzé à z a dùsmonter les twâs rêdjes. Dj'avo ramwintchî in toûr dù plantche tåtoûr dù pùs fin, pou fwêre in câré rêdje coume, dinltins, les djins rêdjint leûs dênrêyes avù, pou tirer les payètes èt les nichtés fû des grins. Nosse pére m'è voyî poul pwartù à Tibî Mèyî.

" Wê, di-dj', vous n'åroz k'à l' pinde après l' mwêsse-viêne doul cayùte, avù ène tchinne, pouz awèr pùs åjî. Adon, vous n'öz k'à mète doul tère dù fåde dùdins èt kcheûre lù rêdje pou fwêre tùmer l' poûssîre sù in satch sùl dagne. " " Bin ây! " avot-i rùspondù.

Dj'avo co bèvù avù lou ène jate dù tène cafè, èt l'afwêre avot dmèrù la.

Lu vikêrrîye ènn alot pyim pyam ou viyadje, coume d'aladje. Nosse pére avot rascontré in cöp û deûs Tibî Mèyî, èt s' lî dmander cwè poul rêdje. " I va bin! " avot-i rùspondù.

C'esst in cöp kù dj'avo rpassé pal cayùte, pou z awèr ène banslêye d'estèles d'abatadje. (Djù savos bin k'i les alot ramasser padrî les boukions k'abatint ås hesses ou Miyan Fayis). Dùvant d' mousser al cayùte, djù tape mes oùy pa padrî, èt keskù dj' wès?

Lù bê rêdje dù nosse djâle k'astot rabocté avù des trèyis d' fiêr pou fwêre ène cadje à lapin!

Dùspûs don, on dit toudi : " I n' fåt nin dner ça à Tibî Mèyî ", cand i gn è yåk k'è co doul valeûr, èt k'on l' vùt dner à kékin pou lî fwêre plêji.

Note Wikisourd

Ci rfondant cial a stî atuzlé e 1995, å cminçmint do pordjet « Rasgoutadje des bassårdinrèces ».

Il eploye on betchfessî scrijha « ù » po rashonner les prononçaedjes del sipotchåve voyale « u » /y/ et ë /œ/ k' i gn a e « Payis d' ersè ».

Li betchfessî ô, todi prononcî /õ/, est rindou pa li scrijha ö do sistinme Feller-Pierret.

Les deus n' seront nén ritnous pol Rasgotaedje.

Il eploye eto li scrijha å (po les mots rataetchîs å betchfessî å), ki rind on long O, mins ki pout riprezinter ossu on long A dins sacwants mots et dins des viyaedjes metou djusse astok.

Ci scrijha la serè wårdé dins l' båze di dnêye.