Ça s’ passe dins sale dès profèsseûrs dol sicole dès « Hirondelles ». Ç’èst l’ djoû dol rintréye do condjî d’ Pauque, tot timpe au matin. Li sècrètaîre èt lès profèsseûrs n’ont nin co arivé. Dolores, li fème di manadje, è-st-au r’nètchadje dol sale dès profs quand l’ tèlèfone sone. C’èst l’ dirèctrice qui lî dit qu’èle ni sèrè nin là po l’ rintréye pace qu’èlle èst bloquéye à l’aréyopôrt.
Maîs, vo n’-la-t-i nin qui, one miète pus taurd, èle ricît on-ôte apèl qui anonce qui l’inspècteûr èst su l’ vôye. Come madame Michel, li dirèctrice, n’èst nin là, tote l’èquipe dès « Hirondelles » èst dins l’imbaras. Po p’lu catchè tot ç’ qu’i n’ toûne nin rond dins l’ètablissemint, i dècidèt d’ djouwè l’ comèdîye. Si bin qui, Dolores si va r’trovu, sins l’ volu, au mitan d’one tèribe èmantchûre…
Dolores, c’èst Marie-Christine èto. One comère sipitante, amichtauve, qu’a do keûr èt dès idéyes plin s’ tièsse. Èlle èst profèsseûr, lèye-min.me, à l’ sicole di Maurlôye, one maujon èsprès po l’s-èfants… nin come lès ôtes : « E.E.S.S.C.F Établissement d'Enseignement Secondaire Spécialisé de la Fédération Wallonie – Bruxelles »
I-gn-a trinte ans did ci, èlle a arindjè on muséye dol guère 40-45 dins on p’tit local qui l’ sicole lî a d’nè en l’ lèyant fè à st-idéye. Èt d’ l’idéye, élle ènn’ éve, li comére ! L’an passè, li scole a r’cî on pris : « École Citoyenne Passeur de Mémoire » rimètu pa l’ « Fondation Auschwitz » copléye avou l’ « Communauté Française ».
Faut î avèr sitî à one fièsse ou l’ôte, à l’ sicole di Maurlôye, po comprinde qui, vèlà, c’è-st-on p’tit paradis… Dès bâtimints, onk po chaque mèstî à aprinde, sont-st-al dispaîréye au mitan dès près èt dès-aubes. Èt lès profèsseûrs, lès scoleûs – èt lès scoleûses, à preume – c’est dès djins jamaîs parèyes. Justumint, c’èst bin d’ zèls qu’il èst quèstion. Li pîce Dolorès’, c’èstéve on prèmî côp por zèls… po dès-amateûrs.
Marie-Christine – qui cause walon dispôy todi – lès-a scolè. Èlle a riscrît l’ pîce è françès po lzî bin fè comprinde li fin fond d’ l’istwâre. Èlle a priyè leûs parints do lzî causè walon, fè rèpètè dins leû patwès. C’èst ça èto qui faît l’ ritchèsse dol pîce, on comachadje dès identitès, dès manîres di causè, come à Chârlèrwè, come à Yon, à Rotchefwârt ou à Mautche. On pô come li rfondu walon qui rason.ne lès difèrints causadjes po-z-è fè one seûle èt bèle manîre di scrîre.
Marie-Christine ? Èlle èst su tos lès fronts, èlle a do toupèt à r’vinde. I lî faléve trovu one sale po djouwè l’ pîce. Èlle a tûzè au « Cercle », li sale dol parwasse, sèréye dispôy dès-ans. (Dins lès-anéyes 50, dj’î aléve au cinèma véy lès westerns, lès films avou Tarzan. Ça n’ nos radjon.nit nin, maîs lès sovenances sont pâr djoyeûses !)
Nosse comére a djouwè do tamboûr, a stî criyè pa tos costès. Si bin qui c’èst tote one tropléye di djins do viyadje qu’ont r’trossè leûs mantches po r’nètchè, po mète è coleûr, po gârni, po-z-èbèli, po fè qui ç’ place-la ritrouve l’âme do passè. Èt qui boutèt po rin, todi à rinde sèrvice, au bar, al cûjène, po r’cîre lès djins èt lzî sowaîtè l’ binv’nuwe.
Audjoûrdu, i-gn-a nin one samwin.ne qu’i n’ s’î passe one saqwè. On sopè, on momint po beûre li cafè, on mârtchî d’ Noyè, one confèrince, on bal musète, on djeû cautes, do brichôdadje, do téyâte è walon… I-gn-a po tos lès gouts, po tos lès-âdjes. Çoula, li comére î tint, vormint. Tos lès-âdjes. Come on l’ dit en françès : « intergénérationnel ». Do p’tit pouyon dins s’ poûssète, aus-èfants qui courèt, qui djibotèt su l’ sin.ne èt inte lès tauves, à leûs parints qui si r’trovèt divant one bone bîre qui ristchaufe lès keûrs èt dislôye lès linwes. Èt lès pus vîs do viyadje, tot soriyants d’ binaujetè, qui duv’nèt lès spèctateûrs d’one bèle djon.nèsse, lès acteûrs do bin èt bon vikè.
Jean, li binamé popa d’ nosse Marie-Christine mi d’jéve, avou dès lârmes plin lès-ouys « Joselyne, dj’aî dol chance, savoz, d’avèr one fèye come lèye ».
Volà, asteûre, li tèyâte walon èst su pîds à Yon èt, vous′ gadjè qui rin ni person.ne no l’arètrè…