Djibloû, mès djins, è-st-one gaîye pitite vile,
Coneuwe fwârt lon, fwârt laudje di tos costés,
Où ç' qu'on-î vike à l'auje èt bin tranquile,
Qu'a l'aîwe, li gâz èt l'élèctricité.
Èlle a ossi s' rivîre,
S' pont d' briques èt d' pîres
Èt cor on vî clokî
Rapétachî,
Trwès toûrs, dès places tote bèles,
Deûs monumints, sèpt tchapèles.
Èfants d’ Djibloû,
Voci l' grand djoû !
Vos-èstoz li fleûr di djon.nèsse…
Tchantez, dansez, l'amoûr èst doûs…
C'è-st-audjoûrdu li grande fièsse…
Èfants d’ Djibloû,
Gâre aus vîs djoûs ;
Profitez di vosse bèle djon.nèsse,
Tchantez, dansez, l'amoûr èst doûs…
C'è-st-audjoûrdu li grande fièsse…
Djibloû, mès djins, a conu dès batayes
Qu'ont ravadjî nos maujones èt nos tchamps ;
Èle s'a r'dressî maugré tote li mitraye,
Grâce al coradje di sès vayants-èfants !
Èlle a insi s’-t-istwêre ;
Po nos mémwêres
Ça n' pout nin yèsse rovî
Pa djon.nes ou vîs.
Fuchans fiérs di nosse vile,
Po l' grand oneûr di nos familes.
Djibloû, mès djins, faît dèl fine coutèleriye
Èt dès tchèreuwes vantéyes dins tot l' payis ;
Po fé dè guèsse i-gn-a one distilerîye
Èt pwîs l’ Sucrîye po bin nos ayinci.
Èlle a co, ç' qu'i faut vôy,
Sès bèlès vôyes
Èt pwîs, l' « nec plus ultra »,
S' fwêre aus pourcias…
Qu'on vègne di d'lon èt d' laudje
C'èst dé Sijebêrt qu'on s'astaudje.
Djibloû, mès djins, a dès-ôtes tites di glwêre :
À l'Institut èt v'nant d' tos lès payis,
Dès-omes vègnenut por aprinde, èst ç' à crwêre,
À fé poussî dès frumints, dès radis !
Ci qu' i nos d'mère à dîre
C'èst qu' i faut rîre
È d’djant bin djintimint
Come complimint…
Vunoz djon.ne djin, mam'zèle,
L'ocâsion èst vraîmint bèle…