Dj’arai in vélo

Èn årtike di Wikisource.
Aller à la navigation Aller à la recherche
Emojione 270F.svg Ciste ouve ci egzistêye eto divins ds ôtès ortografeyes : Feller-FauconnierRifondou walon.
Dj’arai in vélo
diviè 1910
Dj’arai in vélo


I.


Quand dj' wès passer n' bicyclette,
Dj'ai dè pwène, dj'ai coeur gros ;
Quand dj'intinds d'aller n' sonnette,
Dj'ai des frisons s'qu'à dins m' dos.
Djè crwès qu' dj'in f'rai n' maladie,
Si djè rattinds co longtimps.
Quand dju d'vreus m' passer d' chiquî
Dj' d'aurai ieune par abon'mint.


II.


Su ç' monde-ci, mes camarades,
On z-a chacun ses passions.
Mi, dj'ai l' passion d'aller râde,
In aute préfère les pidgeons,
Em' feume adore ès' paillasse,
Elle a l' passion du bos d' lit,
I faut l' satchi pa l' tignasse
Pou l'awè l'vée à midi.


III.


Djè comprinds bé qu'ène machine
Va m' couster branmint des sous,
Mai dj'espaugn'rai des bottines
Tint qu' dj' us'rai les caoutchoucs.
Pou l' malheureux qu'a d' s'agaces
C'èst in fameux souladg'mint ;
I n' fait pus tant des grimaces,
C'èst s' vélo qui l' rind contint.


IV.


I gn-a qu'ont si mau bel ér
Pou fé d'aller leu vélo ;
Is vol'nut leu panse in èr,
Wéte in pau s'is viqu'nut co.
Is voul'nut fé des vitesses
Pou moustrer qu'is sont malins.
Mi, djè n'mè cass'rai né tiesse
In lyî f'yant prinde mort-à-dints.


Refrain


Dj'arai in vélo,
Qu'on die c' qu'on vout, ça c'est m'n'affaire
Tout comm' in richard
Djè vous m' balader su l' boul'vard.
Dj'arai in vélo,
C'est mi qui vos l' dis qu'avant avère,
Cor què dju d'vreus r'vinde Mardjot,
Dj'arai in vélo.

Note Wikissourd
Dins Félicien Barry, « 270 sicrijheus e walon do Payis-Noer » Tchålerwè, 1958, p. 100. L' eplaideu shonne awè rprins l' ortografeye di l' oteur. I scrît : « Mile Lietård nd aveut d' keure di l' ortografeye, mins il aveut l' sinse do rite et del melodeye. »