Dji voe voltî d’ aler å bos
Eyet dins les paxhis astok.
Cwand dj’ mousse dins ene pårt di sapén,
Dj' roveye mes poennes et tot m’ traeyin.
Dj’ î schoûte tchîpler les moxhons
Ki rdjibelnut dins les bouxhons.
I tchantnut do swer å matén
Sins s’ ebarassî do mwais tins.
Gn a vraiymint d’ totes les sôres
Ki s’ evolnut d’ ene coxhe a l’ ôte.
Cwand dj’ arive dins les noejhlîs
Abeye ! Ardans ! dji m’ racoeti.
Adon, dji dmeure påjhire padzo,
E ratindant li ptit spirou
Ki vént code on moncea d’ noejhetes
Po ls etaessî didins s’ catchete.
Ene miete pus lon, corant dins l’ bos,
I gn a on bea ptit clair rixhot
Ki dischind åd triviè des spenes
Po si rtrover padzo les tchinnes.
Sol boird di s’ lét, gn a plin d’ cayôs
Eyet des yebes didins les trôs.
Des ptitès gurnouyes såtelnut;
So les grossès pires, ele tchantnut,
Binåjhes di trover sacwantès biesses
Ki lyeu dinront on dinner d’ fiesse.
Pus lon, dji croe esse dins on reve
Dji voe rdjibler on moncea d’ lives;
I mindjnut les gros pixhelét
Dins leu ptit boket etaessî.
Si dji shû el pitite voylete,
Dji waite todi a gåtche, a droete
Po esse bén seur di n’ nén rater
Les biesses ki s’ catchnut tocosté.
Durant des eures, dji rwaite les fleurs
Èm-n åme ès gonfele di bouneur
Cwand dj’ so rola. Vraiymint, dj’ vos l’ di :
Por mi, el bos, c’ est l’ paradi.
eplaidî so l' Aberteke (cours do 14 di måss 2017)