Deujhinme lete sint På ås djins d’ Corinte/XII
Dozinme tchaptrê
1. Dji doe continouwer a m’ vanter, mågré k’ gn a rén a-z î wangnî; mins did la, dji vos mosterrè les avizances et les dijhêyes do Signeur.
2. Dji cnoxhe ene sakî da Djezu-Cri k’ a stî sorlevé disk’ å troejhinme cir, la d’ çoula catoize ans – esteut ç’ avou s’ coir oudon foû di s’ coir, dji n’ è sai rén, c’ est l’ Bon Diu kel sait.
3. Et dji sai bén ki cist ome la a stî elevé disk’ å dvins do paradis – esteut ç’ avou s’ coir oudon foû di s’ coir, dji n’ è sai rén, c’ est l’ Bon Diu kel sait.
4. Et il a-st etindou des sacwès ki n’ plèt nén esse racontêyes, k’ ene djin n’ såreut ddja dire.
5. Å no di cisse djin la, dji m’ vantrè, mins dji n’ mi vantrè nén d’ mi-minme, apus k’ po rdire mi fweblesse et m’ flåwisté.
6. Mågré ki, si dji m’ vôreu vanter, dji n’ sereu nén on berdouxhî po çoula, paski dji n’ freu k’ dire li veur; mins dji m’ è rastén; insi, gn a nouk ki pinsrè ôte tchoi ki çou k’ i voet dins mi-minme, et ki çou k’ i m’ ôt dire.
7. Et po m’ espaitchî di divni on grandiveus potince, a cåze del nouzomté di ces messaedjes la do Bon Diu, on m’ a tchôkî ene sipene dins m’ pea, et on m’ a metou esprès ene andje da Satan – on diålotin – po m’ vini fote ene petêye, por mi n’ nén divni grandiveus.
8. Pa troes côp, dji m’ a stî plinde å Signeur, et lyi dmander k’ on m’ rissaetche ces pûnes la.
9. Mins i m’ a respondou: « t’ as ddja mi åjhmince, li gråce ki dj’ t’ a dné et ki nouk ni t’ prindrè ; n’ ass nén assez avou çoula ? Ni saiss nén ki m’ foice si voet pår divins l’ flåwisté ? » C’ est po çoula ki dji so tot binåjhe di m’ vanter di m’ flåwisté afén çki l’ foice da Djezus-Cri si rashîdaxhe sor mi.
10. Ça fwait k’ insi, po l’ amour do Criss, dji so binåjhe d’ esse flåwe, d’ esse traitî d’ tos les nos, d’ esse traké et d’ esse rascråwé. Ca, cwand c’ est k’ dj’ avize fwebe, c’ est adon ki dj’ so l’ pus foirt.
11. Dj’ a stî ene gros biesse, vormint, mins c’ est vozôtes ki m’ î a foirci; c’ est vozôtes k’ åreut dvou fé m’ riclame, ca dji n’ fouri nén moens ki ces swè-dijhant grands apoisses la, mågré ki dj’ so lon di m’ prinde po onk k’ åreut yeu pixhî Mouze ‒ såf respet.
12. Cwand dj’ esteu-st emey vozôtes, dji vos a mostré avou atimprance çou k’ on vraiy apoisse doet mostrer: des senes, des miråkes et des ovraedjes di grande valixhance.
13. Douvént ki vos vs av plindou d’ esse leyîs la hatche et matche? Si dj’ a motoit passé pus di tins dins les ôtès Eglijhes, c’ esteut po n’ nén esse ene ehale po vozôtes. Mins pardonez m’ çoula, ca dj’ aveu toirt (di n’ nén rpasser pus sovint).
14. Asteure, pol troejhinme côp, dji so presse a rivni adlé vos. Et dji n’ vos ehalrè nén, paski dji n’ ricwir nén çou k’ vos avoz a dner, mins çou k’ dji rcwir, c’ est d’ esse avou vozôtes. Paski ci n’ est nén ås efants a spårgnî po nouri leus parints, mins ås parints di spårgnî po nouri leus efants.
15. C’ est avou l’ pus grand des plaijhis ki dji pasrè do tins po vs aidî schaper vos åmes. Adon, si mi, dji vos voe si télmint voltî, est çki vos m’ abaxhroz co dins voste asteme ?
16. Vos convnoz ki dji n’ a nén stî ene tchedje po vozôtes, mins vos djhoz ki dj’ a stî malén come on rnåd, et vos edoûler.
17. A dju profité d’ vozôtes tot vos evoyant mes djins, k’ årént, zels, profité d’ vozôtes?
18. Dj’ a priyî Titusse di vos aler rinde vizite, lu ey èn ôte di nos frés. Est çki Titusse a profité d’ vozôtes ? Est çki nos n’ ovréns nén del minme manire ? Est çki nos n’ roténs nén sol minme pî-sinte?
19. Av tuzé tot ç’ tins la ki nos avans sayî di nos disfinde divant vozôtes? C’ est å no do Bon Diu ki nos vos avans djåzé, pal voye da Djezus-Cri, po vozôtes sawè cwè et kesse, mes binamêyès djins.
20. Paski dj’ a sogne ki, tot-z arivant addé vozôtes, dji n’ vos trovaxhe nén come dji vos vôreu bén trover, et ki vos n’ mi trovîxhe nén come vos m’ vôrîz trover ‒ ey adon, k’ i gn åreut do khigne-et-khagne, del djalotreye, del margaye, des toûs d’ rossea tchén, des canlaedjes, del grandiveusté et del dizôrnance.
21. Dj’ a peu ki, cwand dji rvénrè avå vozôtes, li Bon Diu n’ m’ ahontixhaxhe divant vos djins et dvant les djins d’ vos djins, et ki dj’ n’ åye a poirter l’ doû po bråmint des cis k’ ont fwait des petchîs d’ mannixhance, et s’ houtdiner a des sekelreyes et des plaijhis tchånreces, et ki nd ont yeu nole ripintance.