Deujhinme lete sint På ås djins d’ Corinte/IV
Cwatrinme tchaptrê
1. Ça fwait ki nos n’ piedrans måy coraedje, paski nosse mission, dji l’ avans rçû a cåze del bonté do Bon Diu.
2. Mins nos n’ avans nén vlou bouter catchetmint, ni toursiveuzmint come des rosseas tchéns, tot cotoirdant les messaedjes do Bon Diu. Mins, paski nos rclamans l’ veur platezak, nos adierçans li peure consyince des djins, et l’ Bon Diu end est l’ temoen.
3. Et minme si nosse boune novele avize målåjheye a comprinde, ele ni l’ est ki po les cis ki sont ddja moirts.
4. Po ces-la ki n’ volèt nén croere, c’ est les diès do monde teresse ki sont k’ aveulnut leu tuza, et ls espaitchî di vey li loumire del Boune Novele ki mostere li glwere da Djezus-Cri, k’ est l’ imådje minme do Bon Diu.
5. Ca nos n’ fijhans pont d’ riclame po nozôtes-minmes mins bén po Djezus-Cri, ki dj’ loucans come nosse mwaisse, et nozôtes djusse esse ses vårlets.
6. Paski l’ Bon Diu, k’ a dit « Fijhans l’ loumire po loumer li spexheur », il a loumé dvins nos cours po nos dner li loumire del sepiance del glwere do Bon Diu, leye ki rglatixh sol vizaedje da Djezus-Cri.
7. Mins, ci trezôr la est wårdé dins des spiyåvès djusses di taile, po bén mostrer ki l’ polance et l’ povwer et l’ foice dizeutrinne, c’ est l’ Bon Diu k’ els a, et nén nozôtes.
8. Nos estans strindous d’ tos les costés, mins nén språtchîs come des wandions ; dizavirés, mins nén tchôkîs al diloujhe ;
9. trakés, mins nén leyîs hatche et matche ; aflaxhîs, mins nén distrûts…
10. …et nos poirtans todi divintrinnmint li moirt da Djezus, tantea ki l’ veye da Djezus si pout eto leyî vir dins nos coirs.
11. Foice ki, nozôtes ki vike, nos estans tofer e dandjî d’ moirt a cåze di Djezus, po kel veye da Djezus soeye mostrêye divins nosse coir di tchå.
12. Di cisse façon la, li moirt ki nos travaye, c’ est l’ veye ki vos travaye.
13. Come nos avans li minme fwè dins les escrîteures ki deynut: « dji croe, adon, dji djåze », nozôtes eto, nos creyans, et dabôrd, nos cåzans…
14. …paski dji savans bén ki Lu k’ a rlevé Djezus d’ emey les moirts, i nos rlevrè sifwaitmint, avou Djezus, et nos poitrè avou vozôtes divant lu.
15. Paski tot çoula, al fén des féns, c’ est po vosse bén; tantea ki, a fwait ki l’ benixhaedje do Bon Diu si spåde a todi pus di djins, pus çk’ i gn a des priyires tocosté, po rmerciyî l’ Bon Diu.
16. Insi, nos n’ pierdans nén coraedje. Et minme si nosse coir di tchå dicwelixh et tourner a rén, noste åme, leye, si ramidere tos les djoûs.
17. Ca totes ces ptitès eguegnes ci ki nos subixhans asteure, et ki n’ durront nén, c’ est po nos apontyî ene aweure foû muzeure ki, leye, durrè advitam…
18. …puski nos n’ riwaitans nén les veyåvès sacwès, mins ôte tchoi, k’ on n’ voet nén. Paski les sôres k’ on voet, c’ est åk ki passe, mins les sôres k’ on n’ voet nén, ele durnut ameternam.