Oyi, dji di bin : li dérène !
Li fine dérène,
Là-wôt, tot là-wôt,
Al mércopète do pomî !
On v’s-a rovî, chipète,
On v’s-a lèyî-là, tote pèke !
Savoz bin, bauchèle,
Qu’on l’ va foute djus, vosse pomî,
Après l’iviêr !
On n’ vout pus dès p’titès Cwastrèsses
Dispû qu’ « Goldèn Dèlicatès′ »
A pris l’ mwinrnadje.
Aloz vos lèyî poûri à flate,
Èt pèstèler pa lès grossès vatches,
On djoû d’ Tossint ?
V’loz qui dj’ vos dîje qwè, nozéye ?
Si dj’ sèreu d’ vos, là, mi,
Dji m’ laîreu agnî pa lès gros-bètch
Pa lès masindjes èt lès tchactrèsses
Qui r’passenut.
Vos p’titès pîrètes rafûrléyes
Passeront rade yute di leû stomac′
Yute di leûs boyas
Èt s’aler r’ssèmer âre èt ote ;
Si cossèmer
Èt r’fé dès pomîs aus Cwastrèsses
Dès Cwastrèssîs
Plin lès bwès
Plin lès novias trîs d’ l’Eûrope.
Vos ravikeroz, pouyète,
Èt nos vos r’vièrans voltî
Bin d’pus qu’ cès dondons d’ Goldèn-là
À mète au batch, rècta !
Po poleur tini so ene pådje do live, li troejhinme estrofe (Åreuss bén volou, twè, / Esse e minme tchena k’ tes soçones, / Pu, don, sol tåve d’ on djintiyome ?) n’ a nén stî riscrîte.