On côp d’pus, mès sovenances d’éfant rivenè à djoû, come si èles potchins foû do l’ bwèsse au suke !
Nosse man Janine dijève « Josline è-st-on gamin falu, èle n’èst nin come les ôtes gamines si djintîyes qui choûtè bin ! C’è-st-èwarant, maîs èle a pa des côps dès droles d’idéyes ! »
Droles ? Maîs non di djo, comint estéve-ti posibe qui l’ci qu’on loméve Jésus, pus’ mwârt qui mwârt, éve plu gripè come on spirou su one chaûle di cwade, bin lon padrî lès nuadjes ?
Mi, dji ratindéve Pauke po one ôte saqwè !
Li djoû di d’vant, avou m’rodje pitite choupe so l’brè — siya, li min.me qui fiéve dès tchestès d’sauvlon à Wenduine — dji fiéve des traus pa t’t-avau l’corti èt djusqu’à l’poli po iésse sûre ! Lès pouyes abizins avou leû tchiésse su l’costè èt leûs ouys grand au laudje en caketant…
- Vinoz véye insi, gn’a l’gamine qui va sûremint trovu dès vièrs bin pus gros !
I gn’éve do strin din l’cina d’mononke Châle, vraîmint c’qui m’faléve po fè lès nids des clotches et po n’nin spiyé leûs ous ! C’éstève biskant ! Dji n’ lès éve jamaîs veyu cès coméres-là, maîs èles dansins sûremint come dès sotes pa t’t-avau tot : les aîwes do l’Wame, li ptit bwès d’sapins d’mononke Châle èt lès grandes’ièbes au d’vant, lès ruwales padrî, lès cortis èt… èles trèvautchins lès trèyis dès polis !
- Jo, abîye insi, r’waîtez bin pa l’finièsse, dj’ai vèyu lès clotches passè !
Chake djoû d’Pauke, c’estéve li min.me afaîre. Dji potchéve foû do lèt, coréve vitemint à l’finièsse èt rwaîtéve au lon, jusse au dzeû do tch’min d’ fiêr, din lès stroûbions d’foumîre do trin à vapeûr qui tanfléve en montant su Maurloye… Vos riyoz vos, maîs èles vinins d’Italie, ci n’èst nin avaur-ci savoz, èt èles faîyenut quéquefîye l’voyadje en trin…
Tote énondèye, à pîds d’tchaus dins mes botes, on paletot su lès spales èt m’rôbe di nûte en moleton, dji biséve èvoye au corti èt coréve come on lîve avou m’panî d’aurdéye !
Non.na, dji n’estéve nin sbaréye di r’trovu dins lès nids les ous qu’moman éve cût li djoû di d’vant à l’tinteure di chicoréye ! Binauche qui z’estins bin au tchaud avou lès-cis dès clotches èbalè dins do papî rlûjant di totes les coleûrs !
Djusqu’au djoû où, pa dzos lès grandes’ fouyes d’one reûbârbe, one saqwè di rglatichant m’a tapè dins l’oûye… Binamé bon dju, dès patins à rôlètes, dji ratindéve ça chake an, ci n’èstéve nin on sondje ! Comint c’qui lès coméres di Rome avins pu l’sawè ?
- Abîye, papa, i faut lès mète à mèseure !
Lès papa c’èst come dès sôrcîs, i sèpè tot èt i z’ont tos lès ostèyes po l’fè !
Atincion, dji vos esplike : dissèradje dès deûs bokèts do l’simèle, r’sèradje su mès solès, ablouktadje do l’rodje bride dins l’bon trau èt… bin mwin.nè s’fèye djusqu’au pazè po qu’èle si tègne à l’cwade à lindje po n’nin toumè !
Quéne afaîre !
Alè à patins ! Ça n’èst nin si malaujî savoz.
Bin vite, Joselyne s’a r’trovu su l’grand-route, a stî djusqu’à Jmele dîre bondjoû à Réné èt Bertha.
Fè dès toûs èt dès ratoûs… èle ni tûséve qu’à ça !
Pu rin di spéciâl à sès oûys : lès parints, li scole, lès dvwèrs, lès camarâdes, li chôcolat… èle aléve à patins à rôlètes !