Si tos lès-omes ont stu prustis
come vos, come mi,
on troûve qu’is n’ sont nin fêts turtos
come mi, come vos.
Qu’i sèyèsse lwègnes ou fwért sûtis
come vos, come mi,
i fåt qu’ trovèsse à r’dîre so tot,
come mi, come vos.
Ènn’ a qu’on ôt sovint djèmi
come vos, come mi;
l′aweûr dès-ôtes lès rind djalots
come mi, come vos.
Tot d’hant qu’ lès gros magnèt lès p’tits
come vos, come mi,
po fé parèy, i donrît gros,
come mi, come vos.
Dès-ôtes, s’is polît s’aritchi,
come vos, come mi,
tinrît lodjis’ dizeûr èt d’zos
come mi, come vos.
S’on djâgô l′zî boute on bon pris
come vos, come mi,
is prindrît lès cens’ sins fé l′ glot,
come mi, come vos.
S’onk di nos grands mêsses si disdit,
come vos, come mi,
i sèrè trêtî d’ tos lès nos,
come mi, come vos,
èt s’ dit ténefèye awè-nèni,
come vos, come mi,
on dîrè qu’i fêt l′ mårticot,
come mi, come vos.
Aw’reûsemint qu’ po lès djins d’èsprit,
come vos, come mi,
li monde èst fêt d’ tos bês djodjos,
come mi, come vos,
qui n’ riqwèrèt po s’ divèrti
come vos, come mi,
qu’ dès djins qui sont-st-à mitan sots,
come mi, come vos !…
eplaidî pol prumî côp divins l' 32inme annouwaire del soce «Lès auteurs walons», Lidje, 1939, pp. 21-22.