Ci djoû la...
Li tram dè Condroz vint dè r'monter :
Li rowe dè Val a r'trové on moumint d' pâhûlisté ; lès djins r'toumèt d'vins leûs-aroutinèdjes, on-z-ôt lès-èfants tchawer è l' coûr di li scole.
Ci djoû la...
Noûf-eûres...Maria, è s' corti, mète pinde lès bagues di si-ome so cwède al bouwêye ; Treûs-eûres dèdja qu'il-a, come tos lès djoûs, dihindou è beur' ...
Pocwè î tûse-t-êle tot d'on côp ?
Si fi lî apwète ine lète qui l' facteûr vint dè taper...
A deûs-eûres i s' vont creûhler avou s' papa...Pocwè î tûse-t-èle tot d'on côp ?
Ci djoû la...
So l’ pêre dè Many, lès bèrlin.nes sont sètchèyes foû dèl caje.
Al lampistrèye on-z-apontèye lès lampes po l' pwèce di l'après l' dîner. In-injènieûr sôrtêye d'on burô, rimousse divins in-ôte.
Lès molètes dèl bèle-fleûr toûrnèt so mèzeûre dèl cloke qui sone "haye".
Ci djoû la...
È fond, lès lamponètes trawèt neûristé dès galerèyes,
fèt miner sabat as spéres qui vont râyî al von.ne ;
lès bruts d' l'ovrèdje corèt tot-avâ l'beur'...
On mêsse porion va d'ine èquipe a l'ôte, louke si monte...câzî dîh eûres...dèdja !
Ci djoû la...
Ine blawète, on côp d'aloumîre… A stoke d'on costé, li blame èt s' copleû tonîre corè-st-èl galerèye, montèt d'vins lès tchafôrs, potchèt lès-ostèdjes, li beur' s'èblame... Lès-omes ont-st-oyou, ont compris...si mète à oute...mins wice ?
Si sâver...mins kimint ?
Ci djoû la...
Li soûrd groudinèdje a monté tot dè long dè pus' ...
So l’ pêre, divins lès burôs, on-z-a sintou tronler l’ tére... Ine neûre nûlêye èwal'pêye li bèle-fleûr...
On s' rilouke on moumint...Mon Diu, ci n'èst nin possibe... On côp d' feû !… Li tèlèfone !… Houkî lès sécoûrs !...
Ci djoû la...
Lès rmolètes toûrnèt, ine caje amonte… Dès-omes ènn.è sôrtèt, tossant, pîpant po haper on pô d' frisse êr… Vizèdjes ècurinés, ravadjîs… Leûs-oûy dihèt çou qu' i n' polèt raconter...
On cwér so 'ne civîre… Li prumî camarade...
Ci djoû la...
Di tos lès manèdjes, di tos lès costés, lès djins ont-st-acorou, l' sont la, divant l' grande pwète, lanwihant...
Lès-eûres passèt pus londjin.nemint qu' d’ åbitude
Kibin ‘nn' a-t-i di r'montés ?… A-t-on leûs noms ?… A quél-ostèdje ?… Èt qué novèles ?... Vochal lès houyeûs d' Mar'haye… Lès cis dè Kèssal… Ennè vinrè min.me di l'Allemagne...
Lès feumes, lès mames, lès èfants ratindèt… I priyèt...
 mitan d' zèls, Maria èt s' fi… Si fi qui n' dihindrè nin è beûr ci djoû la...
Li beûr, qui dè mons, ni l'î hap'rè nin s' fi c' djoû la...
Ci djoû la...
On ‘nnè r'montrè vint-onk… Li lèd'dimin èco treûs...
Èt treûs djoûs pus târd, lès deûs dièrins.
Vint-sîh copleûs dèl pwèce dâ matin qu'avît d'hindou come tos lès djoûs è l' fosse dè Many, ont fêt leû dièrin.ne payèle…
Ci djoû la ! Ci djoû la ! Ci djoû la ! Ci djoû la !
Ci djoû la
Ci djoû la
Intrez don lº 8,
Ci djoû la