Dj'èl vèya rim'ni on djoû al breune, hèrtchant 'ne grosse faguine a s' cou et on sètch di hwèces, mitan so si spale, mitan so s' trèyin. Lèya toumer s' tchèdje al tére, distèla l' cwède loyant l' faguine et s'achiya so l' soû po s' rihaper 'ne miyète. Achou avou lu, dji n' dimora nin keû bin dè timps, èt dj'èl fa-st-assoti po qui m' fêsse potchî è l'êr so s' djino, come a cavaye...èt i s'mèta-st-a tchanter so l' cadince del muzique :
Roum-dou-doum, Colas Roubin, / Vosse tabeûr ni va nin bin, / Vosse mèskène ni sét danser, / Vosse vârlèt n'èl sét miner.
A tos côps s' djino m'èvoyîve è l'êr èt dji hah'léve di tot m' coûr…
- Eco 'ne fèye, papa ! èco `ne fèye !-
Tot d'on côp, i s'arèsta, nah'ta è s' potche…
- Sèpez-v' bin qui dj'a rèscontré ?- d'manda-t-i
- Qui don, papa ?
- Dj' a rèscontré l' coucou, èt i m' a dit :
- N'avez-v' nin on p'tit èfant ?
- O awè, Moncheû l' coucou, dj'a-st-on p'tit valèt
- Adon, vos lî pwèt'rez çoula di m' pårt.
Et vola qui m' papa sôrta dèl potche di s' sârot, doûcemint, précieûsemint, come on trézôr, èwalpêye ènon gris papî… ine tâte di neûr pan a mitan souwêye, on pô racwèrnèye…
So l' côp dimèfiyant, dji hagna on p'tit bokèt dèl bètchète dès dints, adon pwis tote li tâte î passa, nin sins ponne, èlle èsteût 'ne miyète deûre...
- È-st-i bon l' pan dè coucou ? mi d'manda-t-i.
Mon Diu, qu' c'èsteût bon ! Bin mèyeû qu' nosse pan d' tos lès djoûs !
Oûv. dji sé qui s' gos', èl divéve â feû, la qui m'papa aveût fêt cûre ine pètêye crompîre èt tchâfer s' cafè, âs sapins, âs mwètès fouyes, â mahèdje di totes lès-odeûrs dè grand bwès.Redjårbé d' on live da Arsène Soreil, metou ey arindjî e walon lidjwès; boket parexhou sol waibe « Li walon d'èmon nos-ôtes » e 2010.