C’èst pô dèl dîre : l’annêye 2020 n’a nin stu l’ cisse qu’on-z-åreût volou k’nohe. Dispôy li meûs d’ mås’, nos-avans viké sins viker, avou l’ vète sogne d’atraper ine saqwè d’ måva èt tot rawårdant dès mèyeûs djoûs.
Tot k’minçant 2021, li pus grand d’ nos sohêts po tos vos-ôtes, c’èst l’ santé...
Èt avou çoula, l’ tchance dè poleûr si rapoûler ot’ tant qu’ possibe åtoû d’ine tåve, avou nosse famile, avou lès djins qu’on-z-inme èt lès cîs qu’ nos-avans l’ coûr qui hètche après...Li tchance dè poleûr ritrover lès tèyåtes, lès copin’rèyes, lès concêrts…
Nos-avans l’acèrtinance qui, ine fèye qui tot çoula sèrè po-drî nos-ôtes, lès moumints qu’ nos pôrans viker èssonle, åront on gos’ bin mèyeûs qui d’avance.
Di nosse costé, vos l’ savez bin, qui l’ COVID seûye co todi là ou qui nos ‘nnè sèyanse qwite, vos pôrez todi compter so l’èquipe dès bibliotéques dè Muzêye dèl Vèye walone, po rèsponde à vos r’cwèrèdjes so lès lingadjes d’èl Walon’rèye… D’ot’tant pus’ qui, à compter d’oûy, nos-avans ine novèle colégue, Isabelle, qu’ataque amon nos-ôtes avou tot s’ coûr.
Bèlès fièsses, mågré tot, èt totes sôres di boneûrs po l’ clapante 2021 qui nos ratind.