Volèz bîⁿ ? Nos d-irons tous lès deûs à l' ducace !
Tous les deûs, ça vût dire avû vo man pa-drî.
Nos d-irons pa l' piè-sinte, d'lè l' richo qui s' tracasse.
Vos m' pal'réz d' no boneûr ! D' vos f'ré inmarvoyî.
Aus tchfaus d'bos galopants, dju vos payré 'ne tournéye.
Dju chwasiré pour vous l' pus grand tchfau du troupia.
Vo man, in nos rwétant, asprouv'ra d' fé 'ne riséye.
Li, si 'le voloût monter, dju l' mètroû d'vins l' troumia.
Alintour du kiyos', nos f'rons sacantès danses.
Nos roublîyrons lès djins, tout-à nos raviser.
Dju vos paleré tout bas, si bas - come dins 'ne souv'nance -
Què s'ra vo cœûr tout seû qui m'intindra d'viser.
Nos ind-irons à frites, sans pinser què l' temps passe.
Nos bwârons d'vins l' minme vére, èn' sondjant qu'à djugler.
Mès vo mére, in vyant l'eûre, s' plangn'dra qu'èle a d's-agaces
Et nos compèrdrons bîⁿ què c' èst l' moumint d' raler.
Nos r'vérons tout douc'mint, léchant l' dansâdj' sus l'place.
Dju sèrré vo mènote, vos m' wétrèz dins lès-îs.
Nos nos arindjrons bîⁿ pou qu' vo mére nos dèspasse.
Dju vos d'mandré 'ne brasséye, vos n' mè f'rèz nîⁿ péyî.
Volèz bîⁿ ? Nos d-irons tous lès deûs à l' ducace ?
Arsouyeries
Ciste ouve ci egzistêye eto divins ds ôtès ortografeyes : Rifondou walon.Arsouyerie
Cayés walons lº 13,
Arsouyerie