Ding, Dong !! Volà mînut´ mwins dîj èt on sone lu dèrin côⁿp à messe.
« Duspétchez vos », ouflét mu grand-pére an m’ ratindant padrî l'uch. Dju mètéve an vitesse mu paltot èt m' bonet avu on gros pompon èt dju lî dné fièrmint lu mwin po-z ennalè juska l'èglîje.
So l' voye, dju choté dins l’ nive, tot spitant su prope pantalon èt dju l’oyé sôⁿrtu on nondidju du tinzintins. An moussant à l'èglîje, dju rchoûrbé mu gote o nez avu la mantche du m' paltot. Adon, dju ramassé one berlafe padrî l'orèye.
Pu dj’ mousséve dins l’ keur do l'èglîje.
Tot au long dol messe, dju choûté lu curè qui fjét su discoûrs, tot rêvant do plaîji ku dj'auro an sôⁿrtant. Come d’èfet, al fin dol messe, on aveûve l'abitude du sohaîtè « djoyeûs Noyè » à tortos avant du rudchinde al maujon.
O ! po rudchinde, dj’asté on djinti gamin, ca dju n’ vlé nin ratè lu rintrêye al maujon !
La, mu grand-mére avét r'netchè tote lu maujon èt avét mètu an route les lumîres do sapin, qui fjint des clignètes du totes les coleûrs.
Il astét ddjà fwart taurd et dj’asté hode, mès dju ratindé avu impacyince lu vnûye do neûr boudin, tot tchôⁿd, avu on pôⁿ du compote du peume.
Après çoula, hop ! il astét timp d'ènn´ alè coûtchè !
Al fin des fins, ç'astét assèz simpe come sîze du Noyè, mès por mi, ç'astét MU MADJîYE DU NOYè !