Èl séson dès mûmûres

Ciste ouve ci egzistêye eto divins ds ôtès ortografeyes : Ortografeye do scrijheu — Rifondou walon.

Ferdinand Davaux

Èl séson dès mûmûres

rortografiaedje da « El Bourdon » lº 705

1913

emey tchapele (prononçaedje a pô près zero-cnoxheu)

I.

Al séson dès mûmûres,
On s'èva ô bos
A pîds ou an vwèture,^[1]
An tram, an vélo;
An costumes su mèsures
Ou an bleûs sôros;
Dès solérs pou tchôssures,
Ou dès gros chabots.
Al séson dès mûmûres,
On s'èva ô bos

II.

Al séson dès mûmûres,
On wèt dins lès bos
Sins s' soucyî dès piqûres,
Pas, mames èt mârmots
Chwèsi toutes lès pus mûres
Dins tous lès picots
Pou fé dès confitures
Ou bén dès sirops…
Al séson dès mûmûres,
Tout l' monde va ô bos

III.

Al séson dès mûmûres,
Lès pus sâdjes sont sots.
On-ètind dès sclamures
D'rî lès tas d' fagots,
I n' manque nén dès skètures
Ôs clér′ caracos.
Gn-a dès scâres ôs doublures
Èt minme ôs pal'tots.
Al séson dès mûmûres,
Lès pus sâdjes sont sots.

IV.

Al séson dès mûmûres,
An r'vènant du bos,
Lès fîyes ont leû tchèv'lure
Pindante su leû dos;^[2]
On court dins lès patures
Come dès djon.nes bèdos;
On sôtèle lès clotures
Èyèt lès richots;
Al séson dès mûmûres,
An r'vènant du bos.

Pî-note

1. Dj' ô bén: vweteure-cariole, saetcheye pa des tchvås: on est dins les anêyes 1900 !
2. Paski, po nd aler, elle avént dandjreus fwait on topet.