Å pîd dèl Creûs

Èn årtike di Wikisource.
Aller à la navigation Aller à la recherche
Emojione 270F.svg Ciste ouve ci egzistêye eto divins ds ôtès ortografeyes : Mwaisse modêyeRifondou walon.
Å pîd dèl Creûs
rortografiaedje da Jules Feller
Å pîd dèl Creûs

Vo-le-la donc so l'djibèt, lès deûs brès′ tot å lådje,
Lu tièsse so lu stoumac, lu cwêr tot rôlyé d'song ;
Po totes sès plåyes lu mwêrt su fait vèye sins astådje ;
Dèdja d'vins tos sès mimbes corèt dès longs frèssons.

I r'lîve a mitan s'tièsse. Sès påpîres intedrovawes
Lèyèt passer 'ne loukeûr qui va s'piède tot å lon.
A qwè sonje-t-i ? Sèreût-ce al nutêye atimprawe
Qu'atome sipèsse dè cîr so l'vèye èt so lès monts ?

Sèreût-ce å vint qui hoûle, a l'têre, a l'rotche qui tronle ?
A l'tonîre qui s'alome èt qui crahe avå l'cîr ?
Å solo tot rodje-neûr qui s'catche, si bin qu'i sonle
Qui l'monde pûni rinteure èn-on c'mahèdje grossîr ?

Sèreût-ce a l'ingråte foule quu s'coûr, treûs ans è rote,
A couvrou d'sès bontés, tot lî prétchant s'doûce lwè ?
A cisse foule qui, tot-rade, la, si rapoûléve tote
Po l'moûdri, lu qu'nawêre ille aveût r'clamé Rwè !

Sèreût-ce ås deûs lârons, quu l'aute djeûre èt l'aute préye.
— Don-ci l'infêr qui s'droûve, èt don-la, l'paradis !
Sèreût-ce å coûr sonnant du s'Mére, qu'èst la, plantêye,
Pårtihant, corèdjeûse, lu mårtîre avou s'Fi ?

Ayi, tot çoula passe èt vint hirî vost åme,
Djèsus, Maisse !...Et portant dju sé qu'vosse grand toûrmint,
C'èst d'vèye quu, tant d'amour, tant d'sofrance èt tant d'låmes
Nu m'ont polou rateni du v's offinser brammint

Cès spènes qui v'pondèt l'front, du mès pètchîs c'èst l'bâne !
C'èst zèls qui v's ont clawé sins pîtié so vosse creûs.
Ah ! vo-me-la, adjènî, rawårdant qu'on m'condâne !...
Portant, Dièw, vosse parole pout co m'såver ! Djèl creû !

Sovnez-ve dè bon lâron, dè Piêre èt dèl Madeleine ;
Tot vèyant leû r'pintance, vosse bon coûr su mouwa :
Come a zèls fez-me one åme d'oreûr po l'pètchî pleine ;
Vikez djoûrmåy glorieûs la qu'd'avance dju v'touwa.

Note Wikisourd

sicrît li 20 di måss (1904), on londmwin d' Passion; tecse riprins dins l' Antolodjeye di Vervî (1928), riscrît e Feller pa Jules Feller lu-minme, p. 429-430.