Wikisourd:Prezintaedje

Prezintaedje

Wikisourd c’ est l’ coxhete waloncåzante del grande waibe Wikisource, on pordjet del soce Wikimedia (come Wikipedia u l’ Wiccionaire). C’ est ene bibioteke limerike ki n’ contént ki des ouves e walon. Ele est libe, dinêye po rén, et on l’ pout tertos recråxhî.

Wikisourd ?

Wikisourd est l’ pus direk ratournaedje di Wikisource. Å cmince, ci pordjet ci s’ loméve Project Sourceberg, on djeu d’ mots avou l’ Project Gutenberg, çou k’ esplike eto l’ logo d’ oridjinne d’ on iceberg. Il a stî metou so les fyis li 24 di novimbe 2003 e-n inglès, dizo l’ adresse sources.wikipedia.org. Li no Wikisource a stî voté pås uzeus li 6 di decimbe 2003 ey a bagué a l’ adresse wikisource.org li 23 di djulete 2004. Li mot source (sourd e walon) a stî wårdé paski ç’ pordjet ci diveut-st aprume permete a Wikipedia di raloyî si contnou a des sourdants (des referinces).

• 
  Foto d’ oridjinne do pordjet Sourceberg.
• 
  Li logo d’ asteur vectorijhî.

Contnance

1. Wikisourd, c’ est ene bibioteke limerike

   Çoula vout dire ki Wikisourd n’ est nén on bastimint avou des lives e papî k’ vos ploz epronter u-z atchter. C’ est ene waibe ki vs permete di lére des ouves k’ ont stî riscrîtes et k’ vos ploz aberweter so vo copiutrece u vo sûtifone.

2. Wikisourd est libe et diné po rén

   Tot çou ki gn a so Wikisourd, vos l’ poloz rprinde, el diner a d’ otès djins et minme li rvinde, çoula sins rén payî et sins rén dmander a nolu. Vos n’ avoz nén dandjî di vs eredjistrer so Wikisourd po poleur lére u-z aberweter les ouves ki gn a. Les ouves ki gn a sont dizo licince libe CC BY-SA u dvins l’ dominne publik.

3. Wikisourd est recråxhî pa des bénvlants contribouweus

   Les djins ki boutèt vaici ni sont nén payî et n’ sont nén raloyîs a on contrat. I fjhèt çoula pol plaijhi. Çoula vout dire eto k’ i s’ pout ki gn åye des ptitès måcules vaici, vaila. Èn tchictez nén a rcoridjî, on pout tertos aidî a-z amidrer Wikisourd. Vos-minme, si vos l’ voloz, vos ploz ns aidî.

4. Wikisourd contént des ouves sicrîtes

   Wikisourd n’ est nén ene mediateke (come Commons), on n’ mete ki des scrijhaedjes : des lives, des letes, des arimés, des pårticcions d’ muzike. On mete aprume des scrijhaedjes k’ ont stî metous so papî, mins on pout eto mete des E-lives (E-book) s’ on pout acertiner k’ il egzistèt.

5. Wikisourd contént des ouves e walon

   Ene ouve sicrîte e walon e metowe vaici, so l’ pordjet waloncåzant. Si l’ ouve est e walon mins k’ l’ adrovaedje est scrît pa ene ôte djin e francès, on l’ pout tot l’ minme mete vaici. Ene ouve sicrîte e francès e metowe sol pordjet francèscåzant, minme s’ ele contént sacwants ptits bokèts e walon : metans, les motîs francès-walon (Cambresier, Haust, evnd). I gn a des cas målåjhîs, come les Poésies en patois de Liège, mitant francès, mitant walon. Dins ces cas la, i s’ fåt dimander si l’ ouve a scrîte aprume po on francèscåzant u on waloncåzant.

6. Wikisourd permete les ratournaedjes da lu

   Si vos vloz ratourner ene ouve k’ est dzo licince libe so Wikisourd, vos l’ poloz ! Si vos vloz ratourner ene ouve k’ est eco dizo abondroet, adon i vos fåt l’ acoird di l’ oteur. Çoula våt eto po les rashidaedjes ortografikes.

7. Wikisourd n’ est nén Wikipedia

   On pout riscrire ene eciclopedeye k’ a stî eplaideye so papî, mins on n’ mete nén des årtikes di Wikipedia po ndè fé on live.

8. Wikisourd n’ est nén Wikilive (Wikibook)

   Si vos vloz scrire on live (purade on E-live) da vosse, c’ est so Wikilive k’ el fåreut fé.