Lu Covite 19 mon.ne lu tère duspwîs dès mwès ! Lès courbures dul minêye montèt, montèt.
Lès cé(e)s ki sougnèt lès djins su touwèt à l’ovradje, l’orèca (ôtels, restorants, cafès), lès caf’tîs, lès plèces à mougner s’aratchèt lès tchfès. Èt lès scolîs sont è scole dus lon.
Lès djins ki boudjèt brâmint, lès sportifs, sont ossi toutchès pal minêye. Çu mwês cayèt la è rindu patrak nos vicadjes. Nos idêyes su l'av'ni sont-st èvoye !
Faut trovu dès ôⁿtes idêyes po n' nin duvnu fôⁿ !
On s’î fwèt o on î passe !
Poussèz à tins sul boton « pôⁿze » èt profitèz du cès momints ci po prinde la vîe du bon costé. Nu choûtèz nin vos nièrs èt avancèz. Nu vos léchèz nin stoufér pa dès peûrs. Dijhèz v' k' on è sôⁿrtrè !
Après in dèr racloyadje, no vla sul boune duschinte ! Bin ây : lès courbures rutchindèt, èt rate ! Mès dju n’astans nin co sôⁿrtus dul minêye ! Pont d' Noyé, pont d' Novele Anêye ! C' èst tèripe !
Les comèrces sont drovus mès nin tortous.
Pont d' cwafeû ! Pont d' masseû !
Dju vons sèy dès ipîs èt dès paralizès.
Lès djins cumincèt à s' duscoradjè. Ça va tournè mau, tot ça !
Schoûtèz bin, vozôⁿtes lès djins ki sougnèt lès nièrs : vos auroz d’ l'ovradje ! Èt vozôⁿtes ossi lès sogneûs et sogneûses. Co dpus k' lès docteûrs.
Au passadje, on vos rdit co merci brâmint des côⁿps !
Alèz ! Fåt vikè ! Èt bin vikè ! Nu nos lèchans nin dusbrôⁿlè. Èt, come lu djot Anny Cordy…
Ça îrè mî dumwin !
Come tot finirè bin
I faut prinde lu vîe
Come èl vint !
Èt èle vint bin. Anut′ au prumî mwès d’ l'anêye 2021, èbin, on va v' pikè, si vos vlèz bin ! Mès on dèt l' fére, si on vut sôⁿrtu dul minêye. Ça srè lu dèlivrance po tortous !
Èt on pike, on pike,… mès pattavau !
Quèn ovradje !
Cink, chîs sôⁿrtes di picadje !
Èt l' bon, c’ èst l' qué, po contrer çu saloprîe la d’Afrique do Sûd, o l' ôⁿte camarâde ki vint dul Mantche, èt tos leûs ôⁿtes pitits fréres.
On ratind nosse toûr !
On dvint in pôⁿ mwês ! Mès on s’î fwèt. On s’ tint à cârô. Gn è k' ça à fwêre !
Moutè ku l’ solia nos amon.nrè dès bounes noveles po l’estè, èt k'on pôⁿrè rviker in pôⁿ !
An ratindant, bon coradje à tortous !
sucrît lu 2 d' mârs′ 2021.
- Accint et sistinme ortografike
L’ accint del sicrijheuse, c’ est l’ ci d’ après Libin èt copurade d’ après Sint-Houbert.
Rumarke su les « O » longs Ciddé, on è ruscrît avu l’ sistème Singuliers (« ôⁿ ») po l’ cogne naziålijhêye, et l’ sistème Feller-Léonard (« au » pou l’ O long drovu.