I s’ louméve Samir, Samir Salman...
O ! Ci n’èsteût nin onk di cès-omes sincieûs qu’èst k’nohou d’ lådje èt d’ long èt qu’on l’zî veût leû pôrtrêt d’vins lès gazètes. Nonna ! C’èsteût-st-ine åme fwért simpe, come, parèt-i, li Bon Diu lès veût voltî. Mins i féve li pus bê mèstî dè monde. C’èsteût lu qui sonéve ås clokes è l’èglîse dèl Nativité a Bètlèyèm. Gråce a lu, treûs côps sol djoû, on djôyeûs hiyèdje djoupléve foû dè clokî èt s’ènondéve è bleû cîr di Palèstène afîs´ dè rispåde avå l’ tére li méssèdje di påye èt d’èspwér d’å mamé èfant qu’aveût nèhou la, i-n-a deûs mèyes ans .
Li bale djwîve l’ac’sûva, la qui rotéve påhûlmint å mitan dèl grande rowe, po s’ rinde so posse.
I touma sins moti, sins djèmi... Li pôve cwér si ståra so l’ pavèye, lès brès´ è creû, tot fî parèy qu’on spaw’ta qu’ine beûlêye a bouhî djus.
Lès sôdårds, pitits-èfants d’ victimes div’nowes lès pus tèribes dès bourias, l’ont lèyî la, sins rin fé, dès-eûres å long, dismètant qui s’ song´ si k’mahîve avou l’asfale ; pidjote a midjote, sins hikèts, tot doûcemint, l’åme da Samir s’ènn’a’nn’alé al rèsconte dè Grand Mêsse !
Yavé ! Avez-v’ bin tchûzi vosse peûpe ?