Wikisourd:Depot/Lucyin/A ene viye måjhone

Racsegnes sol tecse metou dvins l’ depot

Tite	A ene viye måjhone
Oteur	Henri Simon
Date do scrijhaedje (do ratournaedje, do rortografiaedje, evnd.)	5 d’ avri 2021
Date d’ eplaidaedje (so Wikisourd)	5 d’ avri 2021
Depôzitaire	Lucyin
Info	rortografiaedje da Lucyin Mahin, e Rfondou walon

A ene viye måjhone

Bråve viye måjhone do bon vî tins,
Avou t’ souyeute dihåmonêye
Et t’ panse ki boute dizeu l’ pavêye,
Dji n’ sai vraiymint çou ki t’ sotént !^[1]

Dj’ a todi-måy sogne å matén
Di t’ trover petêye a l’ valêye,
Bråve viye måjhone do bon vî tins,^[2]
Avou t’ souyeute dihåmonêye.

Schoûte cial : mi vouss rinde bén contin ?
Dimeure co la bén des anêyes,
Dimeure-z î po bouter m’ poizêye
Et loukî passer mi etermint,
Bråve viye måjhone do bon vî tins !

Dins Li pan dè Bon Diu, 1î eplaidaedje, Lidje, 1914 p. 36, riprins dins l’ grosse antolodjeye Piron, Mardaga, Lidje, 1979, p. 262.

1. Mwaisse modêye : ritche rimaedje « tins », « sotint ».
2. Mwaisse modêye : ritche rimaedje « matin », « tins ».