Nos-alans fè ronflè nosse vwès come one trompète.
On s’ nauhit trop sovint d’ètinde one vwès d’ mizrète,
Qui tchantes lès tropês, lès-amoûrs èt l’ boneûr,
Kiminçans su on ton digne di l’ ampèreûr.
Voci lès novês timps qu’éve prèdit l’ Barone.
Tot-a-fêt va candjè, pace qui l’ Bon Dieû l’ordone.
On va div’ni mèyeûs qu’on n’éve jamaîs stî.
Gn aurè pupont d’ voleûrs, èt t’tafaît n’îrè qu’ mî.
On vièrè l’ vî Davin riv’ni avou s’ pèrouque,
Et, d’vins l’ timps qu’ dj’alans vêy, on n’ mougnerè pus qu’ do souke.
Sètche dame, surtout, prin sogne di l’ èfant,
D’ l’èfant qu’ Marîe-Louwîse a d’nè au conquèrant,
Nos l’ vièrans è carotche on djoû alè a s’-t-auje,
Èt do rimè la d’sus, Antwène èst d’dja binauje.
C’èst ti qu’ nos ramînerè l’ bon timps do pére Adan,
Cwand sès-èfants avint deûs treûs mèchons par an.
D’vins pô d’ timps on t’ vièrè, après one kimachrée,
Rilûre au primî rang dol France sibarée.
C’èst ti qu’ nos f’rè roviè tos nos-ancyins maleûrs.
Èt qu’on vièrè anfin pormînè su dès fleûrs.
Bluchêr’ èt Vilin’ton’ n’ sèront pus qu’ des Gribouyes,
Èt lès sôdârds do Nôrd trôneront come dès fouyes :
To l’s-abaterès tortos, tot come on cheût dès pwès,
Èt l’ pês r’vêrè avou l’ vinkeûr di tos lès rwès.
Por ti l’ tère pwaterè dès fréches, dès cwagnoûles,
Dès nèches, dès heûpons, dès fleûrs èt dès rampioûles.
Lès gates rapwateront do lècê plin leûs pis;
Gn aurè pupont d’ rôleûs, pus d’ pwèson, pus d’ tèzis ;
Lès leûs èt lès-ègnês au tchamp djoûweront èssône,
Èt su lès purnalîs on n’ coderè pus qu’ dès prônes.
On gros live dîrè tot çu qui t’ pére a faît;
Come li, to d’vêrès on-ampèreûr parfaît.
Lès-avônes, lès blès rigordjeront d’vins nos grègnes;
One flotche di réhins vêrè flachè nos vègnes ;
Sins-èsse rissèmè, l’ grin d’ li-minme vêrè ;
Èt dès tchin.nes do bwès, li lâme si sgoterè,
Èt nos l’ pôrans houmè foû dès p’titès potales.
I gn aurè co portant dès cis qu’ su dès nèçales
Vogueront po fè l’ guêre, èt, su l’ fwè d’on trésôr,
Îront bin lon d’ voci, po-z-î ramassè d’ l’ôr.
Mautche vôrè s’ sotni, come lès ôtès vêyes :
Tos lès maçons d’ Hologne apwateront leûs-ostèyes,
Et, podrî l’ vî Rèn’son, lès Djènâd, lès Massârt
Martoqueront à plaihi, po r’lèvè lès rampârts.
Lès Rûsyins n’ sont nin blancs, ca lès Francès an masse
Îront tot qu’à Moscou lès k’sètchè po l’ tignasse.
Cwand ç’ti-ci sèrè grand, d’vins l’ vêye èt d’vins lès tchamps,
Il îrè po s’ plaihi, po sèmè dès-aidants.
On n’ lès ramasserè nin, ca l’ tère foû di s’ panse
Flanquerè pottavau l’ monde one rude abondance.
Dj’ n’aurans pus dandjî d’ boûs, ni d’ rèstê, ni d’ trèyins :
On vièrè v’ni tot seûs lès crompires, lès grins,
Anfin nos n’aurans pus adon qu’à drovi l’ botche.
L’ lin.ne su lès bèrbis crécherè an div’nant rodje,
Ou si vète qui prè, èt, po l’ pus bê do djeû,
Nos n’aurans pus dandjî do l’ portè mon l’ tindeû.
Èbin, ç’ charmant timps-là, c’èst nin mutwè di s’ faute,
Mês l’ Barone, on bê djoû, l’ vèyéve an tapant l’ caute.
C’èst por ti qui l’ tère toûne èt qu’on veût d’vant l’ solê
Rôlè on firmamint qui d’vint todi pus laid ;
Corètche ! divin grand, èt qu’ nos t’ vèyanche on-ome,
Pusqu’on t’a batisè do nom di p’tit rwè d’ Rome.
 ! qui dj’ vike lontimps! afin qui, d’vins mès vêrs,
Dji pouche tchantè t’ nom pod’vant tot l’ univêrs.
Si dj’î pléve arivè, dj’ crîyerè come on-Arâbe ;
I m’ sône qui dj’aurè one vwès come on diâbe.
Ci n’ serè nin l’ Fouldak, ni co l’ maurlî d’ Wahau
Qui m’ sèrint comparès po gueûlè come i faut.
Si min.me Hinri Côrhê arivéve do L’ Rotche,
Hinri Côrhê sèrè contin do clôre si botche.
Kimince, p’tit chèrlou, do rîre à tès parints ;
Ti mére a stî dî mwès d’vins dès bin grands chagrins.
Console-nos tortos; mosse-nos qu’ to sés rîre :
Mosse-tu dispièrtè, po prétinde à l’ampire.