Au coron do Brûssåt, dj'ê vèyou l’ vî Hèrkot,
Cori podrî Tassin, qu’ol traîtéve[1] di sot.
I coréve lès près, lès tiêrs èt lès hourêyes ;
Èt Tassin n’ respond nin a totes sès bièstrêyes.
T’ès-st-on drole d’ èfant, dit-st-i, tot èwarè ;
Poqwè ce qu’adlé mi, to réfusse do d’morè ?
Mès tropês sont à l’ombe, èt mi dj’ va fè m’ prandjîre.
Ni veûs’ nin on tési qu’èst la catchè d’zos l’ pîre ?
Agnès’ a rapwartè dol surale èt do djè,
Po-z-è dnè aus fautcheûs, qu’ont si seû qu’ po pètè.
Èt dol timps qui l’ solê vos-a r’sètchi l’ garguète,
On n’ ètind qu’ dès crécions qui r’sémièt leû soliète.
Agrabèle èt Djétrou m’avint fè l’ fotche au dos,
Èt dji d’véve èsse, après, co turlupinè d’ vos.
Agrabèle èstéve neûre èt v’ s-èsteuz come li nîve
Maîs ni v’ vantez nin tant d’aveûr li coleûr vîve.
Lès frambauches, on lès mogne ; on laît là lès heûpons.
Waîtez bin quî qui dj’ su, èt comptez mès motons.
Dol lin.ne di bèrbis, dj’ èn’ ê one halonêye.
Èt l’ blanc lécê jamaîs ni m’ manque tot’ l’anêye.
Èt dji tchante si bin, qui R’mauke Morènier,
S’il è savéve ostant, èt s’reût jolimint fiér.
Pus dji n’ su nin si laîd ; dj’ m’ ê vèyou d’vins l’ Maurtchète,
Cwand l’aîwe, ou djoû, dvant mi coréve bèle èt nète.
Dji vau bin Picolot, si dji n’ su nin trompè ;
Èt portant vos v’ sauvez, qu’ dji n’ vos pou ratrapè.
Pa ! vinèz ; pa ! moussez tot’ qu’au fond di m’ cassine.
Qu’ dji v’s-aprinde à cwarnè on pô mî qu’ Galopine ;
Maugré qu’ tos nosse bês aîrs, c’èst bin li qu’ols-a faît,
Li qu’èstéve èt min.me timps l’ bon médcin dès porcês.
Vinèz ! say’ d’adjustè m’ flajolèt à vosse botche ;
Cwand dj’ l’ ê mostrè à Zande, i l’ vléve mète èt s’ potche.
C’èn’ è-st-on bê, çti-là, d’ flajolèt à sèt’ trôs.
C’èst l’ tchèsseû Dèvilèrs’ qui m’in’a faît cadô.
C’èst nin on-instrumint come è Lîdje èt Aubèl,
Èt qui n’ fêt nin pus d’ brut qu’on rat, cwand on chufèle :
Çti-ci, dès mî toûrnès-èt d’ bê bwès d’ sawèri,
A siervou pus d’ vint’ ans, à l’ Rotche, au vî Tchîri.
Tchantchèt ol v’léve aveûr, èt mi sitôt dj’arive :
« Dji tol dine », dit-st-i ; maîs c’èst qu’i faut qui dj’ crîve.
C’èst nin co tot, valèt ; dj’ê co pus d’on-ègnê,
Èt totes lès coleûs rilûhèt su leû pê :
I sucèt tos lès djoûs, l’ blanc lècê d’ deûs treûs gades ;
Agnès’ m’a bin priyè d’olzî minè torade ;
Èt dj’ol frê, s’ to n’ vous v’ni d’morè avou mi.
Vinèz, pus d’one mayon vint d’arivè voci,
Po v’ dinè dès-eûyèts, dès pavôs, one tulipe,
Dès fleûrs di d’vins lès grins èt dès rôses d’Èjipe ;
Waîtez qué bê tchapê qu’ile ont trèssè d’ leûs mwins,
Avou do jolibwès-èt lès fleûrs dès jasmins.
Dji v’ tchusich’rê dès fruts, dès nèches èt dès pron.nes.
Èt co dès fleûrs qui, cwand qu’ile sont mètowes èsson.ne,
Fèt one si bone odeûr, qui v’ lès sintrîz d’ Pèkin.
Taîs’-tu, Herkot, to d’vins foû do djône Tassin.
Lî prèsintè tot ça, c’èst come si t’avéves
Minè d’sus tès mèchons dès cayôs èt dol gréve.
Napolèyon, dit-st-on, aureût oyou l’ migrin.ne,
Si n’ éve pus vèyou lès tchamps, lès bièsses à lin.ne.
Li liyon sît lès leûs ; l’ leû coûrt après l’ègnê ;
Èt, come dit l’ Lîdjeû, valèt : chacun s’-t-oûhê !
Lès boûs riv’nèt dès tchamps è trin.nant leûs tchèrowes,
Èt l’ pèlisse dol nut’ a d’chindou d’vins lès rowes ;
Portant, dj’ su co pus foû, to dirès qui dj’ radote.
Djans putot travayè ol vègne da Lambote ;
Fans putot dès banstês, qu’ do passè l’ timps à rin.
T’è trouvrès bin on-ôte, ol plèce di Tassin.
Virjile à Mautche avou sès bièrdjîs/II
II
rortografiaedje da Lucyin Mahin
Virjile à Mautche avou sès bièrdjîs, 1855 (mwaisse) / 2025 (riscrijhaedje)
Deûzème églôgue
- ↑ Dins l' mwaisse modêye, li scrijheu a conté li prononçaedje di ces halcrosses H la (come dins « traîtévë », rimetous vaici e clintchêyès letes et sorlinés) po-z awè on doze-pîtaedje (zandrins), a môde do francès. On n' les prononce pus dispu l' 20inme sieke.