Stéfène.
A l’ombe[1], chér Bombal, d’ on vî hèsse flachè,
To djouwes dol bastrinque avou t’ djoyeûs ârtchèt.
Èt do timps qu’aflidjès èt plorant nos miséres,
Nos quitans nosse payis èt l’ mohon d’ nos vîs péres,
Todi stindou, Bombal, come vo-t’-là, su l’ wazon,
To répètes todi l’ nom di t’ bèle mayon.
Bombal.
C’è-st-on bon Dieû, valèt, qui m’ laît voci tranquile:
Creû-me; c'è-st-on bon Dieû : tos lès-ans, l' mwès d' avril
Vièrè crèche por li mès boûs èt mès-ègnês;
C'èst li qui m' laît voci codûre mès tropês,
Èt c'èst por li qui dj' tchante, à l'ombe pacifique,
Su m' chalè viyolon, dès bês-êrs di musique.
Stéfène.
Dji n' su nin èviyeûs; maîs dj'èstans bin sbarès
Do véy come nos tchamps vont èsse dichèrès.
Waîte avou qué mâleûr dji va k'traînè mès gades;
Çou qui m' cosse cisse-cèle qu'a fordjètè torade :
S' biquèt, i féve, hélâs’ ! tot l'èspwâr di m' tropê ;
Maîs il èst d'morè là, d'zos on vî waroquê.
Djo l'éve bin pinsè au djargon d'one cwarnêye.
Dj'aî véyou one saqwè qu'èst pus tèribe à véy :
Li toneûre, au-dzeû d' mi, toûrbiyant à hiquèts,
A spiyè on vî tchène è pus d' vint’-sî boquèts.
Lès djins, au pus sovint, s'i n'èstint nin si bièsses,
Vièrint bin lès mâleûrs qui pindèt d'zeû leûs tièsses;
Maîs l' ci qu'è-st-on bon Dieû, dji vou saveûr quî qu' c’èst :
Dèheuz-m’[2] quî qu' l’a ponou, dèheuz-m’ quî qu' l’a covè.
Bonbal.
Dji pinséve qui Mautche èstéve one pètite véye,
Deûs, treûs mohons èssône, à Bordon tot parêye ;
C'èst lès pus grands saqwès comparès à dès rins;
C'èst comparè l' djônetéye à l' mére di nos tchins ;
Ca Mautche lîve ostant s' tièsse su sès vèhènes,
Qui l’ pus grand d’ nos peûrîs li sêne au-d’sus dès spènes.
Stéfène.
Èt – mèrvèye! – as’ sètî tot qu’au pî do grand tiêr ?
Bombal.
Faut-i èsse ossi pôve è l’èstè qu’è l’iviêr ?
Vikè sins libèrtè, sins caurs èt sins corèdje,
Si tchènou qui dj’èstéve èt l’ pus vî do viyèdje ?
Ca, tot l’timps qu’ dj'aî d'morè mariè avou Djètrou
A ! dj'èstéve li pus pôve qui t’as jamaîs vèyou.
Maugré qu’djéve minè tant dès-ègnês à l’fôre,
Dji n’éve jamaîs pont d’ patacons a risclôre.
Dji véyéve filè m’ bûre à faît qui dj’ l’éve batou.
Èt m’ froumadje do côp qui dj’ l’éve sitwardou.
Stéfène.
Dj’èstéve tot sbarè, èt Djètrou tote chagrène
Dèhéve sès pâtêrs à l’èglîse di Marène.
Bombal n’èstéve nin là : c’èst l’ méyeû dès bièrdjîs
Lès djônes li r’quèrint tot-ossi bin qu’ lès vîs.
Bombal.
Qui m’ faléve-t-i fè ? Dj’èstéve todi parêy,
Dji n’éve qu’on reucoûrs : c’èstéve d’alè ol vêye,
Èt do priyè l’ bon Dieu do roviè m’ vî pètchî,
Èt d’ nos rinde méyeûs qui dj’ n’avins jamaîs stî.
A Mautche, dj'aî vèyou l’ vî ritchau qu’a l’ pacyince
Do r’cîr deûs côps par an li trecins di nosse cinse.
C'èst Labêvile, i d'meûre ol Troukrée, è tchèstê.
Do côp qu’i m’a vèyou: Bombal, volà m' tropê,
Dit-st-i, vos véyeus qu' c'èst dès bièsses qu'ont bone mène;
Sognez-lès bin, saveuz ; minez-lès ol Fâmène.
Stéfène
Êy ! qué charmant boneûr ! maugré qui v's-èsteuz vî ;
Vos sèrez bin voci; vos n' saurîz esse mî.
Vos waudrez vos tropês d'vins dès bèlès campagnes,
Èt d'vins dès bês pachis, qu'ont l'aîr d'èsse dès fagnes,
V's-îrez d'zos l' Monumint, v's-îrez au Fond des Vaus,
Au triviè dès frèchis' èt d'sus lès blancs cayôs,
D'où qu’i-gn-a pont d' tési, d'où qu'i-gn-a pont d' dôrnale,
Bombal, èt vos tropês n'atrapront jamaîs l' gale.
Tot do long dol Mârtchète èt su l' boird di Bôdô,
Vos pôrez tot au mwins v’ ripwasè tot vosse sô.
È podrî one grande håye, one moche qui samiêye,
Vos frè, avou plaîji, clôre l'oûy au somêy.
V's-ètindrez l' fagotî qui, d'vins lès spès bouchons,
Faît ronflè à s’ plaîji sès djoyeûsès tchansons.
Vosse turturèle, avou lès colons, d'sus lès tchènes,
N' cessront nin do gronlè, tot come dès Madlines.
Bombal.
Lès ciêrs îront d'vins l'aîr pache avou lès-ohês,
Èt lès trûtes vôrint n'nalè foû d' nos richês,
Les rwès èt lès bièrdjîs vôrint candjè d' casaques,
Èt l' Mautchwès beûrè d' l'êwe au payis des cosaques,
Qui dji n' rovîrê nin l' pére di mès bèrbis.
Stéfène.
Maîs por nos, nos ‘nn’ îrans, dji n' sé d'vins qué payis,
Corant come on veût dès-ohês su dès brantches,
Ou bin doû qui, d'sus l' mér, l' monde èst ralongui d' plantches.
Nos r'vêrans co portant r’vêy on djoû nos mohons,
Èt nos tchamps, d'où qu' dj’avins dès si bèlès méchons.
I s’ passerè bin do timps ; pus nos lès vêrans r’vêy;
Maîs nos savans d'djà bin qui rin n' sèrè parêy :
Des Cosaques splouketront tos lès fruts d' nos labeûrs,
Come il ont dispouyè lès moches di Wangneûr.
Volà çu qu' c’èst dol guêre : on sème dès avônes;
C'èst po r’cîre dès côps d' cravache po sès pônes,
On sôdård vos mougnerè èt vos foûrs èt vos grins.
Grèfez co dès peûrîs; èspérez dès réhins.
Alez, m' pôve tropê, bèrbis tote dichèrêyes ;
No, dji n' vos vièrê pus, dissus totes cès hourêyes,
Brostè lès ptits bouchons, tchibotè d'sus lès fleûrs,
Èt m' pitit flajolèt ni v' tchantrè qu' des maleûrs.
Bombal.
Maîs nos p'lans co portant voci lodjè essône,
Ca dj’avans co do pwin, dol confiteûre di prônes,
Dol maquêye èt dès pwès ; d’morez, ca vos véyeuz
Qui l' foumire à grands flots cramiêye au d'sus dès teuts.
L' solê, por on momint, r’glatit co su l' Fâmène,
Èt l'ombe do grand tiêr si stind jusqu'à Vèrdène.
Virjile à Mautche avou sès bièrdjîs/I
Ciste ouve ci egzistêye eto divins ds ôtès ortografeyes : Mwaisse modêye (19inme sieke) — Feller (Calozet) — Rifondou.I
rortografiaedje da Lucyin Mahin
Virjile à Mautche avou sès bièrdjîs, 1855 (mwaisse) / 2025 (riscrijhaedje)
Prèmîre églôgue
Stéfène, Bombal
- ↑ Dins l' mwaisse modêye, li scrijheu a conté li prononçaedje di ces halcrosses H la (come dins « ombë », rimetous vaici e clintchêyès letes et sorlinés) po-z awè on doze-pîtaedje (zandrins), a môde do francès. On n' les prononce pus dispu l' 20inme sieke.
- ↑ Cawete di codjowaedje -euz (/œ/) a Måtche minme ALW 2 mape « vous êtes ».