On bai tgou, sprésintet Albrechoie et Dumon,
Po vni disputet l'pris; vo nos la sus l'wazon.
Nos tgunis, à leus voix, choûtint comme des sottes,
Et les ptits ris montint tot do long d'leus corottes.
Nos répétrans, s'nos plans, et dsus on même ton,
Les coplets d'Albrechoie et les ci da Dumon.
Ti seulmint, Canari, soieti q'sus des neçalles,
To porsiges les Turcs, po l'zevoiet aux diales,
Soieti q'les portchessant sins l'zaveur rattrapets,
To sprognes, l'zy voiant onn' grêle di boulets,
Dvin nos remmes du moins tgi voux qui t'nom figure,
Po pleur dire à m'plaihi qui t'est'on deur à cûre.
Fans des vers, po tchantet on si fameux sôdart,
Comm' s'ils rolint avou des bottes di houzard.
I n'tes faut nin corcet, si l'monde tes paurléve;
To vierrets qui l'rimeux a fait tot su qui pléve.
L'nutte estéve tot prés avou sneur cotillon.
Et l'rosée arrivére ossi dvin noss vallon,
Kwant Dumon, di s'bastrinque a vnou rzinglet les coittes,
Et kmincet à tchantet, d'onne voix des pus foites.
Tgi m'sovairai d'Bertine,
Et tgnol sauret roviet ;
Il l'éve dit, l'mâtine,
Qui tg' my pléve fiet.
On n'sé nin su q'ça cosse,
D'esse léet en blanc,
Turlupinette d'onn' rosse.
Tchantan do mi g'nos plan.
____
V'quirrez des tchansonnettes,
Qui dsus on pus bel air
Paurlet des amourettes
Q'les biergis do grand tier.
Tgosef auret Bertine,
Maugré q'tgai sti s'galant,
Et v'là tol cqui m'taquinne.
Tehantan do mi q'nos plan.
____
Ostant tguret qu'il l'éve !..
C'est' onn' tchenne et on tchet.
S'baitet m'essorsuléve;
Via su q'lamour pout fet.
A quoi q'to t'ragrawiaies !
Tgosef, tire ti plan,
Et croche li des tgaies.
Tchantan do mi q'nos plan.
____
Parblu, to méritéves
Onn' homme comme i faut,
Maugré q'to m'mépriséves
Comme on vilain nigaud.
Tgi sus foirt comme onn aupe
Et deur tot comme on gland;
Mais t'éves peu di m'baupe.
Tchantan do mi q'nos plan.
____
Tgi t'ai véou si tgône !
To n'éves nin quinze ans,
Q’to ddinnéves li pône
D'accori dvin nos tchamps,
Po vni quéri des pommes.
Ti, si bin qui t'manman,
Vos fî soffri les hommes.
Tchantan do mi q'nos plan.
____
Adon, tgi n'connuchéve
Qu'à pône l'nom d'lamour :
Jamais tgi n'mi dotéve
Qui m'tgoueret on sfait tour.
Aie, il a pousset l'faie
Et l'mére à stantoupet,
D'onn' façon sins paraie,
A s'rauiet tot l'toupet.
Po ses carabistouies,
Li mére avou s'teffant
S'arrachrint bin les ouies.
Tchantan do mi q'nos plan.
____
Qués pétchis q'fet les femmes !
Mais ti Tgosef, t'es bin :
Bonbal, divin ses remmes,
Sauret vantet t'destin.
Foû do tchêne et dol rotche
Li lâme avou l'vin blanc
Vont t'arrivet ol botche.
Tchantan do mi q'nos plan.
____
Tgaimrais mî cent côs esse
Au mitan do vevi,
Qui trahi di m'maitresse.
Bertine, tg'taime mî
Et qui m'mére et qui m'soure ;
Si volti tg tai véou !
Tgi tos l'dis et tgi moure.
Tgai tchantet l'mi g'tgai plou.
Dumon tchantéve ainsi ; l'pôve vî soupiréve!
Voci comme ossitôt Albrechoie étonnéve :
Vite i m'faut apoirtet
On scéai d'bénite aiwe ;
C'est po dissôrsulet
L'homme qui po dol plaiwe
Ni voret q'do péquet.
Flanquan li, sins rin dire,
Des hieppes di sorcire !
Qu'on li diche qui rvégne, il est' au cabaret.
____
I n'fauret q'des tchansons.
Onne tchanson bin faite
Tchessret les scôrpions.
A l'heure dol lurcette,
Conjuranl' do rintret.
Fan onn' homme di cerre
Et pus mettanl' ès terre.
Qu'on li diche qui rvégne, il est' au cabaret.
____
Pirdez treus bais roubans
Di coleur différente,
Et mettez les, flottants,
Sus voss coiffe charmante,
Belle et sage Orabet;
L' bon Dieu décidret vite.
Qui sret rivnou tott' suite.
Qu'on li diche qui rvégne, il est' au cabaret.
____
Pus foirt vos les nocqrez
Pus vite i v' vairet rvaie;
Fez quéri des lauriers,
Mettez v'z'et tot paraie
Sus l'tiesse on ptit bosquet,
Et tg'diran onn' parole,
Qui fret rivni noss drole.
Qu'on li diche qui rvégne, il est' au cabaret.
____
L'tguni qu'on z'a pierdou
Bisse comme éwarée,
Et, kwant l'neureure a vnou,
Sovint n'est nin rintrée.
Tgi vzy poux comparet :
Voss t'amour po voss t'homme,
C'est bin su qui v'z'assomme.
Qu'on li diche qui rvégne, il est' au cabaret.
____
Tg'éterrans d'sos nos pîs
Dvin onn' petitt' potalle
Les dents d'onne berbis
Et les tchvaix d'onn' macralle.
Li leu l'pus éwaret
Par on tél sortilége
Toumret tgus comme onn' frége.
Qu'on li diche qui rvégne, il est' au cabaret.
____
Tgi frets rivni les moirs,
Et potchet foû d'leu fosse;
Des hommes les pus foirts.
Li grand cadave hosse
Ossitôt q' tg'ai paurlet ;
Et si tg' voléve, à l'ronde,
Tg'essôrsulret tot l'monde.
Qu'on li diche qui rvégne, il est' au cabaret.
____
Tappe tes cennes long,
Afin q'lair les q'poucelle…
N'veusse nin, dri t'mohon,
Onn' flamme qui rûchelle?
Ol veusse tourbiet ?
Ca, c'est onne figure
Qu'est d'on fameux augure.
Ha! ha ! volci portant rivnou d'au cabaret.
Virgile à Mautche avou ses biergîs/VIII
Huthème églogue