Ch.
Poquoi, pussqui n'zestans essônes rassemblets,
N’tchantrin-tge nin voci quéques novais coplets?
Nos irins là volà n'zassire dzos l'vî hesse.
Gal.
C'est bin vos qu'est l'pus vî, tgi deus par politesse
Allet doù qui v'vôrez ; soie-ti dzos les neugîs,
Ou dzos l'roche qu'on veut tott vette di frégîs.
Les fouais des neugîs, dzos l'air qui les balance,
Nos dônrait dvant nos pîs onn' ombrire en cadence ;
Et l'rotche qu'on veut là pinde dzos les bosquets
Poite onn’ végne qui rlut d'bais réhins à troquets.
Ch.
I gna q'Servais voci qui v’pôret mette à gogne.
Gal.
Tgo l'creus, à Molénier si donret do l'besogne.
Ch.
Aie! valet, tchante Rôse et l'amour malheureus,
Ou bin les ergotats di quéque vî plaitieux,
Et Bonbal waudret bin nos tropaix avou l'saine.
Gal.
Nônna; tchantans putôt des vers qui, dsus on tchêne
Tgai gravet l'aute tgou dvin l'petit bois Montet,
Et pus dis au pus franc d'mol veni disputet.
Ch.
Ostant qu'onn’ grande sau monte au dsus des fénesses
Et qu'on tchêne do bois s'live au dsus des tgugnesses,
Ostant, dvin lart des vers, vos liez Servais dri vos.
Gal.
Taihans-nos; voci l'rotche et vola g'tgintrans dzos.
« On z'a véou ploret l'vî garde, à chôdes larmes,
L'tgou q’Napoléon à morou :
Et nos vis guernadiers aurint tots rpris les armes,
Si l'avint co rvéou
Les tchênes do bois d'Mautche et les sapins d'l'Asie
En n'ont stî goliment stonet ;
Et, dvin l'même momint, au mitant do l'Russie,
Li Kremlin a trônnet.
S'mére, divin s'douleur à mitant saccagée,
O la rabresset comm' do poin ;
Et pus vollà sur li toumet d'onn' astaurtgée,
Comm’ sil nès rvaîret nin.
Ses calmoucs, dèvorant l'pus grande des tristesse,
N’ont pus métou l'pî sus li stri;
Et tgi m'sovint co bin q'nin onne di nos biesses
N'a stindou s'gueue au ri.
Les milôrds cosous d'ôr, les poûfs ès leurs barraques
Sur tes vertus estint d'accôrd !
Des Baskirs, a-t-on dit, les pus muais des cosaques,
Ont dnet onn' larme à t'sôrt !
C'est ti qu'ol z'apirdéve à gobet onn' province,
A tgouet des armes à feu,
A spadronnet d'ol lance, et fet, sins quon z y pinse,
Onn' raffe sus tot l'tgeu.
Ses sôdarts, en l'cîhant, avint tott' les franchîses;
I s'fint sus l'chéf do tropai,
Comme l'tropai sus l'tchin, li végne sus les pîces,
Et l'vatche sus l'torai.
Sitôt q'tas sti baguet, après tottes tes guerres,
Tgavans divnou des indigents.
Les tchvaux des Prussiens ont émakralet nos terres
Et l'nourson d'nos effants.
Ol’ pléce des rôsis on veut crêche des spennes ;
Nos blets n'sont pus q'des métillons ;
Et dvin nos bais cortis, qu'avint de tgalofrennes,
On n'veut pus q'des tcherdons.
Appretans des cochais po z'ès covri l'poussire ;
Arrangeans ces fontaines-ci ;
Avou des blancs caiaux qu'on li bâtiche onn' bire,
Po z'y scrire souci :
« Li guerrier qu'éve à Mautche appoirtet tant d'ritchese
Enfin est coutchet voci-dzos ;
I doime; waitez bin, si levéve si tiesse,
Rois, vos v'sauvri tortos. »
Ch.
Bravo! to n'as jamais si bin tchantet di t'vée.
Kwant on cût onn' cotlette ou bin onn' sitouvée,
Li brut qui l'tchaure fait sus l'bréche en fricassant,
Avou des ptits ognons, n'nos retjouit nin tant.
C'est ti q'seret l'premi: rôlant pott'avau l'vaie
Et nos net pôrans nin z'et trovet on paraie.
Noss grand maisse est dri ti; mais tgi m'va saie à m'tour
Do tchufflet des coplets qui t'front palpitet l'cour.
On s'et sovint à Mautche; on l'chante co au viètche…
Gal.
Igna nin onn' sakwet po m'touchet davantètche ;
Dailleurs Symonais dit q'vos vers fet des effets,
Et qu'ils sont si ronflants qu'onne trompette-à-clets.
Ch.
« Waite l'ciel riglatit avou ses bais bleus voiles :
Disus des tonneurs assis,
Napoléon s'y carre, admirant les étoiles,
Qui rôlet dzos ses pîs.
C'est po ça qu'on z'étind tgipet dvin les hourées,
Et podri les bouchons.
Les tropais chibotet, et les goies son forées
Tottqu'à dvin les motons.
Li ciel, comme on solai, vint do rcire s'grande âme,
Et nos n'véans pus nin on leu ;
On n'troubelle pus l'paix ; portant maugré qui doime
Tot l'monde enna co peu.
L'pôrtier, en l'veant vni, coréve comme onn' biche,
Po li drovi l'pus grand salon ;
Pus Tantèse et Lalie allint autou di s'niche
Danset on cramignon.
Sur les tiers les pus hôts et dvin les trôs des rotches
On n'étind pus qui s'nom ;
On n'étind pus qu'on cri ronflet dvin tott' les botches :
« Vive Napoléon! »
L'brave homme ! i nos rindret tortos heureux, si pléve
Réparet tos nos maux passets;
On li bautgret les moins; si l'bon Dieu l'permetéve,
On li fret des autets.
Si nos guernadiers d'Mautche ol polint on tgou rvaie,
I vairint tortos li dnet l'moin.
Oh! si pléve rivni, comme on beuret botaie
A l'baube do Prussien !
Li vin, à bon martchi, sins aveur onn' culotte,
D'ol frontière nos z'arrivret ;
Et l'vî Flippe en cadence et ma tante Tcharlotte,
Dansrint on metnuet.
Si c'estéve és l'estet, au mitant d'onne plaine
Nos installrins nos violons ;
Es l'hivier, nos dansrins, tg' tchantrins à piède haleine
A costet des côpons.
Gnos sovairans todi d'onn' si belle tgournée,
Qui nos t'avans fiestet nos deux ;
Nos rikmincrans todi, po l' fiesse, chaque année,
A t'rimontet des tgeux.
Ça durret tant qui dsus les sauvatches gritchettes,
On vierret cori les vîs ciers ;
Tant q'les ptits péchons q'sont es laiw' des deux Martchettes
Vôront mougnet des viers.
Li londmoin do l'Saint Rmauque, on z'et rnovulret l'fiesse :
Po s'risovnit d'tots tes loriers,
L'londi, l'musique à l'tiesse, on ziret tchantet l'messe
Po nos vîs guernadiers.
Gal.
Qu'est-ce qui tgi t'dônrai por on si bel ovrètge?
Ca dsus l'boull igna rin po m'plaire davantetge;
Ni l'brut d'lair, kwant i fait ramchiet les fouais,
Ni les ris qui rûchlet sus les prèts les pus bais.
Сh.
Mi d'abord, tgi t'va dnet l'pus belle des trompettes,
Qu'a tgà tant fait danset mes ptites berbizettes :
Il m'a bin siervou dvin les amours da Herkot,
Au coron do Bruseau, corant comme on vî sot ;
Il m'a co bin siervou po l'tropai da Copienne,
Qu'on pirdéve po l'ci do sinse di Marenne.
Gal.
Tin, to m'as fait plaihi; tgi t'denne mi bordon,
Qu'est bai, passqu'on z'y veut des noques tot do long.
Frére o l'véve aveur; mais qui vache à l'porminade ;
I guauret q'ti q'lauret, passqui t'ès m' camarade.