Au coron do Brûseau, tgai véou l’vî Herkot,
Cori podri Tassin, qu’ol traitéve[1] di sot.
I coréve les prèts, les tiers et les hourées ;
Et Tassin n’respond nin a totes ses biestrées.
T’eston drôle d’effant, disti, tot éwaret ;
Et poqoi c’qu’adlé mi to réfuss’ do dmoret ?
Mes tropais son à l’ombe, et mi tj’vas fet m’prantgîre.
Ni veuss’ nin on tési qu’est là catchet d’sos l’pîre ?
Agnès a rapoirtè dol’ suralle et do tget,
Po zet dnet aux faucheux, qu’on si seu q’po pétet.
E d’ol’timps qui l’solai vos a rsetchi l’gargette,
On n’etint q’des krétion qui rsémiet leu solliette.
Agrabelle et Tgétrou m’avint fet l’fotche au dos,
Et tgi dvéve esse après co turlupinet d’vos.
Agrabelle estév’ neure et v’zesteus comm’ li nîve
Mais ni v’vantez nin tant d’aveur li coleur vîve.
Les franbauch’, on les mogne ; on lait là les heupons.
Waitez bin quî qui tg’sus, et comptez mes motons.
Dol laine di berbis, tgennai onn’ halonnée.
Et l’blanc léçai jamais ni m’manque tott’ l’année.
Et tgi tchante si bin, qui Rmauque Morenier,
S’il ès savéve ostant, ès sret jolimint fier.
Pus tgi n’sus nin si laid ; tg’mai véou d’vin l’Martchette,
Kwand l’aiwe, on tgou, dvant mi corève belle et nette.
Tgi vaux bin Picolot, si tgi n’sus nin trompet ;
Et portant vos v'sauvez, q'tginn' vos poux ratrapet.
Pa veni ; pa moussez tot' qu’au fond di m’cassine.
Q’tgif apprende à kwarnet on pô mi q’Galopine ;
Maugré q’tos nos bais airs, c’est bin li qu’ol z’a faits,
Li qu’estév’ en mêmm' m’temps l’bon médcin des porçais.
Veni saie d’atgustet m’flageolet à vos botche ;
Kwand tgl’ai mostret à Zand, il vléve mette ès spotche.
C’est nn’est on bai, stila, d’flageolet à sept trôs.
C’est l’tchesseux Devilers qui m’enna fait cadôs.
C’est nin onn’ instrumint comme Litche ès hâbelle,
Et qui n’fet nin pus d’brut qu’on rat, kwant on chufelle :
Stici, des mî tournet et d’bai bois d’sawéri,
A siervou pus d’vingt ans, à l’Roche, au vî Chiri.
Chanchet ol vléve aveur, et mi sitôt tg’arrive :
Tgi tol denne, dis-ti ; mais c’est qui faut qui tg’crive.
C’est nin co tot, valet ; tgai co pu d’onn egnai,
Et totes les coleurs rilûhet sus leu pai :
I sucet tos les tgous, l'blanc leçai d’deus-treus gattes ;
Agnèse m’a bin priet dol zi minet torates ;
Et tgol frai, ston’ voux nin vni dmoret avou mi.
Veni, pus d’onn’ mayon vint d’arrivet voci,
Po v’dinnet des œillets, des pavots, onn’ tulipe,
Des fleûrs di dvin les grains et des rôses d’Egype,
Waitez qué bai tchapai qu’il l’ont tresset d’leurs moins,
Avou do joli bois et les fleûrs des jasmins.
Tgi v’tchusichrai des fruts, des néches et des prônes.
Et co des fleûrs qui kwand qu’il sont mettoies essônes,
Fet onn’ si bonn odeur, qui v’les sintré d’Pékin.
Taiss’-tu, Herkot, to dvin fou do tgône Tassin.
Li présentet totça, c’est comme si t’avéve
Minet d’sus tes méchons des caiaux et dol gréve.
Napoleon, dis-ton, aurait oiou l’migraine,
Si n’éve pus véou les tchamps, les biess’ à laine.
Li lion sit les leups ; l’leup court après légnai ;
Et, comme dit l’Litgeu, valet : chacun s’toûhaî !
Les bous rivnet des tchamps en trainant leurs tchérowes,
Et l’pélise dol nutte a dchindou dvin les rowes ;
Portant tg’sus co pus fou, to dirais qui tg’radotte.
Tgans putôt travaiet ol végne da Lambotte ;
Fans putôt des banstais, q’do passet l’timps à rin.
Tès trouvret bin on’ ôte, ol plèce di Tassin.
Virgile à Mautche avou ses biergîs/II
Deuzème églogue
- ↑ Li marcaedje des halcrosses E permete di rtrover li tipetape del mwaisse modêye