Cwand nos sintrans nos spales divni pår trop nåjheyes
D’ awè poirté les croes k’ on rescontere dins l’ veye,
Cwand ns årans ascoxhî tos deus l’ soû del viyesse
Cwand les ans, les tchagrins åront blanki nos tiesses
Ki nos ténrans baxheyes cwand nos nos pormoennrans,
Come po mia waitî l’ tere ewou k’ nos nos rpoizrans ;
Cwand nos bresses seront flåwes et nos pîs bén pezants,
Nos cours dimorés djonnes s’ inmront come a vint ans.
Nos nos rtrouvrans nos deus dins ene måjhon dseulêye,
Et nos n’ cwitrans pus waire nosse fåtûle dé l’ aistrêye…
Les poennes åront flani vosse bea roslant vizaedje…
Dji vos voe tricotant des tchåssons, des coirsaedjes,
Ki vs vôrîz mete vos-minme ås efants d’ nos efants…
Ås djoûs d’ fiesse, plai-st a Diè, eshonne, nos nos rtrouvrans,
Et a les rvey tertos, nos nos radjonnirans :
Nos lepes ridiront co les minmes mots k’ a vint ans.
Nos vicrans dins l’ passé, paski nosse pôve memwere,
Ni s’ sovnant pus d’ ayir, nos etrinnrè tofer
A dvizer do vî tins, li ci d’ nosse bele djonnesse,
Li ci ewou k’ l’ avni esteut rimpli d’ promesses…
Cwand i frè bon assez, nos ns ashirans dsu l’ banc.
Si l’ tins vént a frexhi, mafwè, nos nos rserrans,
Dji dmandrè tenawete: « N’ avoz nén froed, Moman ? »
E rmontant vosse motchoe del minme djesse k’ a vint ans.
Mi tiesse, po s’ aspoyî, clintchrè so vosse sipale.
Mi boutche, sins l’ fé esprès, rivtêyrè vosse mashale,
Mi bresse, par abitude, pasrè åtoû d’ vosse taeye,
Mins vos n’ mi diroz pus: « Il est grand tins k’ dj’ ervåye ! »
Et a nos vey insi tos les deus, nos sondjrans :
Est ç’ possibe po des vîs, d’ todi s’ inmer ostant !
Vos soreyroz doûçmint, et cwand nos nos rwaitrans,
Nosse waita serè tinre, todi come a vint ans.
Todi come a vint ans
Ciste ouve ci egzistêye eto divins ds ôtès ortografeyes : Modêye CW 1939 — Modêye CW 1940 — Feller 2023.Todi come a vint ans
rortografiaedje da Lucyin Mahin
Scoles di Bive, 04-11-2025, 1937 (mwaisse) 2025 (rortografiaedje e rfondou)
Todi come a vint ans
Note Wikisourd