Li 12 di décimbe 1489, li bon Diè a èvoyî a Lucifêr one lète qui d'djeut a pô près çoci :
Mi p’tit gamin,
Mi pèrmètoz d' vos lomer : mi p’tit gamin, come quand vos-èstîz co l' pus maméye dès djon.nès-andjes di M' maujone ? Dji vos scrî po vos dîre çoci : vos-avoz gangnî vosse wadjûre.
Dji n'a nin dandjî d' vos splikî quéne assonre qui c'èst vêla pa d’zo : vos-avoz one pitite saqwè a vèy dins tot çu qu'i gn-a d' mwês ; gn-a one pitite sipite di vosse ratchon dins l'ouy di tos lès bourias ; tot èwou ç' qu'on mascaurdéye, voste ombrîye a passé. Gn-a pus rin d' bon dins lès djins, vos lès-avoz èmacralé tortos. One wadjûre, c'è-st-one wadjûre, èn’don ?
Nos frans come nos-avins dit, d'abôrd. Dji vos douve totes lès pwates : vos p'loz bin rachoner vos-andjes sôdârs ; qu'i rûjîyenuche lès dints d' leûs fotches, èle vont sièrvu ; qu'i sofèlenuche su lès breûjes di vos fors ; qu 'i ragrandichenuche vos gayoles.
Si vos n' vos sov'noz pus d' tot çu qu'on-z-aveut dècidé (dispû l' tins !) ou si vos-avoz dandjî d' pus longuès-èsplikéyes, alez todi r'taper on côp d'ouy au dêrin tchapite di nosse contrat (1'Apocalipe, s'apinse a zèls).
Qu’èst-ç' qui vos dîrîz, mètans, do 16 do mwès qui vint ? Ça m' lêrè l' tins d'aprèster mès p’titès-afêres : dj'a dècidé d'prinde condjî, po l' prumî côp dispû l' prumî dîmègne do monde, vos vos sov’noz ? Priyoz m' bondjoû a vosse feume èt on bètch a vos-èfants.
Qui tot vos vaye bin. Vosse :
- bon Diè
Quand il a yeû lît tot djusqu'au dêrin mot, li diâle a sorî : èt c'èsteut come si s' vizadje, dèdja si lêd, si dischurereut. Po fini !
Quéne binaujeté ! Come li Mêsse lî fieut plêji !
Mins ossi, qués dès-èfwârts qu'il aveut d'vu fé ! Dispû li C'mincemint, i s'aracheut l' cu po gangnî lès-âmes, one a one, di totes lès bièsses, totes lès coméres, tos lès-omes : èt cès fènèyants la passint leû tins a djon.neler ! A tot côp bon, i faleut ratèler : poûri, acheter, disvoyî, ètoûrpiner, distrûre, tèm'ter... On-ovradje di nûton.
Gn-aveut pus qu'a èspèrer qui l' bon Diè n' candjereut nin d'idéye, come ça aveut d'dja arivé. Li diâle aureut bin yeû v'lu djiper èt danser inte lès blames èt lès crayas. Maugré tot, gn-aveut one pitite sipène què lî pondeut s' keûr : èt si l' bon Diè toûnereut cazake ? Non : i l'a d'dja fêt trop sovint ; i n' wazereut pus. Come li diâle èsteut pièrdu dins sès pinséyes, sins pârvinu a s' rafiyî paujêremint après l' 16 di djanvî, vola Azrayèl qui bouche a 1'uch.
– Co one lète por vos, Mêsse. Dji crwè bin qu' c'èst dau bon Diè.
– Aboute-mè l', camarâde.
Lucifêr si sinteut pèzant èt disloûjî jamês parèy : i saveut bin çu qu'i gn-aveut di scrît su l' fouya.
I fieut one mawe di sofrance, èt c'èsteut come si s' vizadje, portant dèdja si lêd, si cochurereut.
Chér Lucifêr,
Auwe ! Taurdjîz on pô, s'i vos plêt ! Dji v’s-a scrît trop rade, ènawêre.
Dji sé bin qu' ça n'èst nin fwârt poli di M' paurt di v' fé stater au momint qu' vos purdîz vosse randon. Ossi, Dji vos d’mande èscuze.
Mins Dji v’neu a pwin.ne di vos scrîre quand, tapant on côp d'ouy disgosté d’ssu 1' têre, Dj'a trèvèyu on lomé Patenier, ou Patinîr (Dji n' sé nin, i faurè qu' Dji d’mande) qu'atakeut on tauvia : Dji crwè bin qu'i l' lomerè « Èvôye po l' Éjipe » ou one afêre insi.
Si Dj' vos d’mande d'arèter, n'alez nin crwêre qui c'èst pace qui ç' pondeû la cauze di Mi : tot cauze di Mi.
Non.na, c'èst qui, i faut bin qu' Djè l' riconèche, Dji m'a bièssemint lèyî èmacraler pa ç' tauvia la : i n'èst co qu' sondjî, gn-a co pont d' coleûr dissu l' twèle, mins Dj'a l'idéye qui ça va yèsse diâledimint, pardon, divinemint bia, qui ça sèrè come on murwè d'tot çu qu' Dj'a fêt. Li ciél sèrè come one basse di lumîre ; li vèt' dès pachis sèrè lûjant d' rozéye, lès tièsses di rotche avizeront vikantes, télemint qu'èlle èwareront lès r'wêtants.
Vos n'alez quand min.me nin distrûre tot ça ? (Ou pus rade : èspêtchî qu' ça seûye pusqui, Djè l' rèpète, ci tauvia la n'èst co qu'one èspèrance, on sondje sins cougne, quékefîye one zine).
Alez, ni v’s-è fioz nin po si wêre. Nos r'mètrans ça a pus taurd : voste eûre vêrè. Èst-ç' qui Dji n' vos l'a nin promètu ?
One pougnîye di mwin dau :
- bon Diè
Li diâle, m'a-t-on lèyî ètinde, on côp qu'il a yeû tot fêt d' lîre li lète, a grûlé, a rûtyî, s'a mauvelé. Li sofrance discaurtuleut s' grande cârcasse. 1 s'aureut min.me sitî rassèrer dins lès twèlètes di l'infiêr po tchûler a si auje, mérseû.
Li 5 di fèvri 1555, li bon Diè aveut rovyî l' tauvia da Patinîr (ou Patenier). Discoradjî pa tot l' mwês, li man.nèt, li lêd qu'i gn-a tot-avau l' dagn, il a èvoyî one lète au diâle. Nin dandjî por mi dè l' ricopyî : a wêre près, c'est l' min.me qui l' cène do 12 di décimbe 1489. Lès-andjes di l'infiêr pôrint yèsse dislachîs l' 7 di maus', sicrîjeut-i l' bon Diè.
Li diâle èsteut côpé è deûs : si rafiyî, awè peû…
Èt come d'èfèt.
Li 6 di maus' a l'êreû, li bon Diè vèyeut disclôre, dins l' pôve corti d'on payizan chinwès... one bèguinète. Rade : i riscrît au diâle, po lî ôrdoner polimint d'arèter tot-a-fêt.
Li 30 di décimbe 1623, min.me djeu : ci côp ci, c'èsteut a cauze d'one bauchèle qu'aveut sorî pace qu'one alène si coployeut su l' dos di s' mwin, èt qu' ça l' kèkieut. Li 7 d'octôbe 1809, c'èsteut pace qu'on p'tit richot d' rin du tout, télemint p'tit qu'i n'aveut d'dja pont d' nom èt qu'on n' sét pus èyu ç' qu'i coureut, aveut r'glati au solia.
Li 8 di décimbe 1968, Chostakovitch sicrîjeut lès prumîrès notes di s' 14e sinfonîye.
Èt co tot plin, tot plin dès-ôtès-afêres, divant cèt'lale, après cèt'lale.
Èt a chake côp, lî diâle ni s' saveut èspêtchî d'èspèrer, do s'agrancî après l' date mètûwe. Si pwètrine si gonfleut. Sès djambes si disployint : on-z-oyeut grûcyî sès vîs-ouchas èrunis. Au min.me momint, i s' faleut rit'nu, i faleut sofri tot ratindant après l' deûzyin.me lète, qu'ariveut tofêr ; awè mau tot lîjant chake mot, todi lès min.mes, todi difèrins.
A chake côp ossi, i s' faleut abachî : li Mêsse èst todi l' Mêsse.
Dins l' fond, ci n'èst nin qui l' bon Diè èst mèchant. Non. Mins i n' si sét dècider : i tchiktéye.
Dès lètes, il ènn' a èvoyî, il ènn' èvôyerè, il ènn' èvôye a chake sègonde, èt a chake sègonde èto, i s' ravize èt spédyî al vole on-ôte mot, qui dit l' contrêre do prumî.
Non ; nin a chake sègonde : a chake momint, èt min.me co pus sovint qu' çoula ; vosse pinséye, lîjeû, n'ovère nin rade assez, n'èst nin tayante assez po sawè discôper li scrîjadje dau bon Diè. Si tins n'èst qu'one longue lète avou, d'on costé : Distrûjoz, èt di d' l'ôte : Nè l' fioz nin.
Èt ç' papîscrît la, sins comincemint, sins coron, noûrit l' grand feu qui brûle Lucifêr, èt què l' fêt hûler.
foû di « Sacwantès fåviretes did hute did ci », 1994